Read Iban Matthew 11 Bible Online

Matthew 11 - Iban bible

Matthew 11

¹ Lebuh Jesus udah tembu ngajar murid Iya ke dua belas iku nya, Iya angkat ari endur nya lalu ngajar sereta nusui Berita Manah dalam nengeri di menua nya.

² Lebuh John Pemaptisa, ke ditutup dalam rumah jil, ninga pasal utai ti dikereja Jesus, iya lalu ngasuh sekeda murid iya mai pesan tu ngagai Jesus,

³ ku iya, “Kati Nuan tu orang ke deka datai, tauka kami nganti orang bukai?”

⁴Disaut Jesus, “Pulai kita lalu padahka ngagai John utai ti didinga enggau dipeda kita:

⁵ orang ke buta, meda; orang ke kait-kupit, bejalai; orang ke sakit lan, dituchi,[27] orang ke bengal, ninga; orang ke mati, diangkatka idup baru, lalu Berita Manah ditusui ngagai orang ke seranta.

⁶Beberekat meh orang ke enda nulak Aku!”

⁷Lebuh sida murid John mupuk, Jesus lalu belabuh bejaku ngagai orang mayuh pasal John: “Nama utai ti deka dipeda kita lebuh kita bejalai di menua puang? Buluh ti beguyat laban ribut?

⁸Nama kebuah kita bejalai ngagai menua puang? Deka meda orang ke ngena gari ti manah? Orang ke ngena gari ti manah diau dalam istana!

⁹ Nama utai ti deka dipeda kita? Deka meda siku nabi? Sigi amat, tang lebih ari nabi.

¹⁰ Nya meh orang ke dikenang dalam Bup Kudus: ‘Aku deka ngasuh seruan Aku bejalai dulu ari Nuan, ti deka nyendiaka jalai ke Nuan.’

¹¹Enggau bendar Aku madah ngagai kita, ari semua orang ke udah diadaka, nadai siku ke besai agi ari John Pemaptisa. Tang Iya ke pemadu mit dalam Perintah serega, lebih agi besai ari iya.

¹² Kenyau ari maya John Pemaptisa, nyentuk ngagai diatu, Perintah serega udah balat diserang, [28] lalu orang ke mangah nguji ngerampas Perintah nya ngena chara ti kasar.

¹³Laban semua sida nabi enggau Adat Moses udah benabi nyentuk ngagai maya John datai,

¹⁴ lalu enti kita deka nerima pesan sida, John nya meh Elijah ke deka datai.

¹⁵ Awakka orang ke bisi pending, ninga.

¹⁶ “Tang baka ni ku Aku mandingka rebak ti diatu? Sida nya baka bala anak mit ke duduk di pasar, lalu bekangauka pangan diri,

¹⁷‘Kami nyepu kesuling ke kita, tang kita enggai betanda! Kami bekeduie nyabak, tang kita enda ngulit!’

¹⁸Laban John datai ukai deka makai ngirup; tang ku sida, ‘Iya dirasuk antu!’

¹⁹Anak Mensia datai, makai ngirup, tang ku sida, ‘Peda orang nya, bam, sereta pemabuk, bepangan enggau orang ke pengumpul chukai, enggau orang ke bedosa!’ Tang penemu-dalam Allah Taala dikamatka ulih utai ti dikereja penemu-dalam nya empu.”

²⁰Jesus lalu belabuh nganu nengeri ti udah alai Iya ngereja mayuh kereja ajih, laban orang dia enda nesal ati ke dosa sida.

²¹ “Tulah meh nuan, Korasin! Tulah meh nuan, Betsaida! Laban enti kereja ajih ti dikereja dalam seduai, udah dikereja di Tire enggau di Sidon, orang dia tentu lama udah nesal ati lalu ngerasukka kain guni, lalu ngerabu diri enggau amau.[29]

²²Tang enggau bendar Aku madah ngagai kita, lebuh Hari Pechara ila, Allah Taala deka lebih agi kasihka orang Tire enggau orang Sidon, ari ti kasihka kita!

²³ Lalu nuan, Kapernaum! Kati nuan deka diangkatka ke serega?[30] Nuan deka dibuai ngagai neraka![31] Laban enti kereja ajih ti dikereja dalam nuan, udah dikereja di Sodom, nengeri nya tentu agi meruan nyentuk ngagai sehari tu!

²⁴ Tang Aku madah ngagai nuan, lebuh Hari Pechara ila, Allah Taala deka lebih agi kasihka Sodom, ari ti kasihka nuan!”

²⁵ Lebuh maya nya Jesus bejaku, “Aku meri terima kasih ngagai Nuan Apai, Tuhan ke bekuasa di serega enggau di dunya, laban Nuan udah ngelalaika utai nya ari orang ke bepenemu-dalam sereta pandai, lalu udah mandangka sida ngagai bala anak mit.

²⁶Sigi amat Apai, laban nya endang peneka Nuan.

²⁷ “Semua utai udah diberi Apai ngagai Aku. Nadai orang ngelala Anak, semina Apai aja, lalu nadai orang ngelala Apai, semina Anak aja, enggau orang ke dipilih Anak alai Iya mandangka Apai.

²⁸ “Datai ngagai Aku semua kita ke lelak ngema utai ti berat, lalu Aku deka ngasuh kita belelak.

²⁹ Ambi lalu san tangkun Aku,[32] lalu belajar ari Aku, laban Aku nelap sereta baruh ati, lalu belelakka semengat kita.

³⁰Laban tangkun Aku mudah, lalu ma Aku lempung.”