Read Iban 2 Makabi 3 Bible Online

2 Makabi 3 - Iban bible

2 Makabi 3

¹Rambau Onias[1] nyadi Imam Besai di Jerusalem, nengeri nya bisi pemaik enggau pengelantang. Semua undang-undang dititihka magang laban Onias talukka Allah Taala lalu begedika penyai.

²Semua raja Siria enggau Ejip bebasaka nengeri nya enggau Rumah Sembiang, lalu ngirum mayuh pemeri ti berega;

³baka nya mega Raja Seleukus, [2] raja Asia Barat Daya ke mayar ngena duit iya empu semua belanja piring kena besembiang di Rumah Sembiang.

⁴Tang siku orang ke benama Simon ari raban bansa Benjamin ke diasuh nyadi orang ke nguasa Rumah Sembiang enda sepenemu enggau Onias atur ti dikena ba maket di nengeri nya.

⁵Laban Simon enda ulih ngalahka Onias, iya mansang betemu enggau Apolonius anak Traseus ke nyadi gabenor Siria enggau Fenisia lebuh maya nya.

⁶Simon madah ngagai Apolonius pasal sarang duit Rumah Sembiang di Jerusalem penuh laban reta ti melimpah sampaika enda ulih di-itung. Iya mega madahka duit nya lebih ari chukup kena meli piring, nya alai iya merambu awakka duit nya dikuasa raja.

⁷Udah nya Apolonius betemu enggau raja lalu nusi pasal reta nya ngagai iya. Nya alai raja ngirumka Heliodorus, menteri besai iya ngambika ngiga jalai ngambi reta nya.

⁸Heliodorus tekala nya mansang ngereja pengawa iya, tang iya ngelalaika tuju diri lebuh iya madahka diri deka merening semua nengeri di bagi menua Siria Besai enggau Fenisia.

⁹Lebuh iya datai di Jerusalem, iya lalu disambut Imam Besai enggau manah. Heliodorus madahka tuju penatai diri ti bendar, lalu nanya sekalika utai ti didinga iya amat tauka enda.

¹⁰Imam Besai nerangka utai ti ditusi Simon ti jai nya bula. Endang amat bisi duit ba tabung duit Rumah Sembiang tang sebagi ari duit nya ungkup bala patu balu, lalu sebagi da enggi Hirkanus anak Tobias, siku orang ke tebilang dia. Imam Besai mega madahka semua penyampau duit semina 14,000 kilogram pirak enggau 7,000 kilogram mas.

¹²Pia mega ku iya, enda tau sekali-kali ngambi duit ti disimpan orang ke andalka pengudus enggau pengelikun Rumah Sembiang ti dibasa di serata dunya.

¹³Tang ku Heliodorous baka ni kati, duit nya mesti diserahka ngagai sarang reta raja baka ti dipinta raja.

¹⁴Nya alai, ba hari ti udah ditetapka, Heliodrous tama ke dalam Rumah Sembiang ngemataka pengawa ngitung duit nya. Pekara nya ngirauka ati semua orang di serata nengeri nya.

¹⁵Bala imam ngena gari sembiang ningkap ba mua alta. Sida minta ngagai Allah Taala ngambika Iya nyaga reta dalam Rumah Sembiang laban Iya empu udah netapka undang-undang ngasuh nyaga reta ti disimpan dalam Rumah Sembiang.

¹⁶Tiap iku orang berasai sinu amat meda Imam Besai. Mua iya pucat tanda tusah ati.

¹⁷Tubuh iya gegetar laban takut mandangka penusah ati iya.

¹⁸Rayat datai bebala mayuh ninggalka rumah sida laban deka enggau besembiang ngambika Rumah Sembiang enda dikamahka.

¹⁹Semua jalai penuh laban orang indu bekenaka kain guni ba punggung sida tanda tusah ati. Bala anak umbung bisi nya belanda ngagai mua pintu penama nengeri. Lalu bisi nya mega nyengguk ari jendela.

²⁰Semua sida ngangkatka jari besembiang ngagai Allah Taala.

²¹Sinu amat meda Imam Besai nganti enggau ati ti takut sereta irau, lalu semua orang ke diau di nengeri nya ningkap di tanah nadai daya agi.

²²Benung orang minta Tuhan ke Pemadu Bekuasa nyaga duit nya, ngambika iya tetap meruan sereta likun ba orang ke arapka Iya,

²³Heliodorus majak bejalaika atur iya.

²⁴Tang lebuh Heliodorous enggau semua orang ke nyaga iya datai ba bilik endur nyimpan sarang duit, Tuhan ti bekuasa atas semua roh enggau atas semua kuasa mandangka siti utai ti balat ngasuh takut, sampaika semua orang ke berani kia enggau Heliodorus tekenyit meda kuasa Allah Taala. Sida nadai daya laban tekelalu takut.

²⁵Sida meda siku kuda ti ditepan orang. Kuda nya disikap enggau gari kuda ti manah amat. Orang ke nepan iya ngena baju mas ti balat ngasuh takut. Ngenyit kuda nya mansang ngagai Heliodorus lalu nyepak iya ngena kaki.

²⁶Heliodorus mega meda dua iku lelaki ke agi biak, kering sereta sigat. Gari seduai nya manah amat. Seduai nya bediri siku ari kiba, siku ari kanan, lalu enda ngetu malu iya.

²⁷Tekala nya Heliodorus luput lalu rebah ke tanah. Bala orang ke nyaga iya ngalika iya ba juli,

²⁸lalu mai iya pansut. Orang tu tadi enggau bala iya, baru tama ke bilik endur nyimpan sarang duit, tang diatu iya dikatung pansut nadai daya. Lalu sida enggau terang ngaku kuasa Allah Taala.

²⁹Udah iya kena kuasa Allah Taala, Heliodorus semina telentang aja. Iya enda ulih bejaku lalu nadai jalai gerai.

³⁰Orang Judah muji Tuhan laban Iya udah nyaga pemanah nama Rumah Sembiang Iya ngena kereja ajih. Iya mega udah mai pengaga ngagai Rumah Sembiang ti endur orang baru udah ngasaika penakut enggau penyarut.

³¹Sekeda orang ke ngiring Heliodorus lalu jampat minta Imam Besai besembiang ngambika Tuhan ke Pemadu Tinggi enda ngambi nyawa tuai sida ke nyau deka parai.

³²Nya alai, Imam Besai lalu nyuaka piring ngambika Allah Taala nyelamatka Heliodorus laban iya takutka raja nyangka utai ti nyadi nya pengawa orang Judah.

³³Benung Onias nyuaka piring, lelaki dua iku ke ngena gari baka tadi, ngayanka diri baru ba Heliodorus, lalu bejaku, “Nuan patut meri terima kasih ngagai Imam Besai laban ketegal iya Tuhan nyelamatka nyawa nuan.

³⁴Ingat meh, Iya ke ngukum nuan, Iya meh Tuhan ke bekuasa di serega. Nya alai, padahka kuasa Iya ti besai ngagai semua orang.” Udah seduai nya bejaku munyi nya, seduai iya lalu nadai dipeda agi.

³⁵Ketegal nya Heliodorus nyuaka piring lalu ngaga mayuh semaya enggau Tuhan ke udah nyelamatka nyawa iya. Iya madah ngagai Onias iya deka pulai, nya alai iya enggau bala iya angkat lalu pulai ngagai raja.

³⁶Heliodorus nusi ngagai semua orang pasal semua pengawa Allah Taala ke Pemadu Besai ti dipeda iya.

³⁷Lebuh raja nanya Heliodorus sapa orang ke patut dikirum sekali da ke Jerusalem, iya nyaut,

³⁸“Enti nuan bisi munsuh tauka orang ke mudi perintah nuan, manah nuan ngirum orang nya. Orang nya tetap diperinsa. Lalu enti sema iya ulih pulai, reti nya, kuasa Allah Taala tetap bisi nyadi dia.

³⁹Allah Taala ke nguasa serega ngemata lalu nyaga endur nya. Barang orang datai ngagai endur nya enggau tuju ti enda manah, deka dipalu lalu diperinsa.”

⁴⁰Baka nya meh jerita pasal Heliodorus enggau jerita pasal endur sarang duit Rumah Sembiang diselamatka.