Read Iban Matthew 1 Bible Online

Matthew 1 - Iban bible

Matthew 1

¹ Tu tusut pasal Jesus Kristus, ke peturun David, ke peturun Abraham.

²Baka tu ku ripih nama aki ini Iya berengkah ari Abraham nyentuk ngagai Raja David: Abraham, Isak, Jakop, Judah enggau sida menyadi lelaki iya; udah nya Peres enggau Serah (indai seduai iya Tamar), Hesron, Ram, Aminadap, Nason, Salmon, Boas (indai iya Rahap), Obet (indai iya Rut), Jesi enggau Raja David.

⁶ Ari David nyentuk ngagai maya orang Israel dibuai ngagai menua Babilon, baka tu ku ripih nama aki ini Iya: David, Solomon (indai iya udah nyadi bini Uriah), Reheboam, Abijah, Asa, Jehosapat, Joram, Usiah, Jotam, Ahas, Hesekiah, Manasi, Amon, Josiah, enggau Jehoiakin enggau bala menyadi iya.

¹²Ari maya sida dibuai ngagai menua Babilon nyentuk ngagai pengada Jesus, baka tu ku ripih nama aki ini Iya: Jehoiakin, Sealtiel, Serubabel, Abiut, Eliakim, Asor, Sadok, Akim, Eliut, Eleasar, Matan, Jakop, enggau Josep, ke jadi enggau Maria, indai Jesus ke dikumbai Kristus.

¹⁷Nya alai, ari Abraham nyentuk ngagai David, empat belas serak; ari David ngagai maya orang Israel dibuai ngagai menua Babilon, empat belas serak, lalu ari maya nya ngagai pengada Kristus, empat belas serak.

¹⁸ Baka tu ku gaya pengada Jesus Kristus. Indai Iya Maria udah betunang enggau Josep, tang sebedau seduai iya jadi melaki-bini, iya betubuh-bisi ulih kuasa Roh Kudus.

¹⁹Laban tunang iya, Josep, endang orang ke lurus, lalu enggai ngemaluka Maria di mua orang mayuh, nya alai iya berunding deka muai Maria ngena chara belalai.

²⁰Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

²¹ Iya deka ngadaka anak lelaki siku, lalu nuan deka meri Iya nama Jesus, laban Iya deka nyelamatka nembiak Iya ari dosa sida.”

²²Semua utai tu nyadi kena ngamatka jaku ti udah disebut Tuhan beseruanka siku nabi,

²³ “Siku dara bungas deka betubuh-bisi, lalu ngadaka anak lelaki siku, lalu iya deka dikumbai Imanuel” (reti nya, “Allah Taala enggau kitai”).

²⁴Lebuh Josep dani, iya lalu nitihka jaku melikat Tuhan. Iya jadi enggau Maria,

²⁵ tang iya enda beleman enggau Maria sebedau Maria ngadaka anak iya. Josep lalu meri anak mit nya nama Jesus.