Read Iban 2 Makabi 5 Bible Online

2 Makabi 5 - Iban bible

2 Makabi 5

¹Lebuh maya nya Raja Antiokus Keempat besedia deka nyerang Ejip kedua kali.

²Nyau deka empat puluh hari orang di serata menua Jerusalem meda genera pasal raban soldadu ke nepan kuda belanda nengah langit. Orang ke nepan kuda nya ngena gari mas lalu ngena sangkuh

³enggau pedang ti udah disintak ke senyata sida. Semua raban nya besatup nyerang pangan diri. Terabai sida besatup, mayuh sangkuh enggau panah ditikau ngagai munsuh. Semua pekakas enggau baju mas perenching kena pancar matahari.

⁴Semua orang besembiang minta awakka genera nya nyadi siti tanda pemanah.

⁵Lebuh cherita sengapa nya madahka Raja Antiokus udah parai ditaburka, Jason ngempuruka lebih seribu iku orang lalu ngenyit nyerang nengeri Jerusalem. Sida nyerang raban soldadu ke nyaga dinding nengeri nya sampai raban soldadu nya nyurutka diri, lalu sida pen ngerampas nengeri nya. Menelaus rari ke kuta nengeri semak bukit Rumah Sembiang.

⁶Maya nya Jason enggau raban soldadu iya malu orang Judah, bansa iya empu enggau nadai penyinu. Iya ti bendar, Jason enda nemu, pemenang ngelaban bansa diri empu, nya meh pengalah ti pemadu besai. Iya ngumbai diri mujur menang ngelaban munsuh, ukai ngumbai bansa diri empu alah.

⁷Tang iya enda mujur ngerampas kuasa. Pengujung iya, pengawa ti mudi bansa diri empu semina mai pemalu ngagai iya, lalu iya enda tau enda rari baru ngagai menua Amon.

⁸Ujung ulah Jason ti jai baka tu: Udah iya dijel Aretas, siku orang Arab ke bekuasa, iya rari ari nengeri siti ngagai nengeri siti, iya digagai olih semua orang, iya dipegedi ketegal ngelaban adat, iya dikumbai pemadu jai laban mudi bansa diri empu, lalu ke penudi endar iya dibuai ngagai menua Ejip.

⁹Udah nya iya ke Gerika andalka diri bulih pengelikun ba orang Sparta ke agi bekaban enggau orang bansa Judah. Ujung iya, orang ke mejal mayuh bansa diri rari ari nengeri diri empu, seruran digiga sampai parai ba menua orang.

¹⁰Jason udah munuh mayuh orang lalu ngelakka bangkai sida enda ditumbak. Diatu iya empu enda disabak. Pemarai iya enda dipeduli orang. Iya enda ditumbakka begulai aki ini iya.

¹¹Lebuh Raja Antiokus ninga utai ti nyadi di Jerusalem, iya ngumbai menua Judea ngelaban iya. Enggau ati ringat iya ninggalka Ejip lalu ngerampas Jerusalem ngena serang ti balat amat.

¹²Raja ngasuh bala soldadu iya enggau nadai pengasih munuh tiap iku orang ke ditemu sida, lalu orang ke rari ke dalam rumah dibunuh sida mega.

¹³Semua orang dibunuh magang: lelaki enggau indu, bala anak lelaki enggau bala indu dara nyengkaum bala anak mit ke baru ada.

¹⁴Dalam tiga hari, Jerusalem lenyau 80,000 iku orang; 40,000 parai dibunuh lebuh diserang lalu mayuh mega dijual nyadi ulun.

¹⁵Tang Raja Antiokus agi enda puas ati sampaika iya berani tama ke dalam Rumah Sembiang ti pemadu kudus di serata dunya. Iya diring Menelaus, siku orang ke udah mudi adat enggau bansa diri empu.

¹⁶Enggau jari ti udah dikena ngereja penyai, raja ngambi semua pekakas ti kudus, lalu ngerampas semua barang ti diberi bala raja kena nambahka pemesai mulia Rumah Sembiang.

¹⁷Raja Antiokus berasai gaga amat laban iya menang lalu iya enda nemu Tuhan endang ngelakka Rumah Iya kamah ketegal penyalah orang ke diau di Jerusalem ngasuh Iya ringat enda lama.

¹⁸Enti orang ke diau di nengeri nya enda tekelalu balat bedosa, tentu Raja Antiokus ditagang ngereja utai ti ngenyai nya, lalu diukum tekala nya. Iya deka merinsa baka Heliodorus ke dikirum Raja Seleukus meresa endur ngengkah sarang duit.

¹⁹Tuhan enda milih nembiak Iya ketegal Rumah Sembiang tang Iya ngaga Rumah Sembiang ketegal nembiak Iya.

²⁰Nya alai, Rumah Sembiang saum penusah enggau nembiak Tuhan, tang udah nya saum berekat enggau nembiak Tuhan. Tuhan ke Pemadu Bekuasa sereta Pemadu Besai ninggalka Rumah Sembiang lebuh Iya ringat, tang Tuhan mulaika pemesai mulia Rumah Sembiang lebuh Iya badu ringat.

²¹Raja Antiokus ngangkut 61,200 kilogram pirak ari Rumah Sembiang, lalu jampat angkat ke Antiokia. Laban raja nya kelalu sumbung, iya ngumbai diri ulih ngasuh kapal belayar di darat, lalu raban soldadu ke bejalai kaki dikumbai iya ulih bedarat di tasik.

²²Raja ngangkatka bala gabenor ngambi ngenyakka rayat. Iya ngangkatka Philip ari Frigia ke jai agi ari iya nyadi gabenor di Jerusalem.

²³Andronikus nyadi gabenor di Bukit Gerisim. Kelimpah ari nya, dia bisi Menelaus ke jai enggau bansa Judah, iya nya, bansa empu, lebih agi jai ari bala gebenor. Antiokus begedi amat meda orang Judah.

²⁴Nya alai iya ngirumka Apolonius enggau 22,000 iku soldadu ari Misia ke Jerusalem. Sida nya diasuh munuh semua orang lelaki di nengeri nya, lalu nyual orang indu enggau bala anak mit nyadi ulun.

²⁵Apolonius datai di Jerusalem lalu ngaga diri deka bebaik. Iya nganti sampai Hari Sabat, lalu lebuh iya nemu orang Judah enda gawa sehari nya, iya ngasuh bala soldadu bejalai bebaris mai senyata ba luar nengeri nya.

²⁶Mayuh orang datai kia laban deka meda pengawa nya. Ngenyit Apolonius ngasuh raban soldadu iya munuh semua orang ke datai meda pengawa nya. Udah nya iya ngasuh bala soldadu tama ke dalam nengeri nya lalu munuh mayuh orang dia.

²⁷Tang Judas Makabi enggau kurang lebih sepuluh iku orang rari ke menua puang, lalu idup dia baka jelu babas. Sida semina makai utai ti tumbuh ngambika enda bedosa ketegal makai utai ti enda diasuh ada t sida.