Read Iban 2 Makabi 1 Bible Online

2 Makabi 1 - Iban bible

2 Makabi 1

¹“Ari orang Judah di Jerusalem enggau Judea nuju bala menyadi sida di Ejip, tabika kita!

²Awakka Allah Taala manah enggau kita lalu ngamatka sempekat ti digaga Iya enggau Abraham, Isak enggau Jakop, nembiak ti talukka Iya.

³Awakka kita diberi pengingin deka nyembah Iya lalu ngereja peneka Iya enggau pengabis ati.

⁴Awakka Iya meri kita penemu kena meretika Adat enggau semua pengasuh Iya. Awakka Iya meri kita pemaik enggau pengelantang,

⁵ningaka sembiang kita, ngampun penyalah kita lalu enda ninggalka kita lebuh dituntung penusah.

⁶Kami ditu benung besembiangka kita.

⁷Dalam taun 169, lebuh Raja Demetrius Kedua merintah Siria, kami nulis ngagai kita pasal pemerinsa enggau penusah ti ninggang kami pengelama betaun-taun tu ti udah. Maya nya Jason enggau sida ke nitihka iya ngelaban perintah di Tanah Kudus.

⁸Semua pintu Rumah Sembiang ditunu lalu orang ke enda salah dibunuh. Kami besembiang ngagai Tuhan lalu Iya nyaut semua sembiang kami. Kami meri piring jelu enggau piring gandum kena meri terima kasih ngagai Tuhan. Kami nungkun kelita di Rumah Sembiang lalu meri Iya roti ti kudus.

⁹Ketegal nya, kita patut ngintu Gawai Belangkau dalam bulan Kislew.” Ditulis dalam taun 188 Sebedau Kristus.

¹⁰“Ari orang Judah di Jerusalem enggau di Judea, Bala Tuai Kunsil enggau Judas, nuju semua orang Judah di Ejip, kelebih agi nuju Aristobulus ti pengajar Raja Ptolemeus enggau peturun bala imam ke diunsut minyak. Tabika nuan!

¹¹Kami meri terima kasih ngagai Allah Taala laban Iya udah nyelamatka kami ari penusah besai lebuh Iya nulung kami ngelaban raja.

¹²Allah Taala udah muru munsuh ari nengeri Jerusalem.

¹³Lebuh Raja Antiokus datai di Persia, soldadu iya dipeda mar dialahka. Tang sida dialahka dalam rumah endur nyembah petara indu ti dikumbai Nanaia ketegal bala imam ke nyembah petara indu nya mungkir.

¹⁴Raja Antiokus datai ngagai endur nya enggau sekeda pangan iya. Iya ngaga diri deka jadi enggau petara indu nya ngambika ulih ngambi mayuh reta dalam rumah petara nya, nyadika pemeri melah pinang.

¹⁵Bala imam ngayanka semua reta nya. Udah raja enggau bala pangan iya tama ke dalam rumah petara Nanaia, bala imam nutup pintu nya.

¹⁶Ari pintu ti dilalai ba sadau, sida nuku raja enggau bala pangan iya ngena batu sampai parai. Bangkai sida dipepat lalu pala sida ditikau ngagai orang di luar.”

¹⁷Puji meh Allah Taala kitai laban Iya udah ngukum semua orang ke jai nya. Puji meh Iya ketegal semua utai.

¹⁸Kena dua puluh lima haribulan Kislew, kami deka ngintu Pengerami Nyerahka Rumah Sembiang ngagai Iya baru. Kami ngasaika diri patut madah ngagai kita pekara tu ngambika kita mega ngintu Gawai Belangkau enggau Gawai Api. Gawai Api nya kena ngingatka utai ti udah dikereja Nehemiah lebuh iya nyuaka piring udah Rumah Sembiang enggau alta digaga baru.

¹⁹Pasal api nya, bisi jerita ti baka tu: Lebuh aki ini kitai dibai ngagai menua Persia, sekeda imam ke taluk belalai ngambi api ari alta, lalu ngelalaika iya dalam buntut siti telaga ti udah rangkai. Api nya dilalaika enggau likun amat sampaika endur nya nadai ditemu sebarang orang.

²⁰Betaun-taun udah nya, lebuh Tuhan setuju, raja Persia ngirumka Nehemiah pulai ke Jerusalem. Nehemiah lalu ngasuh peturun bala imam ke ngelalaika api suba ngiga api nya.

²¹Sida madah ngagai kami pasal sida ke nadai tetemuka api tang semina tetemuka utai baka minyak. Nehemiah ngasuh sida ngambi utai ti baka minyak nya lalu mai utai nya ngagai iya. Udah semua piring diengkah datas alta, iya ngasuh semua imam ngunsai utai ti baka minyak nya ngagai kayu enggau piring.

²²Enda lama udah pengawa nya dikereja, matahari pansut ari remang, lalu ngenyit api ti besai mau ngasuh semua orang alit ati magang.

²³Udah nya, benung piring nya dempa api, Imam Besai Jonathan besembiang lalu dititihka Nehemiah, bala imam enggau semua orang bukai ke bisi dia.

²⁴Baka tu munyi sembiang Nehemiah, ‘O Tuhan Allah Taala, Pengaga semua utai, Nuan ngasuh alit ati sereta kering, lurus sereta penuh pengasih. Semina Nuan aja Raja, semina Nuan aja manah,

²⁵semina Nuan aja lurus sereta manah. Nuan Pemadu Bekuasa sereta Meruan belama, nyelamatka Israel ari semua penusah. Nuan milih aki ini kami nyadi orang ke enggi Nuan.

²⁶Terima meh piring tu ti disua kami ketegal semua orang Israel. Lindung meh nembiak ke dipilih Nuan lalu kuduska kami.

²⁷Lepaska bansa kami ke nyadi ulun di semua menua bansa bukai lalu gempuruka baru bansa kami ke pambar. Kasihka bansa kami ke dikelese sereta diperinsa ngambika bansa bukai nemu Nuan Allah Taala kami.

²⁸Ukum meh semua bansa bukai ke sombong sereta jai ngenyakka kami.

²⁹Asuh nembiak Nuan diau di menua Nuan ti kudus baka ti dipadahka Moses.’

³⁰Udah nya bala imam nanyi lagu puji.

³¹Udah piring abis ditunu, Nehemiah ngasuh laluh utai ti baka minyak nya ditanjah ke atas sekeda batu besai.

³²Maya nya mega api lalu mau baru tang api ti mau nya padam laban api ari alta.

³³Berita nya ngelekai ngagai semua endur, lalu raja Persia dipadahka pasal utai ti baka minyak ditemu ba endur bala imam ngelalaika api alta sebedau sida dibai ngagai endur sida dibuai. Berita pasal Nehemiah enggau bala pangan iya ke nunu piring ba alta ngena utai ti baka minyak nya, ditusi ngagai raja mega.

³⁴Udah pekara nya dipansik, raja ngasuh endur nya dipagar lalu netapka iya endur ti kudus.

³⁵Endur nya diasuh raja jaga sekeda orang, lalu iya meri sida sebagi ari untung ti diulih ari endur nya.

³⁶Nehemiah enggau bala pangan iya meri utai ti baka minyak nya nama ‘naftar’, reti nya pengudus tang mayuh orang ngumbai iya ‘naftai’.