Read Iban 2 Makabi 7 Bible Online

2 Makabi 7 - Iban bible

2 Makabi 7

¹Bisi siti da utai nyadi, iya nya pasal siku indu enggau tujuh iku anak lelaki iya ke ditangkap. Ari asuh raja sida dilunsin kena mejal sida makai dagin babi.

²Siku ari sida nya lalu bejaku. “Nama utai ti dikedeka nuan ari kami? Nyamai agi kami parai ari ti ngelaban Adat aki ini kami.”

³Lebuh raja ninga jaku nya, iya ringat amat, lalu ngasuh orang nanggalka sekeda kawah enggau kitil besai ngambika angat amat.

⁴Udah semua utai nya angat amat, raja ngasuh orang netak dilah iya ke bajaku tadi. Kulit pala iya dititi, lalu jari enggau kaki iya ditetak ba mua indai enggau bala menyadi iya enam iku.

⁵Udah semua bagi tubuh iya puntul, raja ngasuh iya diguring idup-idup dalam kawah. Benung kawah nya berasap indai enggau bala menyadi iya meransang pangan diri ngambi parai baka orang berani. Nya alai ku sida,

⁶“Tuhan Allah Taala meda kitai lalu meretika pemerinsa kitai. Kitai nemu utai tu ari lagu Moses mantah orang ke udah ngelengkaka pengarap. Ku Moses, ‘Tuhan kasihka orang ke nyerah nyawa diri ketegal gawa ke Iya.’ ”

⁷Udah menyadi sida keterubah parai baka nya, menyadi sida ti kedua diambi laban deka diperinsa. Sida niti kulit pala iya lalu nanya iya, “Kati nuan diatu deka makai dagin babi nya? Tauka nuan ngelakka kami netak jari enggau kaki nuan siti-siti?”

⁸Iya nyaut dalam jaku iya empu, “Enggai aku makai babi!” Nya alai sida merinsa iya baka menyadi iya keterubah.

⁹Tang sebedau iya mutuska seput, ku iya bejaku enggau raja, “Nuan orang ke jai! Nuan ulih munuh kami tang Raja atas semua utai deka ngangkatka kami ari pemarai, lalu meri kami pengidup ti enda nemu badu laban kami parai ketegal penaluk kami ke semua adat Iya.”

¹⁰Udah nya menyadi sida ti ketiga diperinsa. Iya jampat mansutka dilah iya lebuh orang ngasuh iya. Enggau ati berani iya ngunjurka jari iya,

¹¹lalu enggau nadai takut sekali iya bejaku, “Allah Taala meri jari tu ngagai aku. Tang ba aku semua Adat Iya lebih berega ari jari aku tu. Aku nemu Allah Taala deka meri iya pulai baru ngagai aku.”

¹²Raja enggau semua orang ke ngiring iya alit ati meda pemerani sida sanggup merinsa.

¹³Udah iya parai, sida merinsa menyadi iya keempat sebaka jalai enggau sida ke dulu.

¹⁴Tang jaku iya ti penundi endar ngagai raja munyi tu, “Aku sanggup parai ketegal kami bisi pengarap ke Allah Taala deka ngangkatka kami baru ari pemati! Tang nuan enda angkat idup baru!”

¹⁵Lebuh menyadi sida kelima dibai ngambika diperinsa,

¹⁶iya merening raja lalu bejaku, “Nuan bisi kuasa ngereja utai peneka ati enggau mensia, taja nuan empu nemu parai. Tang anang nuan ngumbai Allah Taala ngelengkaka bansa kami.

¹⁷Anti aja, ila nuan meda pemesai kuasa Tuhan. Iya deka merinsa nuan enggau peturun nuan.”

¹⁸Menyadi sida keenam mega dibai ngambika diperinsa, tang sebedau iya parai, iya bejaku, “Anang salah sangka. Kami merinsa laban penyalah kami empu. Kami udah bedosa ngelaban Allah Taala kami, nya alai ketegal nya kami diperinsa baka tu.

¹⁹Tang anang nuan ngumbai diri ulih ngelaban Allah Taala lalu enda diukum Iya.”

²⁰Iya ti chukup ngasuh alit ati, iya nya, indai sida, lalu iya patut dikingatka enggau basa. Iya meda semua bala anak iya tujuh iku parai magang dalam sehari nya. Tang taja pia, iya nanggung semua nya enggau ati ti berani laban iya manggaika pengarap iya ba Tuhan.

²¹Enggau ati ti pemadu berani iya ngulaika pengasai iya ti indai enggau pemerani baka orang laki, meri peransang ngagai tiap iku anak iya ngena jaku bansa iya empu.

²²Ku iya, “Aku enda nemu baka ni nuan belabuh idup dalam kandung aku. Ukai aku ke meri nuan seput tauka pengidup tauka nusun tiap bengkah tubuh nuan,

²³enti enda Allah Taala, ke Pengaga semua utai di bap langit. Iya ke ngaga mensia enggau semua utai. Iya penuh enggau pengasih lalu deka meri pengidup baru enggau seput ngagai nuan laban nuan berat agi ke Adat Iya ari ti beratka diri empu.”

²⁴Raja Antiokus ngumbai indu nya ngeleseka iya. Nya alai, raja nguji ngumbuk anak indu nya ke pengkuan ngelengkaka adat aki ini iya. Raja bejanji enggau sumpah deka ngasuh anak indu nya nyadi orang kaya lalu senang lantang. Raja sampai deka meri iya penuduk ti dibasa, lalu ngaga iya nyadi Pangan Raja.

²⁵Tang anak indu nya enda pedulika jaku raja. Nya alai, raja ngumbuk indai iya ngambika ngajar anak nya lalu ngidupka nyawa iya.

²⁶Udah iya lama dipujuk, iya setuju.

²⁷Iya ngembing anak iya, lalu ngemelika raja ti jai nya enggau jaku bansa iya empu munyi tu, “Anak aku, kasihka indai nuan tu ke udah ngandungka nuan ngelama semilan bulan lalu nusuka nuan ngelama tiga taun. Aku mega udah nupi nuan datai ke diatu.

²⁸Nya alai aku bebendar minta nuan anak aku merening ke langit enggau ke tanah enggau semua utai dalam iya. Ingatka Allah Taala ke ngaga mensia enggau semua utai ari utai nadai.

²⁹Anang takutka raja pemunuh nya. Pandangka diri empu baka bala menyadi nuan, lalu anang takut mati baka sida ngambika ulih pengasih Allah Taala, aku nerima nuan enggau bala menyadi nuan baru ba hari pengangkat ila.”

³⁰Empai abis indai iya bejaku, anak iya lalu bejaku, “Raja Antiokus, nama utai dianti nuan? Aku enggai nitihka jaku nuan. Aku semina talukka Adat ti diberi Moses ngagai aki ini kami.

³¹Tang nuan ke udah ngatur semua macham pemerinsa ngagai bansa Hebrew tetap enda lepas ari ukum Allah Taala.

³²Endang Tuhan ke idup ke ngasuh kami merinsa ketegal dosa kami kena Iya ngerara sereta ngubah kami. Tang pengeringat Iya enda lama aja, laban kami tu nembiak Iya, lalu Iya deka ngampun kami.

³⁴Tang nuan ke pengambis jai ari semua orang. Anang nuan nipu diri lalu sumbung ngumbai diri pama ketegal munuh nembiak Allah Taala diatu.

³⁵Nuan sigi enda lepas ari diakim Allah Taala ke Pemadu Bekuasa sereta meda semua utai.

³⁶Udah kami menyadi merinsa sementara diatu, kami deka idup belama ketegal kami talukka semaya Allah Taala. Tang nuan deka diakim Iya, lalu diukum setipak enggau penyumbung nuan.

³⁷Aku mega nyerahka nyawa aku baka bala menyadi aku ketegal Adat aki ini aku. Tang aku mega minta Allah Taala jampat mandangka pengasih Iya ngagai bansa kami ngambika Iya merinsa nuan sampaika nuan ngaku Iya aja Allah Taala.

³⁸Aku besembiang ngambika pengeringat Allah Taala ke Pemadu Bekuasa ngagai bansa kami deka badu nengah pemerinsa bala kami menyadi.”

³⁹Lebuh raja ninga jaku kelese nya pengeringat iya lalu gesak. Anak pengkuan nya lalu diperinsa iya lebih balat ari sida bukai.

⁴⁰Baka nya meh pemarai iya, nadai endur mantah laban penuh pengarap ngagai Tuhan.

⁴¹Udah semua anak abis dibunuh, nya baru indai iya dibunuh.

⁴²Chukup meh jerita aku pasal orang Judah ke balat diperinsa sereta dipejal makai dagin piring.