Read Iban 2 Makabi 12 Bible Online

2 Makabi 12 - Iban bible

2 Makabi 12

¹Udah orang Judah ngaga sempekat bebaik enggau orang Siria, Lisias mulaika diri ngagai raja, lalu orang Judah betanam betupi baka selama.

²Tang sekeda orang ke bekuasa di menua nya, Timoti enggau Apolonius anak Genaius, Hieronimus enggau Demofon sereta enggau Nikanor tuai raban soldadu Siprus enggai ngelakka orang Judah idup lantang senang.

³Lebuh maya nya orang ke diau di Jopa ngereja penyai ngagai orang Judah di nengeri nya. Sida ngaga diri manah lalu ngangauka semua orang Judah enggau ruang bilik sida belayar ngena kapal ti udah disediaka sida.

⁴Laban pekara nya udah disetuju semua orang ke diau di nengeri nya, orang Judah nerima kangau nya enggau ati manah ketegal deka bebaik, lalu mimit pen sida nadai nyangka orang deka jai enggau sida. Tang lebuh sida datai di tasik, orang Jopa lalu ngelemaska semua orang Judah. Penyampau sida enda kurang ari dua ratus iku.

⁵Lebuh Judas baru udah ninga berita orang jai amat enggau bansa sida, iya lalu madahka bala nembiak iya.

⁶Sida besembiang ngagai Allah Taala, akim ke lurus, lalu mansang ngelaban orang ke munuh bala sida. Lebuh malam hari sida nunu penyangkai kapal enggau penyangkai perau, lalu munuh semua orang ke ditemu sida belalai dia.

⁷Laban semua pintu besai nengeri dikunchi, Judas lalu nyurutka diri. Tang iya besemaya deka datai baru, lalu munaska semua orang ke diau di nengeri nya.

⁸Judas ninga pasal orang ke diau di nengeri Jamnia ke mega deka munuh orang Judah di nengeri nya.

⁹Nya alai, iya nyerang nengeri nya lebuh malam hari. Penyangkai enggau semua kapal ti bisi dia ditunu iya. Penampak api dipeda ari Jerusalem ti lima puluh kilometer jauh ari nya.

¹⁰Lebuh Judas enggau bala nembiak iya udah ngejangka Jamnia penyauh dua kilometer mansang ngelaban Timoti, sida diserang bala soldadu Arab ke enda kurang ari 5,000 iku raban soldadu bejalai kaki enggau 500 iku raban soldadu ke ngena kuda.

¹¹Sida balat amat betempuh tang bala nembiak Judas ke ditulung Allah Taala ulih ngalahka orang Arab nya ke diau di padang pasir. Nya alai, orang Arab ke diau dia, minta diri bebaik enggau orang Judah. Sida besemaya deka meri jelu tupi, lalu deka nulung orang Judah sebarang maya sida dipinta nulung.

¹²Ba penemu Judas, kaul sida enggau orang nya deka beguna dalam mayuh pekara. Nya alai iya setuju bebaik enggau sida. Udah nya orang Arab pulai ngagai langkau kain sida.

¹³Judas mega nyerang nengeri Kaspin ti dikelinggi dinding lalu pengelikun iya tegap amat. Orang ke diau dia ari pupu bansa bukai.

¹⁴Sida andalka penegap semua dinding nengeri nya sereta andalka barang pemakai ke bisi dia. Nya alai, sida ngeleseka Judas enggau bala iya, nyebut jai ngagai sida, nyumpah Allah Taala lalu enggau nyawa inggar nyebut jaku kamah.

¹⁵Tang orang Judah besembiang ngagai Tuhan Ke Pemadu Besai, Iya ke bekuasa atas semua utai di bap langit, ke enda ngena kayu penikau enggau panggau ngerubuh semua dinding nengeri Jeriko, rambau Josua suba. Udah nya sida balat amat nyerang munsuh ke ngenanka dinding nya.

¹⁶Ulih peneka Allah Taala, nengeri nya dirampas sida. Sida munuh mayuh orang sampaika siti danau ba endur nya pemesai iya setengah kilometer, baka ke penuh laban darah.

¹⁷Ari nengeri Kaspin, Judas enggau bala nembiak iya bejalai kira seratus lima puluh kilometer ke Karaks, endur orang Judah ke dikumbai Tubian diau

¹⁸Sida nadai tetemuka Timoti ba pelilih menua nya laban iya udah ngejangka endur nya nadai utai ulih. Tang iya ninggalka raban soldadu ke kering ba siti kuta.

¹⁹Dua iku tuai perang raban soldadu Judas benama Dositeus enggau Sosipater nyerang kuta nya lalu ngalahka semua soldadu lebih ari 10,000 iku.

²⁰Udah nya Judas magi soldadu iya ngagai mayuh raban lalu nuduhka Dositeus seduai Sosipater nyadi tuai ba siti-siti raban. Udah nya iya mansang ngelaban Timoti ke bisi 120,000 iku raban soldadu ke bejalai kaki enggau 2,500 iku raban soldadu ke ngena kuda.

²¹Lebuh Timoti ninga Judas nyau semak, iya ngirumka bala orang indu, bala anak mit enggau semua barang iya ke nengeri Karnaim. Nengeri nya mar dialah, endah mansang semak nengeri nya mega mar laban jalai tunga kia sempit amat.

²²Tang lebuh raban Judas ti keterubah ayan, bala soldadu munsuh gegetar takut laban sida meda siti genera ari Allah Taala ke meda semua utai. Sida charut rari pambar enda temu tunga endur sampaika mayuh ari sida nyau telih laban ujung pedang pangan diri.

²³Judas enggau bala nembiak iya bendar ngagai sida, lalu munuh abis nadai 30,000 iku munsuh.

²⁴Timoti empu ditangkap raban soldadu Dositeus enggau Sosipater. Tang Timoti nemu nipu, madahka diri bisi nangkap kaban belayan orang Judah Sida ke ditangkap iya deka dibunuh enti Timoti ditinggang sebarang penusah.

²⁵Laban Timoti ngaga jamin ngena sumpah deka mulaika kaban belayan sida enggau selamat, nya alai sida ngelepaska iya.

²⁶Udah nya Judas nyerang nengeri Karnaim enggau rumah sembiang petara indu Atergatis lalu munuh 25,000 iku orang.

²⁷Udah Judas ngalahka munsuh, iya nyerang Efron, siti nengeri ti bekuta, endur Lisias enggau orang mayuh bengkah bansa diau. Bala nembiak ke kering besedia ba mua dinding nengeri lalu ngelaban enggau ati berani, lalu benung nya mayuh perengka perang enggau senyata disimpan dalam nengeri nya.

²⁸Tang orang Judah besembiang minta tulung Tuhan ke ngena kuasa Iya ngalahka pengering munsuh. Sida ngerampas nengeri nya lalu munuh lebih kurang 25,000 iku munsuh.

²⁹Ari nya sida mansang ngagai nengeri Skitopolis, seratus dua puluh kilometer tunga ke utara Jerusalem.

³⁰Orang Judah ke diau dia madah ngagai Judas pasal orang ba nengeri nya manah amat enggau sida, kelebih agi maya sida bisi penusah.

³¹Nya alai Judas enggau bala nembiak iya meri terima kasih ngagai orang ke diau di nengeri nya. Iya meransang sida ngambika sida manah belama enggau orang Judah. Udah nya sida angkat ke Jerusalem lalu datai dia lebuh Gawai Ngetau nyau deka belabuh.

³²Udah tembu Gawai Ngetau ti dikumbai orang Gerika Hari Besai Pentakosta, Judas enggau bala nembiak iya nyerang Gorgias, tuai perang Idumea.

³³Gorgias ngelaban sida enggau 3,000 iku raban soldadu bejalai kaki enggau 400 iku raban soldadu ke nepan kuda.

³⁴Sekeda orang Judah parai lebuh beperang maya nya.

³⁵Dositeus, soldadu ke nepan kuda ke gagah berani, nembiak Bakenor, nangkap Gorgias ba baju panjai, lalu ngirit iya enggau pengambis pengering ngambika ulih nangkap orang jai nya idup-idup. Tang ngenyit siku soldadu ari raban Trakia ke ngena kuda nyerang Dositeus sereta netak jari iya sampai putus; ketegal nya Gorgias ulih rari ke nengeri Marisa.

³⁶Maya nya bala soldadu orang Judah ke betuaika Esdris udah kelalu lama beperang, lalu sida berasai lelak. Nya alai Judas besembiang ngambika Tuhan nunjukka Diri setanah enggau sida lalu nguluka raban soldadu sida.

³⁷Udah nya benung Judas nanyi lagu puji ngena jaku sida ngambi nyadi peransang beperang, orang Judah ngenyit nyerang raban soldadu Gorgias sampaika sida rari.

³⁸Udah perang nya Judas mai bala nembiak iya ke nengeri Adulam. Laban Hari Sabat nyau semak, sida nuchi diri nitihka adat orang Judah, lalu ngintu Hari Sabat.

³⁹Ba hari nangkanka nya, laban nyau suntuk awak, Judas enggau nembiak Iya mansang ngumpul bangkai orang ti parai dalam perang ngambika dikubur ba pendam kaban belayan sida.

⁴⁰Tang ba tiap bangkai ti gumpul sida, sida tetemuka jimat patung petara nengeri Jamnia ti dilalaika dia. Nya alai, terang bendar ba semua orang, nya meh kebuah sida nya parai.

⁴¹Ketegal nya sida muji pengawa Tuhan, akim lurus ke ngayanka utai ti dilalai.

⁴²Sida mega minta Tuhan ngampun semua dosa sida. Nya alai, Judas ke manah nya, ngajar rayat ngenyauhka diri ari dosa laban sida empu udah meda utai ti nyadi ba orang ke bedosa nya.

⁴³Udah nya iya ngumpul tulung ari bala nembiak iya, lalu penyampau duit ti digumpul nya lima ratus kepin duit pirak. Duit nya dikirum ke Jerusalem kena nyediaka piring kena ngampun dosa. Judas ngereja pengawa ti manah nya laban iya arapka pengangkat orang ari pemarai.

⁴⁴Enti iya enda arapka orang ke udah parai ulih angkat idup baru, beli sereta nadai guna meh iya besembiangka sida.

⁴⁵Judas arap amat ke orang ke talukka Tuhan deka nerima berekat besai, lalu runding iya tuchi sereta manah. Nya alai, iya deka meri piring kena ngampun dosa ngambi semua orang ke udah parai dilepaska ari dosa sida.