Read Iban 2 Makabi 6 Bible Online

2 Makabi 6 - Iban bible

2 Makabi 6

¹Enda lama udah nya raja ngirumka siku orang bansa Aten ke udah tuai mejal orang Judah ninggalka pengarap enggau adat aki ini sida.

²Iya mega diasuh ngamahka Rumah Sembiang di Jerusalem ngena jalai nyerahka rumah nya ngagai Petara Seus Olimpios. Kelimpah ari nya rumah sembiang di Bukit Gerisim mesti diserahka ngagai Seus Ksenios, petara orang bansa bukai, nitihka peminta orang ke diau dia.

³Penyai nya mai penusah ngagai rayat.

⁴Rumah Sembiang penuh laban orang bansa bukai ke rami enggau ngirup sereta ngereja pengawa kamah. Sida bemain enggau indu sundal lalu tindok enggau bala orang indu di tengah laman kudus. Utai ti mali dibai sida tama ke dalam Rumah Sembiang.

⁵Atas mija alta mayuh piring ti mali ba Adat Moses.

⁶Orang Judah enda diasuh ngintu Hari Sabat enggau semua hari besai bukai ke selalu diintu aki ini sida sampaika sida enda diasuh ngaku diri orang Judah.

⁷Tiap bulan lebuh hari pengada raja, orang Judah dipejal enggau kasar makai perut jelu ti diberi nyadi piring; lalu lebuh hari besai kena bebasaka Dionisius ti petara anggur, sida dipejal enggau orang bejalai bebala mayuh mai sekilung daun diengkah ba pala.

⁸Ari jaku asut orang, Ptolemais bisi siti atur ditujuka ngagai semua nengeri Gerika semak nya. Atur nya minta semua orang Judah ke bisi dia mesti makai jelu ti diberi nyadi piring ngagai petara sida.

⁹Genap iku orang Judah ke enggai nitihka chara pengidup orang Gerika mesti dibunuh. Orang Judah meda penusah ti deka datai ninggang sida.

¹⁰Ngambika chunto, dua iku indu dibai bechara dalam kot laban nyunat anak lelaki sida ke agi mit. Seduai iya dibai bejalai ngelingi nengeri mai anak disandik seduai. Udah nya sida dibuai ari atas dinding nengeri.

¹¹Nyadi sekali Philip dipadahka pasal sekeda orang Judah ke belalai begempuru ngintu Hari Sabat di sekeda gua ti enda jauh ari endur nya. Philip nyerang sida lalu nunu sida idup-idup. Sida enggai ngelaban ketegal bebasaka Hari Sabat.

¹²Kita ke macha berita tu anang enda nyamai ati ninga penusah tu. Ingat meh Tuhan enda ngena penusah tu ngerusak nembiak Iya, tang dikena Iya ngajar sida.

¹³Iya ti bendar, enti orang bedosa jampat diukum lalu enda lama nganti, nya meh tanda pemanah ati Tuhan.

¹⁴Iya ke Pemadu Bekuasa enda ngaga kitai baka Iya ngaga bansa bukai: Iya besabar ngelakka sida nyau balat bedosa, udah nya baru Iya ngukum sida.

¹⁵Tang kitai diukum Iya sebedau kitai tekelalu balat dosa.

¹⁶Nya alai, Tuhan selalu manah enggau kitai nembiak Iya. Iya ngukum kitai enggau mayuh pemerinsa tang tetap enda ninggalka kitai.

¹⁷Aku udah beratika semua utai tu kena ngingatka kitai. Diatu kitai nampung jerita tu.

¹⁸Bisi siku orang tebilang ke megai Adat Moses benama Eleasar. Iya tu nyau tuai tang udu dibasa orang. Iya dipejal makai babi.

¹⁹Tang iya deka agi mati enggau basa ari ti idup malu. Dagin nya diluakka iya, lalu iya berani mansang ngagai endur diperinsa. Ngena jalai nya iya meri kitai teladan ngambika kitai berani nulak pemakai ti enda tuchi lalu sanggup parai ketegal nulak utai nya.

²¹Orang ke ngatur piring nya endang kaban lama Eleasar. Nya alai, sida enggau chara belalai ngasuh Eleasar mai kediri empu dagin ti tau dempa iya. Sida ngasuh Eleasar ngaga diri makai dagin babi baka ti diasuh raja.

²²Laban sida udah lama bekaban, nya alai ngena jalai nya sida nulung iya ngambi iya enda dibunuh.

²³Tang Eleasar ngambi pemutus ti patut dipuji, setipak enggau umur iya ti udah tuai sereta basa ti diberi ngagai iya. Seumur idup, iya taluk amat ke Adat Allah Taala. Nya alai ku iya, “Bunuh meh aku diatu.

²⁴Pengawa ti nipu baka nya, enda patut dikereja orang ke nyau tuai baka aku. Enti aku nukar pengarap aku nunda bansa bukai lebuh umur aku semilan puluh taun, dudi ila mayuh orang ke biak deka nunda aku.

²⁵Enti aku nipu ketegal deka ngidupka nyawa diri, aku deka ngemalu diri empu, lalu ngenesatka mayuh orang ke biak.

²⁶Enti nyema aku diatu ulih lepas ari ukum mensia, baik ke nya idup tauka mati, aku tetap enda ulih lepas ari ukum Allah Taala Ke Pemadu Bekuasa.

²⁷Enti aku berani parai diatu, aku nunjukka diri endang patut gayu baka aku ke diatu.

²⁸Ngena jalai nya aku meri teladan ti manah ngagai orang ke biak ngambika sida sanggup parai enggau ati gaga ketegal ngenanka Adat kitai ti lurus sereta kudus.” Udah iya bejaku munyi nya, iya terus nuju endur iya deka diperinsa,

²⁹lalu orang ke manah enggau iya tadi, diatu nyadi munsuh iya laban ku sida, Eleasar bejaku baka orang gila.

³⁰Udah iya dilunsin sampaika nyau deka parai, Eleasar mengkakai sereta bejaku, “Tuhan ke ngembuan semua penemu ti kudus nemu aku ulih nyeliahka pemerinsa ti balat tu enggau pemarai, tang Iya mega nemu aku nanggung semua tu enggau ati gaga laban aku nangika Iya.”

³¹Eleasar lalu parai. Tang pemarai iya ti mandangka pemerani iya, nyadi ke teladan ti manah, ti dikingatka semua orang ke biak enggau semua bansa kitai.