Read Iban 2 Makabi 10 Bible Online

2 Makabi 10 - Iban bible

2 Makabi 10

¹Betuaika Tuhan, Judas Makabi enggau bala orang ke nitihka iya ngambi pulai baru Rumah Sembiang enggau nengeri Jerusalem.

²Sida ngerubuh semua alta ti digaga orang bansa bukai ba endur orang mayuh begempuru, lalu ngerusak semua endur alai nyembah petara bukai.

³Udah nya sida nguduska Rumah Sembiang lalu nirika siti alta ti baru. Sida ngidupka api ngena batu lalu nyuaka piring keterubah kenyau ari dua taun ti udah. Lalu sida ngereja baru pengawa nunu menyan, nungkun kelita lalu ngengkah roti ti kudus ba endur nya.

⁴Udah sida ngereja semua utai nya, sida nyerugang lalu besembiang ngagai Tuhan ngambika sida enda agi ditinggang penusah baka ti udah. Sida minta Tuhan ngukum sida enggau ati nelap enti sida bedosa baru, tang anang meh nyerahka sida ngagai bansa bukai ke enda beradat sereta rindu nyumpah sida.

⁵Kena dua puluh lima haribulan Kislew Rumah Sembiang dikuduska baru, sabaka hari enggau bulan lebuh Rumah nya dikamahka orang bansa bukai.

⁶Pengerami pengelama lapan hari baka Gawai Belangkau lalu nyadi. Sida ngingatka diri bejalai ba sebelah bukit lalu diau dalam gua baka jelu siga lebuh sida ngintu Gawai Belangkau dulu ari nya suba.

⁷Tang diatu sida bejalai bebala mayuh bepegaika dan chemara enggau mayuh dan kayu enggau daun engkerama sereta nanyi lagu muji Tuhan ke udah nguduska Rumah Iya baru.

⁸Sida sama bela setuju hari nya dirami tiap taun ulih semua bansa Judah.

⁹Baka nya meh utai ti nyadi ba pengujung pengidup Raja Antiokus Epifanes.

¹⁰Diatu kami nusi pasal Raja Antiokus Eupator anak Raja Antiokus Epifanes ke jai nya, lalu kami ngelansa penusah ti nyadi bepun ari semua perang diatur iya.

¹¹Udah iya nyadi raja, Raja Antiokus Eupator nuduhka siku orang benama Lisias nyadi menteri besai sereta nyadi gabenor Siria Besai enggau Fenisia.

¹²Iya nganti Ptolemeus Makron, gabenor keterubah ke nguji deka manah enggau orang Judah. Ptolemeus deka bebaik enggau orang Judah laban iya meda sida balat amat udah diperinsa.

¹³Sekeda pangan Raja Eupator nusi ngagai iya utai ti deka dikereja Ptolemeus. Ptolemeus ninggalka pulau Spirus ti diasuh Raja Pilometor ari menua Ejip jaga iya, lalu setanah enggau Raja Antiokus Epifanes. Ketegal nya iya suah dikumbai mudi raja. Ujung iya, Ptolemeus munuh diri ngirup racun laban orang enda bebasaka iya taja iya megai pengawa nya.

¹⁴Udah Gorgias nyadi gabenor Siria Besai enggau Fenisia, iya ngaga siti raban soldadu ke digaji iya, lalu lebuh bisi peluang, iya beperang ngelaban bansa Judah.

¹⁵Kelimpah ari nya orang Idumea mega nguasa mayuh kuta ti beguna lalu majak ngachau orang Judah. Sida nerima orang ke rari ari Jerusalem lalu terus nguji deka beperang.

¹⁶Ketegal nya, udah besembiang minta tulung Tuhan, Judas Makabi enggau bala orang ke nitihka iya nyerang semua kuta orang Idumea.

¹⁷Sida nyerang balat amat sampai orang ke nyaga dinding nyurutka diri. Sida ngerampas semua kuta dia, lalu munuh sebarang orang ke ditemu sida. Sida munuh enda kurang ari 20,000 iku munsuh.

¹⁸Tang kira 9,000 iku munsuh rari ngagai dua iti kuta ti kering ti bisi semua utai ti diguna kena ngelaban orang ke deka nyerang.

¹⁹Judas empu mesti mansang ngagai mayuh endur bukai ti begunaka tulung iya. Nya alai, iya ninggalka Simon, Joseph, Sakius enggau nembiak iya. Raban soldadu ke tinggal dia umbas iya pemayuh enti dikena neruska perang.

²⁰Tang sekeda nembiak Simon amu, lalu lebuh sida nerima suap pemayuh 200 kilogram pirak, sida ngelakka sekeda munsuh ngerarika diri ari semua kuta nya.

²¹Lebuh Judas ninga berita nya, iya ngempuruka bala tuai raban soldadu, lalu ngumbai sida nya nyual menyadi diri empu laban ngelepaska munsuh ke nyerang sida.

²²Judas ngasuh semua sida ke enda lurus nya dibunuh magang, lalu udah nya iya terus ngerampas dua iti kuta nya.

²³Judas ke selalu menang lebuh beperang munuh lebih ari 20,000 iku munsuh dalam kuta dua iti nya.

²⁴Timoti ke kala alah laban orang Judah, ngaga siti raban soldadu ti besai amat. Sida nya bala soldadu ke digaji. Iya mega ngempuruka mayuh soldadu bekuda ari Asia, lalu mansang deka ngerampas Judea ngena senyata.

²⁵Lebuh bala munsuh nyau semak, Judas enggau raban soldadu iya besembiang ngagai Allah Taala. Sida ngena gari guni, lalu naburka abus atas pala sida.

²⁶Sida nyerugang nunga alta lalu minta Allah Taala kasihka sida ngelaban semua munsuh baka ti udah disemaya Iya dalam Adat Iya.

²⁷Udah tembu besembiang, sida angkat mai senyata mansang jauh agi ari Jerusalem, lalu ngetu lebuh nyau semak munsuh.

²⁸Lebuh baru kerebak tawas, raban soldadu dua iti nya lalu beperang. Bala soldadu bansa Judah nyerahka pemerani enggau pengandal sida ngagai Tuhan ngambika ulih menang, tang bala munsuh ngelakka diri empu dikuasa pengeringat lebuh beperang.

²⁹Lebuh sida nyau balat sebalat betempuh, dia munsuh meda lima iku lelaki ke sigat gamal nurun ari langit. Sida nepan kuda ti ngena tanchang mas. Lelaki lima iku nya nguluka raban soldadu bansa Judah,

³⁰lalu ngelingi Judas laban deka nyaga iya ngena senyata sida. Benung nya sida nimbak munsuh ngena panah enggau kilat baka leka ujan. Munsuh nyau temati kutu, lalu nadai daya sampaika sida nyau pambar lebuh ke charut nya.

³¹Sida munuh raban soldadu ke bejalai kaki 20,500 iku, sida ke nepan kuda 600 iku.

³²Tang Timoti empu rari ke Geser, siti kuta ti tegap amat. Menyadi iya benama Kaireas, nguasa kuta nya.

³³Raban soldadu Judas enggau pengabis ati ngelingi kuta nya pengelama empat hari.

³⁴Orang dalam kuta nya andalka endur nya tegap, lalu majak inggar nyumpah Allah Taala enggau orang Judah ngena jaku kasar.

³⁵Tumu pagi hari kelima, dua puluh iku nembiak Judas ke ringat amat laban jaku sumpah, enggau ati berani niki dinding kuta nya, lalu ngamuk ngena pedang baka jelu mangah munuh sebarang orang ke ditemu sida.

³⁶Sekeda sida niki dinding muak ari endur bukai, lalu nyerang orang ke bisi dalam nya. Sida nunu mayuh menara, lalu nunu idup-idup orang ke nyumpah Allah Taala. Sekeda sida mecahka pintu besai penama, lalu nembiak Judas bukai ulih tama ngerampas nengeri nya.

³⁷Timoti belalai dalam siti telaga ti rangkai, tang iya dibunuh begulai enggau menyadi iya Kaireas enggau siku orang benama Apolofanes.

³⁸Udah sida tembu beperang, orang Judah berami nanyi lagu puji enggau lagu terima kasih ke Tuhan laban Iya udah nunjukka pemanah Iya ti besai, lalu ngasuh sida mena ng.