Read Iban 2 Makabi 15 Bible Online

2 Makabi 15 - Iban bible

2 Makabi 15

¹Nikanor ninga berita pasal Judas enggau bala nembiak iya bisi di pelilih menua Samaria. Nya alai iya mutuska runding deka nyerang sida kena Hari Sabat, hari orang Judah ngetu gawa, laban enti iya nyerang maya nya, iya ulih ngelaban, lalu nadai penusah tau ninggang iya.

²Orang Judah ke dipejal masuk raban soldadu Nikanor, enda ngasuh iya munuh ngena jalai ti kelalu jai sereta enda beradat, tang bebasaka Hari Sabat ti udah ditetapka Allah Taala ke meda semua utai.

³Lalu Nikanor, orang ke pemadu jai di dunya tu nanya, “Kati di serega amat bisi Iya ke bekuasa netapka Hari Sabat mesti dintu?”

⁴Ku orang Judah nyaut, “Bisi! Tuhan ke idup lalu bekuasa di serega ngasuh kami ngintu Hari Sabat.”

⁵Tang ku Nikanor bejaku, “Au, tang aku ke bekuasa di dunya, lalu aku minta kita angkat mai senyata sereta nitihka jaku raja.” Tang iya enda mujur bejalaika penyai ti diatur iya.

⁶Enggau sumbung Nikanor bejaku madahka diri deka nirika siti tugu pengingat kena ngingatka diri menang ngelaban Judas enggau bala nembiak iya.

⁷Tang Judas tetap arap enggau penuh pengandal ke Tuhan tetap deka nulung iya.

⁸Ketegal nya, Judas ngelalau bala nembiak iya ngambi sida enda takutka serang munsuh. Iya mai sida ingatka Allah Taala Ke Pemadu Bekuasa ke udah nulung ngelamatu, lalu sekali tu mega sida tetap andalka Iya deka ngasuh sida menang baru.

⁹Judas meri sida peransang lebuh iya macha ari bup Adat enggau bup bala Nabi, lalu mai sida ingatka semua pemenang perang sida ti udah.

¹⁰Udah Judas meransang sida, iya nangkan sida, pasal orang bansa bukai ke enda tau dikarap laban selalu ngelaban sumpah diri empu.

¹¹Baka nya meh Judas nyikap semua sida enggau senyata, ukai semina enggau terabai enggau sangkuh ti ngasuh sida ngasaika pengelikun, tang ngena semua jaku ti meri peransang. Iya mega ngelantangka ati sida ngena jerita mimpi iya, siti genera ti patut dikarap.

¹²Genera nya baka tu: Judas meda Imam Besai ke dulu suba, iya nya, Onias. Siku orang ke manah, baruh ati sereta nelap, pandai bejaku, lalu ari mit diajar manah enggau orang. Enggau jari ti ditelentangka iya, Onias besembiangka semua bansa Judah.

¹³Judas lalu meda siku orang buban buk, besai amat kuasa sereta dipebasa.

¹⁴Ku Onias, “Tu Jeremiah, nabi Allah Taala, pangan kita. Iya suah besembiangka bansa kitai enggau Jerusalem nengeri kudus.”

¹⁵Jeremiah lalu ngulurka jari kanan iya nyuaka siti pedang mas ngagai Judas lalu bejaku,

¹⁶“Terima meh pedang tu, siti pemeri ari Allah Taala. Ngena pedang tu nuan deka ngalahka semua munsuh nuan.”

¹⁷Jaku Judas ti negu ati sida meransang tiap iku sida, lalu ngasuh ati orang ke biak berani. Nengeri, pengarap enggau Rumah Sembiang sida deka dituntung penusah. Ketegal nya orang Judah mutus ati enggai terunda-runda, tang nyerang munsuh enggau ati gagah berani. Sida mega mutus ati berani betempuh siku sama siku.

¹⁸Sida enda kelalu irauka ruang bilik enggau kaban belayan sida, tang iya ke lebih dikirauka sida, iya nya, Rumah Sembiang ti kudus.

¹⁹Orang ke tinggal di dalam nengeri berasai irau berundingka perang ba endur ti lapang.

²⁰Semua orang nganti pemutus perang nya. Raban soldadu munsuh benung mansang betusun-tusun enggau raban soldadu ke nepan kuda di kiba enggau di kanan sertai enggau bala gajah sida ba semua endur ti manah.

²¹Judas Makabi meda raban soldadu munsuh mayuh amat, senyata sida chukup magang, enggau bala gajah sida ti mangah. Iya nelentangka jari iya ke serega, lalu besembiang ngagai Tuhan ke nemu ngaga kereja ajih, lalu iya nemu Tuhan deka meri pemenang ngagai orang ke patut menang, ukai ngagai orang ke bisi raban soldadu ti besai.

²²Tu meh sembiang ti disebut Judas, “O Tuhan, rambau Hiskiah raja Judah, Nuan ngirumka melikat Nuan ngambi ngalahka 185,000 iku orang ari raban soldadu Sanherib.

²³Diatu, O Tuhan ke bekuasa di serega, kirumka baru melikat Nuan ke manah ngambika munsuh kami gegetar takut.

²⁴Ngena kuasa Nuan ti besai, rusak meh orang nya ke bejai Nuan sereta nyerang nembiak Nuan ke kudus.” Baka nya meh Judas ngujungka sembiang iya.

²⁵Nikanor enggau raban soldadu iya mansang diring bunyi terumpit enggau mayuh lagu perang,

²⁶tang Judas enggau bala nembiak iya minta tulung ari Allah Taala nyatup munsuh.

²⁷Laban sida betempuh ngena jari, lalu ati besembiang ngagai Allah Taala, sida munuh enda kurang ari 35,000 iku orang ari raban soldadu munsuh. Sida gaga amat ati laban ditulung Allah Taala.

²⁸Udah badu betempuh, sida pulai enggau ati lantang. Sida meda Nikanor garing-garing parai enggau senyata iya be endur orang beperang.

²⁹Sida lalu sertai manjung muji Tuhan ngena jaku sida empu.

³⁰Judas Makabi ke selalu berantuka nyawa ngetanka bansa diri endang kenyau ari mit enda kala badu rinduka bansa diri, ngasuh orang mumpung pala Nikanor sereta netak lengan kanan iya. Iya ngasuh orang mai pala enggau lengan nya ke Jerusalem.

³¹Datai sida di nengeri, Judas ngasuh rayat begempuru. Sida imam diasuh iya nunga alta. Iya mega ngasuh orang ngangauka orang ke diau di kuta.

³²Iya lalu mantaika pala Nikanor orang ke jai nya. Iya mega mantaika jari Nikanor ti ngamahka Rumah Sembiang Allah Taala Ke Pemadu Bekuasa.

³³Iya nyayat dilah orang jai nya, lalu bejaku madahka diri deka meri dilah nya mimit-mimit kena meri burung makai. Jari Nikanor digantung iya ba seberai Rumah Sembiang kena nunjukka pemeli orang nya.

³⁴Udah nya semua orang ke bisi dia nengkadah ke serega lalu muji Tuhan ke udah ngayanka kuasa Iya, lalu nyaga pengudus Rumah Sembiang Iya.

³⁵Udah nya Judas ngantung pala Nikanor ba kuta ngambika ulih dipeda semua orang tanda Tuhan amat nulung sida.

³⁶Semua bela setuju hari nya dintu belama tiap taun kena ngingatka iya. Hari nya dintu sehari sebedau Hari Mordekhai, iya nya, kena hari ketiga belas dalam ba bulan kedua belas ti dikumbai bulan Adar dalam jaku Aram.

³⁷Baka nya meh pengidup Nikanor. Kenyau ari nya nengeri Jerusalem tetap enggi orang Hebrew. Enggau nya aku ngujungka cherita aku ditu.

³⁸Enti gaya cherita tu manah sereta betul, nyadi meh utai ti dikedeka aku. Tang enti enda berapa manah, lalu nadai reti, sigi naka nya aja meh penemu aku.

³⁹Kitai nemu ngirup wain aja tauka ai aja, enda manah. Wain patut digulai enggau ai, nya baru nyamai dirup. Baka nya mega siti jerita enti ditusi enggau manah tentu nyamai orang macha iya. Enggau nya naka tu meh jerita aku.