Read Iban 2 Makabi 4 Bible Online

2 Makabi 4 - Iban bible

2 Makabi 4

¹Tang Simon ke udah mudi menua diri sereta nusi ngagai Apolonius pasal reta menua, nuduh Onias malu Heliodorus lalu ngumbai iya mai mayuh penusah.

²Iya berani ngumbai Onias mudi menua taja Onias udah ngereja mayuh pengawa ti badas ke Jerusalem. Onias mega udah nyaga bansa diri, lalu iya bendar gawa ngambika semua adat dititihka bansa iya.

³Apolonius anak Menesteus, gabenor Siria Besai enggau Fenisia nyukung Simon ngereja macham-macham penyai. Simon enggau Onias balat amat bemunsuh sampaika siku orang ke dikarapka Simon kempang munuh mayuh orang. Onias nemu pekara nya tau mai penusah ngagai iya,

⁴

⁵nya alai iya lalu mansang betemu enggau raja. Tuju iya ukai deka nusi penyai orang ke sebansa enggau iya tang deka ngiga jalai ngambika bansa Judah bisi pengelantang dalam pengidup begulai enggau mensia mayuh sereta pengidup diri empu.

⁶Iya nemu, enti raja enda dikaul, sigi nadai jalai bisi pemaik dalam semua pengawa perintah, lalu Simon tentu majak ngereja penyai.

⁷Udah Raja Seleukus parai lalu Antiokus ti dikumbai Epifanes nyadi raja, Jason menyadi Onias ti biak ngerebut penuduk nyadi Imam Besai ngena jalai meri suap.

⁸Iya betemu enggau raja lalu besemaya deka meri 13,000 kilogram pirak lalu 2,700 kilogram da deka dibayar ila.

⁹Kelimpah ari nya iya besemaya deka mayar 5,000 kilogram pirak enti diberi kuasa nirika stadium endur bemain baka endur belatih ungkup sida ke agi biak, lalu ngeregister orang Jerusalem nyadi peranak menua Antiokia.

¹⁰Raja setuju lalu ngasuh Jason nyadi Imam Besai. Iya ngena kuasa nya mai orang ke diau di Jerusalem idup baka orang Gerika.

¹¹Iya belabuh muai semua utai ti manah ti diberi semua raja Siria ke dulu suba ngagai bansa Judah ketegal pemanah Joannes. Joannes nya apai Eupolemus ke dikirum ke Rom ngambika ngaga sempekat bekaban enggau bansa Rom. Jason mega muai adat bansa Judah lalu mai adat baru ti enda setipak enggau Adat Moses.

¹²Enggau ati ti rindu iya ngaga siti stadium semak bukit Rumah Sembiang. Bala sida ke agi biak ke landik diasuh iya enggau orang belumba nitihka adat bansa Gerika ngelama tu.

¹³Jason ke nyadi Imam Besai ngapa, nadai pengarap ke Allah Taala, ngereja mayuh penyai ti nadai banding. Ketegal nya, rayat nyau majak nerima adat bansa Gerika enggau bansa bukai, sampaika

¹⁴bala imam mega nyau enda ibuhka semua pengawa kudus sida. Sida nyau enda rindu ke pengawa sembiang ba Rumah Sembiang, lalu enda ibuhka semua piring. Lebuh tanda pekit nikalka pirin bemunyi, sida rajin deka enggau semua main ti enda diasuh Adat Moses.

¹⁵Sida ngemaruhka utai ti dipebasa aki ini kitai, lalu semua tanda basa bansa Gerika dikegagaka sida amat.

¹⁶Nya meh kebuah sida belabuh ngasaika penusah laban bansa ke dikegagaka sida sereta ditiru sida chara pengidup, nyau nyadi munsuh ke ngenyakka sida.

¹⁷Ngelaban Adat Allah Taala ukai pekara mit baka ti dipeda ba utai ti nyadi di baruh tu.

¹⁸Bisi sekali lebuh raja datai ngagai pengerami lumba ti diatur lima taun sekali di nengeri Tirus,

¹⁹Jason orang ke jai nya ngirum sekeda orang ari Jerusalem ke ngeregister diri peranak menua Antiokia. Jason ngasuh sida mai 10,000 kilogram pirak ke belanja piring ngagai petara Herakles. Tang bala sida ke dikirum nya ngumbai diri enda patut ngena duit nya meli piring.

²⁰Nya alai duit ti deka dikena meli piring ke petara Herakles dikena sida ke mai duit nya ngaga kapal perang.

²¹Udah Apolonius anak Menesteus dikirum ke Ejip ngambika enggau nyiri Raja Pilometor, Raja Antiokus ninga pasal raja Ejip nya enda setuju ke semua atur iya. Raja Antiokus belabuh irau ati pasal pengelikun perintah iya. Nya ala, raja nya mansang ke nengeri Jopa, lalu udah nya ke Jerusalem.

²²Raja diambat Jason enggau orang ke diau di nengeri nya enggau pengerami, lalu diring tama ke nengeri olih seraban orang manjung bepegaika sempun. Udah nya, ari nengeri Jerusalem Raja Antiokus mai raban soldadu tama Fenisia.

²³Tiga taun udah nya Jason ngirumka Menelaus menyadi Simon ke udah disebut suba, mai duit ti disemaya ngagai raja lalu minta pemutus raja pasal sekeda pekara ti beguna.

²⁴Tang lebuh iya betemu enggau raja, iya ngasuh raja tetarit ati laban iya ngaga diri baka orang ke bekuasa. Menelaus madahka diri deka meri duit 10,000 kilogram mayuh agi ari duit ti disemaya Jason, lalu nya ke ngasuh Menelaus bulih penuduk Imam Besai.

²⁵Menelaus pulai ke Jerusalem mai surat ari raja ngasuh iya nyadi Imam Besai. Tang kelimpah ari nya iya nadai sebarang utai ti patut nyukung iya nyadi Imam Besai; perangai iya baka siku orang ke bekuasa ke jai, lalu enti iya ringat, iya nemeram baka jelu mangah.

²⁶Baka nya meh Jason dibuai, baka iya ke muai menyadi iya empu ketegal ngerebut penuduk Imam Besai. Lalu diatu iya diasuh rari ke menua Amon.

²⁷Taja Menelaus bulih penuduk Imam Besai, tang iya enda mayar duit ti disemaya iya enggau raja.

²⁸Sostratus, tuai kuta di Jerusalem majak nagih duit nya laban pengawa iya endang ngumpul duit ti baka nya. Ujung iya, seduai iya dikangau betemu enggau raja.

²⁹Menelaus ngasuh Lisimakhus menyadi iya empu nyadi sapit Imam Besai, lalu Sostratus milih Krates, tuai raban Siprus nyadi pengari iya.

³⁰Maya nya penyarut nyadi di nengeri Tarsus enggau Malus di pelilih menua Kilikia laban raja udah meri dua iti nengeri nya ngagai Antiokis, siku ari bini simpan raja.

³¹Raja ninggalka Andronikus siku pemesai perintah nyadi pengari iya laban iya deka jampat ke Kilikia ngaduka penyarut di pelilih menua nya.

³²Menelaus ngambi peluang nerumpak sekeda pekakas mas ari Rumah Sembiang. Sekeda ari utai nya diberi iya ke Andronikus, lalu sekeda dijual iya di nengeri Tirus enggau di semua nengeri semak nya.

³³Lebuh Onias ninga pekara nya, iya belalai di siti endur kudus di Dafne semak nengeri Antiokia, lalu enggau terang iya mantah Menelaus.

³⁴Menelaus ngena chara belalai mujuk Andronikus munuh Onias. Nya alai, Andronikus mansang betemu enggau Onias. Iya betabi enggau Onias lalu ngena jalai tipu besemaya deka nyaga pengelikun Onias. Ujung iya, Andronikus ulih mujuk Onias ninggalka endur kudus alai iya belalai taja Onias berasai enda nyamai ati. Tang maya nya mega Andronikus terus munuh Onias ngena jalai ti enda patut.

³⁵Ukai semina bansa Judah aja tang bansa bukai mega ringat sereta irau meda Onias dibunuh ngena jalai ti jai amat baka nya.

³⁶Udah raja pulai ari pelilih menua Kilikia, sekeda orang Judah ari Antiokia betemu enggau raja lalu nusi ngagai iya pasal Onias ke dibunuh ngena jalai ti jai amat. Sekeda orang Gerika begedi sereta mantah penyai nya.

³⁷Raja Antiokus tusah amat ati lalu kasihka Onias; iya nyabak ngenang niang Onias laban Onias nya siku orang ke pintar sereta likun dalam pengidup.

³⁸Nya alai, raja ringat amat ngagai Andronikus. Tekala nya raja muka baju tanda pangkat Andronikus; gari perintah ti dikena iya mega dibuka, lalu iya dirit ngelingi nengeri nya sampai datai ba endur iya munuh Onias. Ba endur nya mega Andronikus diukum bunuh. Baka nya meh Tuhan malas penyai iya ngena ukum ti setipak enggau ulah iya ti jai.

³⁹Maya nya Lisimakhus ditemu menyadi iya Menelaus, suah bendar nerumpak barang kudus digaga ari mas di nengeri Jerusalem. Udah berita nya ditaburka, rayat begempuru ngelaban Lisimakhus.

⁴⁰Laban rayat ke ringat nya ngelaban, dia Lisimakhus ngirumka 3,000 iku orang besenyata ngambika nyerang sida. Raban soldadu nya betuaika Auranus, siku orang ke udah tuai tang beli.

⁴¹Lebuh orang Judah begempuru ba tengah laman Rumah Sembiang meda Lisimakhus deka nyerang sida, dia sida lalu ngumpul batu tauka kayu, lalu bisi sekeda mega ngenggam abus. Benung sida charut, rayat nikauka semua utai nya ngagai Lisimakhus enggau bala iya.

⁴²Mayuh ari sida bakal, sekeda parai lalu sekeda rari. Lisimakhus empu ke nerumpak Rumah Sembiang dibunuh semak endur nyimpan sarang duit Rumah Sembiang.

⁴³Ketegal utai ke udah nyadi, Menelaus kena dawa ba kot.

⁴⁴Lebuh raja datai ba nengeri Tirus, Kunsil Bansa Judah Ti Pemadu Tinggi di Jerusalem ngirumka tiga iku orang ngambika nawa Menelaus.

⁴⁵Tang lebuh Menelaus nemu diri alah dalam pekara nya, iya besemaya deka meri mayuh duit ngagai Ptolemeus anak Dorimenes ngambika Ptolemeus mujuk raja setanah enggau iya.

⁴⁶Ptolemeus mai raja pansut ke ruai baka ke deka nyirutka angin ti beresi. Dia iya mujuk raja ngubah runding diri.

⁴⁷Nya alai, Menelaus ke nyadi pun semua penyarut nya, dilepaska ari semua dawa, lalu tiga iku orang ke dikirum nya diukum bunuh. Tang enti sema pekara nya dibai ngagai orang Skit ke pemadu jai, sida tiga nya tentu deka dikumbai enda salah.

⁴⁸Sida tiga nya udah ngeringka nengeri Jerusalem, orang ke diau dia enggau semua pekakas kudus ba Rumah Sembiang. Tang taja pia, ukum ti enda patut diterima sida tiga nya tetap dipejalaika enggau jampat.

⁴⁹Ba sekeda orang Tirus, penyai nya ngasuh ati sida begedi. Sida nguburka sida tiga nya ngena atur ti besai kena bebasaka pemanah budi sida.

⁵⁰Menelaus tetap ba penuduk iya ketegal orang ke bekuasa amu. Iya majak jai lalu nyadi munsuh ti pemadu besai bansa iya em pu.