Read Iban 2 Makabi 13 Bible Online

2 Makabi 13 - Iban bible

2 Makabi 13

¹Dalam taun 149 Judas Makabi enggau orang ke nitihka iya ninga berita pasal Raja Antiokus Eupator benung nuju ke menua Judea begulai enggau siti raban soldadu ti besai.

²Lisias, pengari raja ke lalu nyadi menteri besai bisi dalam raban nya mega. Sida bisi bala soldadu Gerika penyampau 110,000 iku bejalai kaki, 5,300 iku raban ke nepan kuda, 22 iku gajah enggau 300 iti kereta kuda ti disingkap enggau pisau tajam ba roda iya.

³Menelaus setanah enggau sida lalu berunding enggau Raja Antiokus, ukai laban iya ibuhka menua diri tang laban iya ngarapka diri dituduh nyadi Imam Besai.

⁴Tang Allah Taala, Raja atas semua raja ngasuh Raja Antiokus ringat ngagai Menelaus. Lisias mantaika mayuh penerang tanda orang ke jai nya pun semua pengachau. Ketegal nya Antiokus ngasuh orang mai Menelaus ke nengeri Berea lalu dibunuh nitihka atur ba endur nya.

⁵Di nengeri nya bisi siti menara ti tinggi kira 25 meter. Langkau wan nya penuh laban abus. Dalam nya bisi siti panggau ti singgit tunga ngagai abus.

⁶Orang ke udah ngelaban adat ba endur orang nyembah petara tauka ngereja penyai besai, diangkat ke atas menara nya, lalu dibuai ke dalam abus sampai parai.

⁷Menelaus ke jai nya diukum bunuh ngena chara nya, lalu enda dikuburka.

⁸Iya endang patut nerima ukum baka nya laban iya suah bepenyalah ngamahka abus ti kudus enggau api alta di Rumah Sembiang. Diatu iya empu parai dalam abus.

⁹Enggau ati ti sumbung amat, Raja Antiokus terus mansang deka merinsa orang Judah balat agi ari apai iya suba.

¹⁰Lebuh Judas ninga berita nya, iya minta rayat besembiang ngagai Tuhan siang malam laban sida deka ditinggang penusah lenyau Adat, menua diri empu enggau Rumah Sembiang ti kudus. Sida begunaka tulung Tuhan lebih agi ti udah ngambika Iya enda ngelakka nembiak Iya ke baru udah lepas, diperinsa lalu diperintah baru ulih bansa bukai ke enda ngelala Iya.

¹²Semua rayat bepuasa pengelama tiga hari, lalu enda ngetu nyerugang sereta enggau sabak-sabak sida minta Tuhan ke penuh pengasih nulung sida. Udah nya Judas bejaku ngeringka ati rayat lalu ngasuh sida besedia.

¹³Udah nya Judas berunding kediri enggau bala tuai bansa Judah. Sida mutus ati deka angkat beperang enggau tulung ari Allah Taala sebedau raban soldadu raja tama ke menua Judea deka ngerampas nengeri Jerusalem.

¹⁴Judas nyerahka pemutus deka beperang ngagai Tuhan ke ngaga semua utai di bap langit. Iya meransang bala nembiak iya ngelaban enggau ati ti berani ngambi sanggup parai ketegal adat, Rumah Sembiang enggau nengeri Jerusalem, menua enggau jalai pengidup sida. Sida mansang lalu belangkau semak nengeri Modein.

¹⁵Judas meri jaku peransang tu ngagai bala nembiak iya: “Pemenang ari Allah Taala!” Malam nya Judas enggau seraban sida ke biak ke pemadu berani nyerang endur raja belangkau, lalu munuh 2,000 iku munsuh. Gajah ti pemadu besai enggau orang ke nyaga iya mega dibunuh sida.

¹⁶Ujung iya, semua munsuh ke belangkau dia begau takut. Lebuh hari baru kerebak tawas, Judas enggau bala nembiak iya ninggalka endur nya enggau pemenang. Utai nya ulih dikereja sida laban Tuhan nulung sereta nyaga.

¹⁸Udah Raja Antiokus ngasaika pemerani orang Judah, iya nguji ngiga jalai bukai ti manah agi, ngambi ulih nyerang sida ba sekeda endur di bukai.

¹⁹Raja mansang nyerang Bet-Sur, kuta bansa Judah ti tegap amat tang iya alah taja udah nyerang endur nya dua kali.

²⁰Judas ngirumka semua utai ti diguna ngagai orang ke ngenanka kuta di Bet-Sur.

²¹Tang siku ari bala nembiak Judas ke benama Rodokus nusi semua utai ti dipelalai ngagai munsuh. Tang taja pia, pengawa iya ditemu lalu iya ditangkap sereta dibunuh.

²²Raja nguji berunding baru enggau orang ke diau di Bet-Sur, lalu udah sida sama bela setuju, raja nyurutka raban soldadu iya. Udah nya, raja nyerang Judas tang iya alah baru.

²³Benung nya, raja ninga pasal Philip ke tinggal di Antiokia nyaga semua pekara menua angkat ngelaban iya. Raja nadai daya, nya alai iya lalu bebaik enggau orang Judah. Raja setuju enggau semua utai ti dipinta sida, lalu besumpah deka lurus enggau sida. Raja sampai nyuaka piring lalu meri tulung ti besai kena bebasaka Rumah Sembiang,

²⁴lalu iya nerima Judas Makabi enggau manah. Udah nya raja nuduhka Hegemonides nyadi gabenor pelilih menua ari nengeri Ptolemais sampai ngagai nengeri Gerar,

²⁵lalu raja empu angkat ke Ptolemais. Orang ke diau di nengeri nya ringat amat laban raja udah ngaga sempekat enggau orang Judah. Sida minta sempekat nya dikinsil.

²⁶Tang Lisias, pengari raja bejaku ba mua orang mayuh enggau naka ulih nyukung sempekat nya. Udah Lisias ngemaduka orang dia charut, iya lalu mai sida arapka utai ti disebut iya endang amat. Udah nya, Lisias pulai ke Antiokia. Nya meh cherita pasal raja ke nyerang, lalu nyurutka diri.