Read Iban 1 Makabi 8 Bible Online

1 Makabi 8 - Iban bible

1 Makabi 8

¹Judas ninga rita orang Rom enggau kuasa soldadu sida ke tebilang. Barang sapa deka setanah enggau sida diterima enggau manah lalu diambuka kaban.

²Judas mega ninga rita pasal perang orang Rom enggau pemerani sida beperang lebuh sida ngalahka menua Perancis, lalu mejal orang dia mayar chukai ngagai sida.

³Bisi mega cherita ditusi ngagai iya pasal utai ti dikereja orang Rom di menua Sepanyol ketegal sida deka ngerebut endur ngali mas enggau pirak dia.

⁴Enggau tasat sereta enggau ati ti liat sida ngerebut serata menua nya taja iya jauh amat ari menua Rom. Bala raja ke datai ari jauh deka beperang ngelaban sida, diserang sida, lalu alah balat amat. Orang ke agi idup mesti mayar chukai ninting taun ngagai sida.

⁵Philip enggau Raja Perseus raja Makedonia enggau semua orang bukai ke ngelaban menua Rom diserang lalu dialahka sida.

⁶Nyentukka Raja Besai Antiokus, raja Asia Barat Daya ke nyerang sida enggau 120 iku gajah, raban soldadu bekuda, kereta kuda perang enggau soldadu ke kering, dialahka sida mega.

⁷Raja Antiokus ditangkap, lalu iya enggau semua orang ke nganti iya mesti mayar chukai ti besai. Kelimpah ari nya, raja mega mesti nyerahka menua ti diperintah iya baka

⁸India, Media, Lidia enggau sekeda menua bukai ti pemadu manah. Semua nya lalu diserahka orang Rum ngagai Raja Eumenes.[9]

⁹Lebuh orang Gerika ngaga atur deka nyerang lalu ngalahka orang Rom,

¹⁰atur nya ditemu, ketegal nya siku tuai perang orang Rom dikirum nyerang sida. Mayuh orang Gerika bakar, bini anak sida ditangkap, reta tengkira sida dirampas, menua sida dempu orang Rom, semua kuta sida dirubuh, lalu sida empu nyadi ulun sampaika sehari tu.

¹¹Semua perintah bukai enggau semua pulau ti kala ngelaban sida dirusak magang, lalu orang dia nyadi ulun sida.

¹²Tang semua menua ti bekaban enggau sida tauka minta jaga sida tetap digaga sida baka kaban.

¹³Sida ngalahka mayuh perintah ti semak enggau jauh. Semua orang ke ninga rita sida takut magang. Bisi orang ditulung sida nyadi raja, lalu bisi raja dibuai sida. Sida udah nyadi siti kuasa ti besai di dunya.

¹⁴Taja baka nya, nadai siku orang Rom deka ngeninggika penduduk diri lalu nyiri diri nyadi raja.

¹⁵Sida numbuhka Dewan Negara, lalu tiap hari 320 iku kaban dewan nya begempuru berundingka mayuh pekara, nyengkaum ngiga jalai ngambika rayat diperintah enggau manah.

¹⁶Tiap taun sida milih siku orang ke diberi pengawa merintah sida lalu nyaga semua bagi menua sida. Semua talukka iya, lalu nadai siku orang pedis ati tauka begedi meda iya.

¹⁷ Judas lalu milih Eupolemus anak Joannes uchu Akos seduai Jason anak Eleaser. Seduai nya dikirum ke Rom ngambika ngaga sempekat bekaban enggau orang Rom.

¹⁸Sida ngaga utai baka nya ngambika ulih ngelepaska diri ari dinyakka orang Siria ke beulunka orang Judah.

¹⁹Udah Eupolemus seduai Jason nembuka pejalai ti jauh amat, nya baru seduai iya datai di Rom, lalu ngagai Dewan Negara. Seduai ngenataika jaku tu ngagai orang ke begempuru dia,

²⁰“Judas Makabi, bala menyadi iya enggau semua bansa Judah ngirum kami duai kitu mai kita bekaban lalu bebaik ngambika kami disahka nyadikaban kita lalu nyadikaban sida bukai ke setanah enggau kita.”

²¹Orang Rom nerima perambu nya,

²² lalu tu kupi ari surat ti dikena nyaut, ditulis ba lampang engkeraju ti dikirum ke Jerusalem nyadi tanda pengingat sempekat nya:

²³“Lantang belama bansa Rom enggau bansa Judah ke di darat tauka di tasik! Awakka pedang enggau munsuh jauh ari sida.

²⁴Tang enti menua Rom tauka siti ari menua ti setanah enggau iya dulu di serang,

²⁵bansa Judah nadai kakang ati nulung nitihka pinta maya nya.

²⁶Bansa Judah enda meri tulung baka pemakai, senyata, duit tauka kapal ngagai munsuh orang Rom baka ti udah ditetapka di menua Rom. Bansa Judah deka bejalaika pengawa sida enda ngarapka sebarang upah.

²⁷Baka nya mega enti bansa Judah diserang dulu, bansa Rom nadai kakang sekali nulung nitihka peminta maya nya.

²⁸Bansa Rom enda meri tulung baka pemakai, senyata, duit tauka kapal ngagai munsuh orang Judah baka ti udah ditetapka di menua Rom. Bansa Rom deka bejalaika pengawa sida enggau lurus.

²⁹Baka nya meh utai ti ditulis ba sempekat ti digaga bansa Rom enggau Bansa Judah.

³⁰Tang jemah ila enti dua iti bansa nya deka nambah tauka ngurangka utai dia, sida tau ngereja nya enti iya pulai ke pemanah. Utai ti manah baru diubah tetap diterima.

³¹Pasal pengawa ti jai dikereja Raja Demetrius ngagai bansa Judah, kami udah nulis ngagai iya, ‘Nama kebuah nuan merinsaka bansa Judah, kaban kami ti setanah enggau kami?

³²Enti sida bedawa sekali da ngagai kami nusi penyai ulah kita enggau sida, kami deka nanahka sida lalu nyerang kita di darat tauka di tasik.’ ”