Read Iban Matthew 10 Bible Online

Matthew 10 - Iban bible

Matthew 10

¹Jesus lalu ngangauka dua belas iku murid ngagai Iya, lalu meri sida kuasa muru roh ti jai, sereta ngeraika semua macham pemedis enggau penyakit.

²Tu nama sida ke dua belas iku nya: Simon, ke dikumbai Peter, enggau menyadi iya Andrew; James anak Sebedi, enggau menyadi iya John;

³Philip enggau Bartolomew; Thomas enggau Matthew ke pengumpul chukai, James anak Alpius enggau Tadeus;

⁴Simon ke digelar bujang berani, enggau Judas Iskariot, ke nyual Jesus.

⁵Sida ke dua belas iku nya lalu diasuh Jesus bejalai. Ku Iya, “Anang bejalai ngagai orang bansa bukai, tauka ngagai nengeri orang Samaria,

⁶ tang bejalai ngagai orang Israel ke tesat baka bedus.

⁷ Lebuh kita bejalai, padahka Berita Manah tu: ‘Perintah serega nyau semak!’

⁸Geraika orang ke sakit, angkatka orang ke mati pulai idup baru, geraika orang ke sakit lan,[23] buru antu. Kita udah nerima ngena chara pechuma,[24] nya alai beri ngena chara pechuma.[25]

⁹ Anang mai duit emas tauka pirak tauka duit engkeraju.

¹⁰ Anang mai kambut lebuh kita bejalai, tauka baju kena besilih, tauka selipar, tauka tungkat, laban orang ke bekereja endang patut diberi utai ti dipeguna iya.

¹¹“Lebuh kita datai ba nengeri tauka genturung pendiau, giga orang ke deka nerima kita, lalu diau enggau iya datai ke kita angkat ari endur nya.

¹²Lebuh kita tama ngagai rumah orang, beri jaku tabi ngagai rumah nya.

¹³Enti orang dalam rumah nya nerima kita, awakka jaku tabi kita mengkang dia. Tang enti sida enggai nerima kita, ambi pulai baru jaku tabi kita nya.

¹⁴ Lalu enti orang enggai nerima kita tauka enggai mendingka kita, tesai abus ari kaki kita lebuh kita angkat ari rumah tauka ari nengeri nya.

¹⁵ Enggau bendar Aku madah ngagai kita, lebuh Hari Pechara ila, Allah Taala deka lebih agi kasihka orang Sodom enggau orang Gomorah, ari ke kasihka orang ke di nengeri nya!

¹⁶ “Aku ngasuh kita bejalai baka bedus ngagai raban ukui kampung. Nya alai kita enda tau enda pintar baka ular, sereta nelap baka burung achang.

¹⁷ Bejaga kita ari sida, laban sida deka nangkap kita, lalu ngirit kita ngagai kot, lalu nyipat kita dalam balai gempuru sida.

¹⁸ Kita deka kena pechara di mua gabenor enggau raja ketegal Aku, ngambika kita besaksika pasal Aku ngagai sida enggau ngagai orang bansa bukai.

¹⁹Lebuh sida nyerahka kita ngambika kita kena pechara, anang irauka jalai kita deka bejaku tauka utai ti deka disebut kita, laban kita deka diberi utai ti deka disebut kita lebuh maya nya,

²⁰ laban ukai kita ke bejaku, tang Roh Apai kita ti bejaku ngena kita.

²¹ “Menyadi deka nyerahka menyadi ngambika sida dibunuh, lalu apai deka nyerahka anak. Anak deka angkat ngelaban apai indai, lalu ngasuh sida dibunuh.

²² Lalu semua orang deka begedika kita ketegal nama Aku. Tang orang ke tan datai ke ujung, deka diselamatka.

²³ Lebuh sida merinsaka kita ba nengeri siti, rari ngagai nengeri siti, laban enggau bendar Aku madah ngagai kita, kita enda ulih nembuka pengawa kita dalam semua nengeri di menua Israel sebedau Anak Mensia datai.

²⁴ “Murid nadai kala lebih ari pengajar iya, lalu ulun nadai kala lebih ari tuan iya.

²⁵ Nya alai, murid patut nemu puas ati enti iya sebaka enggau pengajar iya, lalu ulun sebaka enggau tuan iya. Enti tuai bilik dikumbai Belsebup, sida sebilik tentu deka dikumbai ngena nama ti jai agi ari nya!

²⁶ “Nya alai, anang takutka sida, laban nadai utai ti ditudung enda dikebakka, tauka dilalaika lalu enda ditemu.

²⁷Utai ti dipadahka Aku ngagai kita dalam petang, enda tau enda ditusui kita lebuh siang hari, lalu utai ti dipetelaika Aku ngagai kita, enda tau enda disadaka kita ari puchuk perabung.

²⁸ Anang takutka sida ke munuh tubuh, tang enda ulih munuh semengat. Tang kita patut nangika Allah Taala ti ulih ngerusak tubuh enggau semengat kita di neraka.[26]

²⁹Ukai enda rega burung pipit ka semina satu sen aja? Taja pia, nadai siku sida deka labuh ke tanah, enti Apai kita enda ngemendarka nya.

³⁰Indah semua lambar buk ba pala kita deh udah diitung magang.

³¹ Nya alai, anang takut. Kita berega agi ari burung pipit!

³² “Nya alai genap iku orang ke ngaku diri nembiak Aku di mua orang, deka diaku Aku di mua Apai Aku di serega.

³³ Tang barang sapa besangkalka Aku di mua orang, deka disangkalka Aku di mua Apai Aku di serega.

³⁴ “Anang ngumbai Aku datai mai pemaik ngagai dunya. Aku ukai datai mai pemaik, tang mai pedang.

³⁵ Aku datai laban Aku deka nyabung anak lelaki ngelaban apai, anak indu ngelaban indai, menantu indu ngelaban mentua indu.

³⁶Munsuh kita ke pemadu jai nya kita sebilik empu.

³⁷ “Orang ke rinduka apai, tauka indai sida lebih agi ari sida ke rinduka Aku, enda tau nyadi murid Aku. Lalu orang ke rinduka anak lelaki tauka anak indu sida lebih ari sida ke rinduka Aku, enda tau nyadi murid Aku.

³⁸ Lalu orang ke enda ngesan regang diri empu lalu nitihka Aku, enda tau nyadi murid Aku.

³⁹ Orang ke ngidupka nyawa diri, deka ngelenyauka iya, lalu orang ke ngelenyauka nyawa diri ketegal Aku, deka ngidupka iya.

⁴⁰ “Barang sapa nerima kita, nerima Aku. Lalu barang sapa nerima Aku, nerima Iya ke ngirumka Aku.

⁴¹Barang sapa nerima seruan Allah Taala, laban iya seruan Allah Taala, deka sama enggau seruan nya bempu upah iya. Lalu barang sapa nerima orang ke manah, laban iya nya orang ke manah, deka sama enggau orang ke manah nya bempu upah iya.

⁴² Lalu barang sapa meri ai irup ngagai murid Aku ke pemadu mit tu, laban iya murid Aku, enggau bendar Aku madah ngagai kita, sida deka nerima upah sida.”