Read Iban 2 Makabi 11 Bible Online

2 Makabi 11 - Iban bible

2 Makabi 11

¹Enda lama udah Timoti alah, Lisias ke nyadi pengibun raja sereta kaban belayan raja, ke lalu nyadi menteri besai, ninga utai ti nyadi. Iya ringat amat,

²lalu ngerah kira 80,000 iku raban soldadu bejalai kaki enggau semua raban soldadu ke ngena kuda ngelaban orang Judah ngambika Jerusalem nyadi siti nengeri endur bansa Gerika diau.

³Iya mega bisi tuju deka ngambi chukai ari Rumah Sembiang, baka ngambi chukai ari rumah sembiang bansa bukai, lalu ngelilung pengawa nyadi Imam Besai ninting taun.

⁴Lisias puas amat ati enggau raban soldadu perang iya, laban iya bisi bepuluh ribu soldadu bejalai kaki, beribu-ribu iku raban soldadu nepan kuda enggau lapan puluh iku gajah. Ketegal nya, Lisias nadai sekali-kali ngira kuasa Allah Taala.

⁵Iya tama ke Judea lalu nyerang kuta Bet-Sur, kira dua puluh lima kilometer di selatan Jerusalem.

⁶Lebuh Judas enggau nembiak iya ninga berita Lisias benung ngelingi mayuh kuta sida, sida enggau semua rayat nyabak magang lalu minta Tuhan ngirumka melikat ke manah nyelamatka Israel.

⁷Judas meh ke dulu nyingkau senyata mai sida bukai nitihka iya berantuka nyawa nulung bansa sida. Enggau ati ransing sida sertai angkat.

⁸Lebuh sida agi semak Jerusalem, sida meda orang siku ngena kuda nguluka sida. Baju iya burak lalu iya miauka senyata digaga ari mas.

⁹Sida lalu sertai meri terima kasih ngagai Allah Taala ke udah kasihka sida. Iya ngeringka ati sida sampaika sida ukai semina sanggup nyerang mensia, tang sanggup mega nyerang jelu manggah enggau dinding besi.

¹⁰Nya alai sida lalu mansang besedia deka beperang diring iya ke dikirum ari serega laban Tuhan udah kasihka sida.

¹¹Baka singa sida nyerang sereta munuh 11,000 iku soldadu munsuh bejalai kaki enggau 1,600 iku soldadu munsuh ke nepan kuda, lalu sida bukai mesti rari magang.

¹²Mayuh ari sida ke rari nya bakal sereta lenyau senyata. Lisias empu ulih ngelepaska diri laban iya rari baka orang ke takut.

¹³Lisias ukai orang ke beli. Lebuh iya berundingka kebuah iya alah, dia iya nemu orang Judah enda ulih dialahka laban Allah Taala ke bekuasa setanah enggau sida. Nya alai, iya ngirum pesan ngagai orang Judah

¹⁴mai sida bebaik ngena sempekat ti lurus. Iya mega besemaya deka mujuk raja ngambi iya bekaban enggau sida.

¹⁵Judas Makabi ngira pengelantang rayat, nya alai iya setuju enggau semua utai ti diperambuka Lisias laban raja mega udah setuju enggau semua peminta ti ditulis lalu dikenataika Judas ngagai Lisias.

¹⁶Baka tu munyi surat Lisias ngagai orang Judah:

¹⁷Orang ke dikirum kita, iya nya, Joannes enggau Absalom udah nyerahka surat ti disain kita, lalu minta aku nyaut surat nya.

¹⁸Aku udah ngenataika ngagai raja utai ti patut ditemu iya, lalu iya udah setuju enggau utai ti patut dipejalaika.

¹⁹Enti kita tetap taluk ngagai perintah, aku enggau naka ulih deka meri utai ti manah ngagai kita jemah ila.

²⁰Aku udah ngasuh bala pengari aku enggau bala pengari kita berundingka semua pekara tu silik agi enggau kita.

²¹Arapka semua kita lantang senang! Ditulis kena duapuluh empat haribulan Seus Korintius taun 148.

²²Baka tu munyi surat raja nuju Lisias: “Ari Raja Antiokus nuju Lisias ke dipebasa, tabika nuan!

²³Diatu apai aku udah parai, lalu aku ngarapka semua rayat ba perintah tu ulih ngereja semua pengawa sida nadai dikachau.

²⁴Aku nemu orang Judah enggai nitihka chara pengidup orang Gerika baka ti dikedeka apai aku. Sida minta pemendar nitihka adat sida empu laban sida rinduka chara pengidup ti baka nya.

²⁵Aku deka meda bansa orang nya enda dikachau. Nya alai, aku meri pemutus awakka Rumah Sembiang dipulaika ngagai sida, lalu sida tau idup nitihka adat aki ini sida.

²⁶Kirumka orang ngagai sida, lalu bebaik meh enggau sida ngambika sida lantang nemu utai ti dikedeka aku, lalu ngatur semua pekara sida empu enggau ati gaga.”

²⁷Baka tu munyi surat raja nuju bansa Judah: “Ari Raja Antiokus nuju bala tuai bansa Judah enggau semua rayat Judah, tabika kita!

²⁸Aku ngarapka kita semua gerai nyamai baka aku ditu.

²⁹Menelaus madah ngagai aku pasal kita deka pulai ngagai menua diri, lalu ngaduka semua pekara kita.

³⁰Nya alai, sida ke deka pulai sebedau tiga puluh haribulan Ksantikus dikemendarka aku.

³¹Kita tau nitihka adat kita empu pasal pemakai enggau adat bukai baka suba. Nadai siku orang deka diukum ketegal penyalah ti enda disengaja.

³²Aku ngirumka Menelaus ngambi ngenyamaika runding kita.

³³Selamat gerai nyamai! Lima belas haribulan Ksantikus taun 148.”

³⁴Orang Roma mega ngirumka surat ngagai orang Judah. Baka tu munyi surat nya: “Ari Kwintus Memius enggau Titus Manius ke dikirum orang Roma ngagai rayat Judah, tabika kita!

³⁵Kami mega setuju enggau utai ti diberi ke kita ti disetujuka Lisias, kaban belayan raja.

³⁶Diatu kami benung ba rantau jalai mansang ke nengeri Antiokia. Kami nguji enggau naka ulih bejakoka kita ba mua raja. Nya alai, peratika semua pekara ti dipansutka Lisias ngagai raja, lalu kirumka pengari kita enggau jampat

³⁷ngambika kami nemu pemutus runding kita.

³⁸Selamat gerai nyamai! Lima belas haribulan Ksantikus taun 1 48.”