Read Iban 2 Makabi 8 Bible Online

2 Makabi 8 - Iban bible

2 Makabi 8

¹Judas Makabi enggau bala orang ke nitihka iya belalai tama ngagai tiap genturung pendiau. Sida nesau kaban belayan sida, lalu ngempuruka lebih kurang 6,000 iku orang Judah ke tetap talukka pengarap sida.

²Sida minta Tuhan nulung nembiak Iya ke benung dinyakka bansa bukai, lalu sayauka Rumah Iya ti dikamahka orang jai.

³Sida minta Iya kasihka nengeri Jerusalem ti udah rusak nyau deka rata baka tanah, lalu minta Iya ningaka kangau orang ke dibunuh.

⁴Sida mega minta Tuhan mandangka diri begedika penyai lebuh Iya malas penyai orang ke nyumpah Allah Taala enggau orang ke nadai pengasih munuh bala anak mit ke enda salah.

⁵Udah Judas ngatur raban soldadu iya, bansa bukai enda ulih ngalahka iya laban pengeringat Tuhan ngagai bansa Israel udah berubah nyadi pengasih.

⁶Judas ngenyit nyerang lebuh malam hari lalu suah menang. Tiap genturung pendiau enggau nengeri ditunu iya, endur ti manah alai nyerang dirampas iya, lalu mayuh munsuh enda tau enda rari. Judas tebilang di sebarang endur laban pemerani iya.

⁸Lebuh Philip, gabenor Judea meda Judas nyau majak mujur, lalu suah menang, iya nulis surat ngagai Ptolemeus, gabenor Siria Besai enggau Fenisia minta tulung ngetanka perintah.

⁹Ptolemeus lalu jampat nuduh Nikanor anak Patroklus, siku ari sida ke nyadi Pangan Raja ke pemadu semak enggau raja. Nikanor diasuh iya nyadi tuai raban soldadu 20,000 iku ari pupu bansa ngambika nganchurka semua bansa Judah. Ptolemeus mega nuduh Gorgias, tuai perang ke teleba amat beperang ngambika enggau sida.

¹⁰Raja Antiokus mesti mayar chukai 68,500 kilogram pirak ngagai orang Roma, lalu Nikanor berunding deka mayar chukai nya ngena rega bansa Judah ti ditangkap maya perang lebuh sida nya dijual nyadi ulun.

¹¹Nya alai, iya jampat naburka berita ngagai semua nengeri di tebing tasik nusi sida deka nyual orang Judah nyadi ulun enggau rega sekilogram pirak siku. Iya enda nemu diri deka diukum Allah Taala Ke Pemadu Bekuasa.

¹²Judas ninga rita Nikanor enggau raban iya udah angkat nuju Jerusalem. Nya alai, Judas madah ngagai bala iya pasal bala soldadu munsuh nyau semak.

¹³Ninga nya, orang ke penakut sereta enda arapka pengelurus Allah Taala rari ninggalka endur nya.

¹⁴Sida bukai nyual semua utai ti agi bisi ba sida lalu sama bela besembiang minta Tuhan nyelamatka sida ari Nikanor orang ke jai ke udah nyual sida nyadi ulun sebedau perang belabuh.

¹⁵Enti ketegal sida Tuhan enggai nyelamatka sida, sida minta awakka Iya nyelamatka sida ketegal sempekat ti digaga Iya enggau aki ini sida laban Iya Allah Taala ke Pemadu Besai sereta penuh Mulia udah milih sida nyadi nembiak Iya.

¹⁶Judas lalu ngempuruka bala nembiak iya pemayuh 6,000 iku, lalu meri sida peransang ngambika enda irau tauka takut meda pemayuh bansa bukai datai nyerang sida enggau nadai kebuah. Sida mesti beperang enggau ati berani,

¹⁷lalu patut ingatka baka ni bansa bukai udah ngereja penyai ngagai Rumah Sembiang, bejaku jai merinsa nengeri Jerusalem, lalu muai adat aki ini sida.

¹⁸Ku Judas, “Sida bepanggai ba senyata enggau pemerani. Tang kitai arapka Allah Taala Pemadu Bekuasa ke ukai semina ulih ngerusak raban munsuh kitai, tang Iya ulih ngerusak serata dunya enggau semina nangukka pala.”

¹⁹Udah nya Judas mai sida ingatka tulung Tuhan ba rambau aki ini sida suba, baka ba maya Sanherib suba lebuh 185,000 iku munsuh parai,

²⁰lalu pia mega, lebuh betempuh ngelaban orang Galatia di Babilon. Maya nya, 8,000 iku orang Judah nulung 4,000 iku orang Makedonia. Lebuh orang Makedonia nyau deka alah, 8,000 iku orang Judah munuh 120,000 iku orang Galatia, lalu sida bulih mayuh perapasan. Sida menang laban Allah Taala nulung sida.

²¹Jaku ti dipansutka Judas ngeringka ati bala nembiak iya sampaika sida sanggup parai ketegal pengarap enggau menua sida. Judas lalu magi bala soldadu iya nyadi empat bagi,

²²lalu tiap bagi bisi 1,500 iku betuaika iya empu enggau bala menyadi iya baka Simon, Joseph enggau Jonathan.

²³Iya ngasuh Eleasar macha Bup Kudus, lalu udah nya meri jaku peransang ti munyi tu, “Allah Taala Deka Nulung Kitai”. Judas empu nyadi tuai raban soldadu bagi ke satu ngelaban Nikanor.

²⁴Allah Taala Pemadu Bekuasa setanah enggau sida. Nya alai sida ulih munuh lebih ari 9,000 iku bala soldadu munsuh. Mayuh bendar soldadu Nikanor bakal, lalu semua soldadu iya rari magang.

²⁵Sida mega ngerampas semua duit orang ke datai deka meli sida nyadi ulun. Sida ngagai munsuh sampai jauh tang udah nya mesti pulai laban nyau tekelalu laun,

²⁶lalu Hari Sabat nyau deka belabuh.

²⁷Udah sida ngumpul semua senyata, lalu ngerampas semua utai ti dikena munsuh, sida lalu ngintu Hari Sabat. Sida muji Tuhan lalu meri terima kasih laban Iya udah nyaga sida sampaika ulih ngintu hari nya, lalu Iya dipeda belabuh mandangka pengasih ngagai sida.

²⁸Udah Hari Sabat, setengah ari perapasan ti ulih sida dibagi enggau orang ke diperinsa, bala indu balu enggau bala anak patu balu. Laluh iya dibagi sida enggau pangan diri.

²⁹Udah nya sida sama bela besembiang minta Tuhan Ke Pemadu Pengasih bebaik amat enggau nembiak Iya.

³⁰Lebuh orang Judah beperang ngelaban soldadu Timoti seduai Bakhides, sida munuh lebih ari 20,000 iku raban munsuh. Sida ngerampas mayuh kuta ti tinggi lalu bulih mayuh perapasan ti dibagi sida dua. Sebagi dibagi sida bela enggau diri sama diri, lalu sebagi da diberi sida ngagai bala indu balu, anak patu balu, orang ke nyau tuai enggau sida ke kena perinsa.

³¹Semua senyata munsuh digumpul sida enggau silik, lalu disimpan ba endur ti manah. Sekeda ari perapasan dibai sida ke Jerusalem.

³²Sida mega munuh tuai perang soldadu Timoti, orang nya jai amat laban selalu ngenusah orang Judah.

³³Lebuh orang Judah berami ba menua diri empu laban udah menang beperang, sida nunu sekeda orang ke nunu semua pintu penama besai Rumah Sembiang. Kalistenes ke rari ngagai siti rumah ti mit mega kena tunu. Enggau nya, iya nerima ukum ti setipak enggau penyai iya.

³⁴Ngena jalai nya Nikanor, orang ke jai amat ke mai seribu iku orang dagang ke diasuh meli orang Judah,

³⁵alah laban orang ke dikemaruhka iya ketegal sida nya ditulung Tuhan. Iya muka baju tanda pemesai pangkat iya, lalu rari baka siku ulun. Iya datai di Antiokia nengah jalai sebelah menua pesisir. Iya ulih ngelepaska diri tang semua soldadu iya abis dibunuh magang.

³⁶Orang nya ke nguji deka mayar chukai ngagai Roma ngena rega orang ke diau di Jerusalem, nusi orang Judah bisi Allah Taala Pemadu Bekuasa nyadi Pengibun sida, lalu sida nya enda mudah alah laban sida talukka semua Adat ti diberi Allah Taala.