Read Iban 2 Makabi 9 Bible Online

2 Makabi 9 - Iban bible

2 Makabi 9

¹Kurang lebih maya nya, Raja Antiokus enggau bala soldadu iya nyurutka diri ari Persia benung menua charut.

²Sebedau nya raja tama ke nengeri Persepolis lalu nguji deka ngerampas rumah sembiang petara bukai, lalu nguasa nengeri nya. Tang orang ke diau di pelilih menua nya angkat ngelaban, lalu muru Raja Antiokus ngujungka iya nyurutka diri enggau ati malu.

³Lebuh raja datai di nengeri Ekbatana, iya dipadahka pasal utai ti nyadi ba raban soldadu Nikanor seduai Timoti.

⁴Raja ringat amat lalu mutus ati deka bebalas ke penyai orang Persia ke udah muru iya ba bansa Judah. Raja enda ngasuh orang ke mai kereta kuda iya ngetu tang terus ke Jerusalem. Enggau sumbung iya bejaku, “Datai aku di Jerusalem, aku deka ngaga nengeri nya nyadi pendam orang Judah.” Tang iya enda nemu Allah Taala udah mutus ati deka ngukum iya.

⁵Udah raja bejaku munyi nya, Tuhan Allah Taala orang Israel ke meda semua utai ngasuh raja nya kena penyakit ti enda ulih dipeda sereta enda ulih disuman. Raja diserang penyakit ba perut lalu enda ulih diubat.

⁶Nya meh ukum ti patut diberi ngagai orang ke udah merinsa orang bukai ngena mayuh bengkah jalai ti bangat tekelalu jai.

⁷Tang utai ti nyadi nya mimit pen enda ngurangka penyumbung raja. Tang ngasuh iya majak sumbung mandangka pengeringat iya ngagai orang Judah. Raja ngasuh kereta kuda laju agi. Ketegal nya raja tepelanting labuh ari kereta kuda ti benung laju amat. Iya terempas balat amat sampaika tubuh iya balat amat pedis.

⁸Penyumbung iya ngasuh iya ngumbai diri bisi kuasa ajih kena merintah ombak di tasik, lalu ulih nimbang semua bukit tinggi ngena dachin. Tang ngenyit raja tepelanting labuh ke tanah, lalu dibai ngena juli.

⁹Raja sakit merinsa amat, lalu ulat pansut ari mata orang ke jai nya. Taja iya agi idup tang isi iya udah but, lalu bau amat sampai semua soldadu iya kejika iya.

¹⁰Laban bau but iya balat amat, nya alai, nadai siku orang deka semak ngesan iya. Taja baru empai lama iya ngumbai diri ulih nyingkau bintang.

¹¹Raja Antiokus majak sakit merinsa laban ukum Allah Taala ninggang iya. Ujung iya, raja nemu diri salah, lalu belabuh berubah ati deka badu sumbung.

¹²Udah nya, ketegal enda tan laban bau but diri empu, iya lalu bejaku, “Semua utai idup mesti tunduk ngagai Allah Taala, lalu enda tau ngumbai diri sabaka enggau Iya.”

¹³Orang jai nya lalu ngaga sempekat enggau Tuhan ke enda kasihka iya agi.

¹⁴Ku Raja, “Suba aku beguai-guai ke Jerusalem laban deka ngerataka iya bela enggau tanah, lalu ngaga iya nyadi pendam orang Judah. Tang diatu aku madahka diri badu ngenusah nengeri nya.

¹⁵Aku kala berunding deka muai bangkai orang Judah enggau bala anak sida ngambi nyadi pemakai jelu mangah enggau semua burung laban aku ngumbai sida enda patut dikubur. Tang diatu aku deka meri sida pengelantang sabaka enggau orang ke diau di nengeri Atens.

¹⁶Suba aku ngerampas Rumah Sembiang tang diatu aku deka nyikap iya enggau chukup ngena pemeri ti manah-manah lalu mulaika semua perengka dalam iya manah agi ari suba. Semua ongkos piring deka dibayar aku ngena duit aku empu.

¹⁷Kelimpah ari nya, aku deka masuk pengarap bansa Judah lalu bejalai ngagai semua endur meritaka kuasa Allah Taala.”

¹⁸Raja Antiokus nyau putus asa. Nadai siti utai ulih nyumanka penyakit iya laban Allah Taala benung ngukum iya setipak enggau penyai iya. Nya alai, iya nulis siti surat ngagai orang Judah. Baka tu ku munyi isi surat nya:

¹⁹“Ari Antiokus, Raja enggau Ketuai Perang nuju orang Judah, rayat aku ke taluk, tabika semua kita.

²⁰Aku ngarapka kita enggau ruang bilik kita gerai nyamai lantang senang baka ti dikedeka kita. Pengandal aku, Allah Taala.

²¹Aku enggau ati gaga ingatka basa enggau pemanah semua kita enggau aku. Lebuh aku ba rantau jalai pulai ari Persia, aku sakit balat amat, nya alai, patut amat aku berundingka pengelantang semua rayat.

²²Aku agi andalka diri ulih suman lalu tetap arapka diri ulih pulai gerai baka selama.

²³Aku agi ingatka apai aku selalu nuduhka orang nganti iya, lebuh iya mansang beperang ngagai menua tunga ke timur Sungai Efrat.

²⁴Iya ngereja utai baka nya nyangka bisi utai nyadi enda disadang, tauka enti bisi berita enda manah, rayat enda irau laban sida nemu sapa bagi orang ke udah diberi kuasa megai menua.

²⁵Aku mega nemu orang ke bekuasa ba sekeda menua pegai aku, benung beratika gaya utai ti nyadi, lalu deka ngambi peluang. Nya alai aku nuduh Antiokus, anak aku empu nganti aku nyadi raja. Aku suah nyerahka iya ngagai kita ngambika dibun kita lebuh aku mansang ngagai menua tunga ke timur Sungai Efrat. Aku mega nulis ngagai iya salin surat tu.

²⁶Aku enggau pengabis ati minta kita ingatka pemanah aku enggau tiap iku kita, nyengkaum bansa kita, lalu pandangka kita amat tetap manah enggau kami duai menyanak.

²⁷Aku andalka anak aku deka nitihka pemintar aku lalu iya deka lurus sereta manah ati enggau semua kita, lalu ulih meri kita utai ti diguna semua kita.”

²⁸Lalu raja nya ke udah munuh mayuh orang sereta nyumpah Allah Taala, majak balat-sebalat merinsa baka pemerinsa orang ke diperinsa iya. Ujung iya, raja nya parai enggau naka pemedis ba bukit di menua bukai.

²⁹Pangan ke semak raja benama Philip mai bangkai iya pulai. Laban Philip takutka anak Antiokus, nya alai iya rari ke Ejip ngelalaika diri ba Raja Ptolemeus Filometor.