Read Iban 1 Makabi 9 Bible Online

1 Makabi 9 - Iban bible

1 Makabi 9

¹Raja Demetrius ninga Nikanor enggau bala soldadu iya udah dibunuh. Nya alai, raja sekali da ngirum Bakhides enggau Alkimus ke menua Judea begulai enggau soldadu Siria.

²Sida nengah jalai nuju nengeri Gilgal, lalu ngerampas nengeri Maisalot ba bagi menua Arbela sereta munuh mayuh orang.

³Dalam bulan satu taun 152 sida belangkau semak Jerusalem.

⁴Ari nya sida nuju ke Berea enggau 20,000 iku soldadu bejalai kaki enggau 2,000 iku raban soldadu ngena kuda.

⁵Benung nya, Judas belangkau di Elasa enggau 3,000 iku soldadu ti dipilih iya.

⁶Tang lebuh sida meda raban munsuh nya mayuh amat, sida udu takut. Mayuh soldadu orang Judah ngerarika diri ari endur belangkau, semina 800 aja soldadu ke agi tinggal.

⁷Judas meda bala soldadu iya nyau majak mimit, lalu sida nyau deka betempuh da. Iya irau ati laban enda chukup awak ngempuruka sida nya baru.

⁸Taja iya irau, iya bejaku enggau nembiak iya ke agi bisi dia, “Aram kitai besedia ngelaban munsuh. Nyangka kitai agi ulih ngalahka sida.”

⁹Tang bala nembiak Judas nguji nagang iya. Ku sida, “Nadai jalai kitai ulih menang! Manah agi kitai nyurutka diri ngambika kitai enda dibunuh. Ila kitai datai baru enggau bala menyadi kitai ngelaban munsuh. Kitai kelalu mimit tubuh diatu.”

¹⁰Ku Judas nyaut, “Anang ngasuh aku nyurutka diri lalu rari ari beperang. Enti maya iya udah datai, awakka kitai parai enggau gagah berani ketegal bala menyadi kitai. Tang anang ngamahka nama kitai.”

¹¹Sodadu Siria lalu mansang ngagai soldadu Judah. Raban soldadu bekuda sida dibagi dua. Sida ke ngena panah enggau pawang dulu ari raban besai bala soldadu, lalu baka nya mega raban penyerang ke gagah berani magang.

¹²Bakhides empu ba endur muak ari kanan. Raban soldadu mansang enggau bunyi terumpit ari dua piak. Bala soldadu Judas mega nyepu terumpit.

¹³Tanah berenyang laban bunyi dua iti raban nya betempuh. Sida betempuh ari pagi sampai malam.

¹⁴Judas meda Bakhides enggau raban ti pemadu kering muak ari kanan. Nya alai iya enggau bala nembiak iya ke pemadu berani

¹⁵nyerang baris kanan soldadu Siria lalu ngagai sida sampai ke bukit Asdot.

¹⁶Tang lebuh baris kiba raban soldadu Siria meda baris kanan sida diserang sampai nyurutka diri, sida lalu nguing sereta nyerang Judas enggau nembiak iya ari belakang.

¹⁷Sida bendar amat betempuh, lalu mayuh soldadu ari dua iti raban ke betempuh nya parai.

¹⁸Ujung iya Judas parai lalu bala nembiak iya ngerarika diri.

¹⁹Bangkai Judas diambi menyadi iya Jonathan enggau Simon lalu dikuburka ba kubur aki ini sida di Modein.

²⁰Serata menua Israel nyabakka iya. Lama sida ngulitka iya. Ku sida, “

²¹“Enda patut parai orang ke ulih nyelamatka bansa Israel!”

²²Jerita bukai pasal Judas baka perang iya, pemerani iya enggau budi iya ti besai enda ulih dituliska ditu magang laban kelalu mayuh.

²³Udah Judas parai, orang Judah ke enda pedulika adat ayan baru ba sebelah menua Israel lalu semua orang ke jai mega pulai baru.

²⁴Lebuh maya nya, menua nya kena tinggang penusah lapar pungkang, ketegal nya rayat lalu belabuh setanah enggau orang ke jai.

²⁵Bakhides empu milih lalu ngangkatka sekeda orang Judah ke ngelaban bansa diri empu, nyadi tuai ba menua nya.

²⁶Bala pangan Judas dibai ngagai Bakhides. Iya ngukum lalu ngemalu sida.

²⁷Maya nya bansa Israel tusah amat. Sida enda kala ngasaika penusah baka nya kenyau ari bala nabi nadai agi enggau sida.

²⁸Udah nya bala pangan Judah begempuru lalu bejaku enggau Jonathan,

²⁹“Udah Judas menyadi nuan parai, nadai siku orang nguluka kitai ngelaban bala munsuh kitai enggau Bakhides sereta semua orang ke ngelaban bansa kitai.

³⁰Nya alai, sehari tu kami milih nuan nganti Judas nyadi tuai kami lalu nguluka kami beperang.”

³¹Sehari nya mega Jonathan nerima pengawa nyadi tuai nganti menyadi iya.

³²Lebuh Bakhides ninga rita Jonathan nyadi tuai, iya ngiga jalai deka munuh Jonathan.

³³Tuju ati Bakhides ditemu, nya alai Jonathan enggau menyadi iya Simon ngerarika diri ke menua puang Tekoa lalu belangkau semak telaga Asfar. (

³⁴Bakhides ninga berita nya kena Hari Sabat, iya enggau semua soldadu iya ngelayang Sungai Jordan.)[10]

³⁵Joannes menyadi tuai Jonathan ngatur perengka sida ti mayuh amat. Iya dikirum ngagai kaban sida bansa Nabatai minta pemendar nyimpan semua perengka nya.

³⁶Tang Joannes diserang lalu ditangkap orang Jambri ari Madeba, lalu semua barang iya ditabanka orang.

³⁷Enda lama udah nya Jonathan seduai Simon ninga rita orang Jambri deka berami besai melah pinang. Sida deka bejalai bebala mayuh ngambi indu ari nengeri Nadabat. Indu nya anak siku orang Kanaan ke tebilang.

³⁸Jonathan seduai Simon deka bebalaska pemati Joannes menyadi tuai sida. Nya alai, seduai enggau nembiak seduai mansang ke bukit lalu belalai dia.

³⁹Sida beratika jalai lalu meda orang bejalai bebala mayuh mai mayuh barang. Pengantin lelaki, bala pangan iya enggau kaban belayan iya pansut deka betemu enggau pengantin indu. Sida mai mayuh senyata lalu diring orang main musik enggau betepapka gendang.

⁴⁰Orang Judah nyerang sida nya, lalu mayuh ari sida nya parai. Sekeda ari sida ngerarika diri ke bukit, lalu benung nya orang Judah ngerampas semua barang sida.

⁴¹Ketegal nya, pengerami melah pinang berubah nyadi hari ngulit, lalu lagu gaga nyadi lagu kena nyengaie orang parai.

⁴²Baka nya meh gaya Jonathan enggau Simon bebalaska pemarai menyadi tuai sida. Seduai lalu pulai ngagai endur ti bisi paya ba tebing Sungai Jordan.

⁴³Bakhides ninga berita nya mansang enggau siti raban soldadu ti besai kena Hari Sabat lalu datai ba tebing Sungai Jordan.

⁴⁴Jonathan bejaku enggau bala nembiak iya, “Diatu kitai mesti besedia lalu ngelaban sampai parai. Enda kala kitai tusah baka ke diatu.

⁴⁵Munsuh bisi di mua enggau dibelakang kitai. Ba sepiak tu Sungai Jordan, lalu ba sepiak nyin paya enggau babas repa. Kitai nadai jalai pansut.

⁴⁶Besembiang meh ngambika Tuhan nyelamatka kitai ari munsuh.”

⁴⁷Sida belabuh betempuh. Bakhides nyau deka kena bunuh Jonathan tang ulih silat iya.

⁴⁸Nya alai, Jonathan enggau bala nembiak iya engkechit ke dalam Sungai Jordan lalu nyemerai ke seberai. Tang munsuh enda ngelayang sungai ngagai sida.

⁴⁹Sehari nya kurang lebih 1,000 iku soldadu Bakhides parai.

⁵⁰Udah Bakhides pulai ke Jerusalem, iya lalu belabuh ngaga kuta di mayuh bengkah nengeri di Judea, iya nya Jeriko, Emaus, Bet-Horon, Betel, Timnat, Faraton enggau Tepon. Semua kuta nya ditegapka ngena mayuh dinding ti tinggi, pintu besai penama enggau sengkal penambit pintu.

⁵¹Di dalam semua kuta nya Bakhides ngengkah soldadu ngambika ngachau orang Israel.

⁵²Iya mega nambahka pengering mayuh nengeri di Bet-Sur enggau Geser enggau kuta di Jerusalem lalu ngengkah siti raban soldadu enggau pemakai di dalam nya.

⁵³Iya lalu ngambi bala anak orang ke tebilang di menua nya lalu nyimpan sida dalam kuta nya baka orang ke ditangkap.

⁵⁴Dalam bulan dua taun 153 Imam Besai Alkimus ngasuh ngerubuh dinding besai ba tengah laman Rumah Sembiang; ngena jalai nya iya deka ngemaduka pengawa ti diuluka bala nabi kelia. Tang pengawa ti ngerubuh ti baru dipunka nya,

⁵⁵enda tau enda diketu laban Alkimus diserang penyakit. Tubuh iya bajong lalu iya enda ulih muka mulut bejaku. Endah madahka sapa sida sebilik ti patut empu reta pan iya enda ulih.

⁵⁶Lalu maya nya mega iya parai enggau pemerinsa.

⁵⁷Lebuh Bakhides ninga berita Alkimus udah parai, iya pulai ngagai Raja Demetrius. Menua Judea dalam pemaik pengelama dua taun.

⁵⁸Udah nya semua orang Judah ke limpang ari Adat baum. Ku sida, “Peda Jonathan enggau nembiak iya diau lantang senang. Manah kitai madahka Bakhides ngambika iya nangkap semua sida dalam timpuh semalam aja.”

⁵⁹Nya alai, sida lalu mansang berunding enggau Bakhides.

⁶⁰Bakhides lalu datai enggau raban soldadu ti mayuh. Iya ngirum surat ti dipelalai ngagai semua orang ke setanah enggau iya di Judea ngambika sida nangkap Jonathan enggau semua orang ke nitihka iya. Tang sida enda mujur laban tuju ati sida ditemu orang.

⁶¹Jonathan enggau bala nembiak iya nangkap lima puluh iku orang Judah ke ngatur pengawa jai nya, lalu munuh semua sida.

⁶²Jonathan, Simon enggau semua raban sida lalu ngerarika diri ke Bet-Basi di menua puang. Semua rumah ti rusak ba nengeri nya digaga sida baru lalu dijaga enggau likun.

⁶³Lebuh Bakhides ninga berita nya, iya lalu ngempuruka semua soldadu iya, lalu ngerah semua orang nyukung iya di Judea.

⁶⁴Iya lalu mansang nyerang nengeri Bet-Basi di menua puang lalu ngaga panggau asur. Besari-sari iya nyerang nengeri nya ngena senyata digaga iya empu.

⁶⁵Tang Jonathan ninggalka menyadi tuai iya Simon di dalam nengeri, lalu iya empu enggau sekeda orang pansut ngagai menua pesisir.

⁶⁶Iya nyerang Odomer enggau kaban belayan iya, nyengkaum bansa Fasiron ke dalam langkau sida. Udah sida nya alah, sida setanah enggau Jonathan lalu sertai mansang nyerang Bakhides.

⁶⁷Benung nya, Simon enggau bala nembiak iya pansut lalu nunu semua panggau asur ti dikena munsuh nyerang sida.

⁶⁸Ba perang nya, Bakhides alah. Iya berasai geram amat laban serang ti diatur iya enda mujur.

⁶⁹Ketegal nya, iya ringat amat ngagai bala orang Judah ke enda nitihka Adat ke ngansak iya datai ba menua nya. Mayuh ari sida nya dibunuh iya.

⁷⁰Lebuh Jonathan ninga berita nya iya ngirumka seruan ngagai Bakhides mai iya berunding pasal pemaik lalu ngelepaska semua orang ke ditangkap.

⁷¹Bakhides setuju enggau penemu Jonathan, lalu ngereja utai ti dipinta iya. Iya mega besumpah enggai jai enggau Jonathan seumur idup iya.

⁷²Udah iya ngelepaska semua orang ari menua Judea ke ditangkap, Bakhides pulai ngagai menua iya lalu enda datai agi ngagai menua orang Judah.

⁷³Nya alai, ngetu meh perang di Israel. Jonathan diau di Mikhmas lalu belabuh merintah rayat. Orang Judah ke ngelaban Adat dipunaska iya ari Isra el.