Read Iban Matthew 12 Bible Online

Matthew 12 - Iban bible

Matthew 12

¹ Lebuh maya nya, kena hari Sabat, Jesus bejalai nengah umai gandum. Sida murid Iya lapar lalu belabuh ngerurut tangkai gandum, lalu bepakaika igi gandum.

²Tang lebuh orang Parisi meda nya, sida lalu bejaku ngagai Jesus, “Peda Nuan, sida murid Nuan ngereja utai ti enda disagi Adat lebuh hari Sabat!”

³ Ku Jesus bejaku ngagai sida, “Kati kita nadai udah kala macha pasal utai ti dikereja David lebuh iya enggau bala iya lapar,

⁴ pasal iya ke tama ngagai rumah Allah Taala, lalu makai roti ti udah diberi ngagai Allah Taala, ti enda tau diempa iya, nitihka Adat, tauka diempa orang ke enggau iya, tang semina tau diempa imam aja?

⁵ Kati kita nadai udah kala macha dalam Adat, pasal sida imam ke sengaja ngelanggar Adat hari Sabat dalam Rumah Sembiang genap hari Sabat, tang enda dikumbai salah?

⁶ Aku madah ngagai kita, utai ti besai agi ari Rumah Sembiang bisi ditu.

⁷ Lalu enti kita nemu reti jaku, ‘Aku begunaka pengasih, ukai piring’, kita tentu enda ngukum orang ke nadai penyalah,

⁸ laban Anak Mensia Tuhan ke hari Sabat.”[33]

⁹Jesus lalu mupuk ari endur nya, lalu tama ngagai sebuah balai gempuru.

¹⁰Dalam balai gempuru nya bisi siku lelaki ke mati jari sepiak. Lalu sida nanya Jesus, “Kati kitai ngelanggar Adat enti kitai ngeraika orang lebuh hari Sabat?” Sida nanya munyi nya ngambika sida ulih bedawaka Iya.

¹¹ Ku Jesus bejaku ngagai sida, “Baka ni enti siku ari bala kita bisi siku jelu bedus, lalu jelu nya labuh ngagai lubang kebung lebuh hari Sabat, enda ke iya deka ngulihka jelu nya ari lubang nya?

¹² Mensia berega agi ari bedus! Nya alai kitai enda ngelanggar Adat enti kitai ngereja pengawa ti manah lebuh hari Sabat.”

¹³Udah nya Iya lalu bejaku ngagai orang ke mati jari nya, “Unjurka jari nuan.” Orang nya lalu ngunjurka jari iya, lalu jari iya gerai, baka jari iya ti sepiak.

¹⁴ Tang orang Parisi pansut lalu baum ngiga jalai munuh Jesus.

¹⁵ Lebuh Jesus nemu sida bepekat ngelaban Iya, Iya lalu mupuk ari endur nya. Mayuh amat orang nitihka Iya, lalu Iya ngeraika semua sida,

¹⁶lalu nagang sida madahka pasal Iya ngagai orang bukai.

¹⁷Tu ngamatka jaku ti udah disebut Tuhan ngena nabi Isaiah:

¹⁸ “Tu Nembiak Aku ti udah dipilih Aku. Aku rindu sereta gaga ati ke Iya. Aku deka nuang Roh Aku ba Iya, lalu Iya deka madahka atur ti lurus ngagai orang bansa bukai.

¹⁹Iya enda bekelikuh tauka merakka nyawa, lalu Iya enda bejaku inggar ba sebelah jalai raya.

²⁰Iya enggai matahka buluh ti pechah, tauka madamka kelita ti kelap-kelap, datai ke Iya udah ngasuh atur ti lurus menang,

²¹lalu semua orang bansa bukai deka andal ati ke Iya.”

²² Siku lelaki ke buta sereta bisu laban iya dirasuk antu, dibai ngagai Jesus, lalu Iya ngeraika orang nya. Orang nya lalu ulih bejaku sereta meda.

²³Lalu semua orang mayuh balat alit ati, ku sida, “Kati Iya amat Anak David?”

²⁴ Tang lebuh orang Parisi ninga nya, sida lalu bejaku, “Iya muru antu ngena kuasa Belsebup ti nyadi raja antu.”

²⁵Jesus nemu peragam ati sida, lalu ku Iya bejaku ngagai sida, “Genap bengkah menua ti bepechah-belah lalu beripih ngelaban diri empu, deka rusak, lalu nadai nengeri tauka ruang bilik ti bepechah-belah lalu beripih ngelaban diri empu, ulih tan.

²⁶Lalu enti Sitan muru Sitan, iya beripih ngelaban diri empu. Nya alai baka ni ku perintah iya ulih tan?

²⁷Lalu enti Aku muru antu ngena kuasa Belsebup, kuasa sapa dikena bala nembiak kita muru antu? Nya alai sida empu deka nyadi hakim kita.

²⁸Tang enti Aku muru antu ngena kuasa Roh Allah Taala, reti nya Perintah Allah Taala udah datai ba kita.

²⁹ Tauka, baka ni ku orang ulih tama ngagai rumah orang ke kering lalu ngerumpak utai iya, enti iya enda dulu nanchang orang ke kering nya? Udah nya baru iya ulih ngerumpak utai ari rumah orang nya.

³⁰ “Orang ke enda setanah enggau Aku, ngelaban Aku, lalu orang ke enda enggau Aku ngempuru, mambar.

³¹ Nya alai Aku madah ngagai kita: semua dosa ti dikereja mensia enggau jaku busung sida, deka diampun, tang barang sapa bejaku busung ngelaban Roh Kudus, enda diampun.

³² Barang sapa bejaku ngelaban Anak Mensia, deka diampun, tang barang sapa bejaku ngelaban Roh Kudus, enda diampun, nemuka diatu tauka di dunya ti deka datai.

³³ “Intu kayu galak, lalu iya deka mansutka buah ti manah. Enti kitai nejuka kayu ringgas, iya deka mansutka buah ti jai. Kitai ngelala kayu ari buah iya.

³⁴ Kita anak ular! Baka ni ku kita ulih nyebut utai ti manah, enti kita empu endang jai? Laban mulut kita nyebut utai ti ngemenuhka ati kita.

³⁵Orang ke manah mansutka utai ti manah ari ati iya ti manah, lalu orang ke jai mansutka utai ti jai ari ati iya ti jai.

³⁶“Aku madah ngagai kita, lebuh Hari Pechara ila, orang enda tau enda madahka semua leka jaku ti enda menyana ti udah disebut sida,

³⁷laban ulih jaku kita empu kita deka dikumbai lurus, lalu ulih jaku kita empu kita deka diukum.”

³⁸ Udah nya sekeda pengajar Adat enggau orang Parisi bejaku enggau Iya, “Pengajar, kami keran deka meda tanda ari Nuan.”

³⁹ Tang ku Iya nyaut sida, “Rebak ti jai sereta butang tu begigaka tanda, tang nadai tanda deka diberi ngagai sida kelimpah ari tanda nabi Jonah.

⁴⁰ Baka Jonah ke dalam perut ikan paus tiga hari tiga malam, baka nya meh Anak Mensia deka mengkang dalam tanah tiga hari tiga malam.

⁴¹ Orang Nineweh deka angkat sama enggau orang ke ari rebak ti diatu lebuh Hari Pechara ila lalu besalahka sida, laban sida orang Nineweh udah nesal ati ke dosa sida lebuh sida ninga jaku ajar Jonah, lalu diatu utai ti besai agi ari Jonah bisi ditu!

⁴² Kuin menua Sheba deka angkat sama enggau orang ke ari rebak ti diatu lebuh Hari Pechara lalu besalahka sida, laban iya udah datai ari ujung dunya deka mendingka penalam penemu Solomon, lalu diatu utai ti besai agi ari Solomon bisi ditu!

⁴³“Lebuh roh ti jai pansut ari orang, iya bejalai nengah menua ti rangkai ngiga endur alai belelak, tang iya nadai tetemuka endur nya.

⁴⁴Udah nya iya bejaku, ‘Aku deka pulai baru ngagai rumah ti udah ditinggalka aku.’ Lebuh iya datai ba rumah nya, iya nemu rumah nya puang, udah disapu sereta dikemas.

⁴⁵Udah nya iya pansut, lalu mai tujuh iku roh ti bukai, ti jai agi ari iya empu, lalu sida tama lalu diau dia. Lalu pendiau orang nya jai agi ari ti keterubah. Baka nya meh utai ti deka nyadi ba rebak ti jai tu.”

⁴⁶ Lebuh Jesus agi benung bejaku ngagai orang mayuh, indai enggau sida menyadi lelaki Iya bediri di luar, deka bejaku enggau Iya.

⁴⁷Siku orang lalu madah ngagai Iya, “Indai enggau sida menyadi lelaki Nuan bisi di luar, deka bejaku enggau Nuan.”[34]

⁴⁸Tang ku Jesus nyaut orang nya, “Sapa indai Aku, lalu sapa menyadi lelaki Aku?”

⁴⁹Iya lalu nunjuk ngagai sida murid Iya, lalu bejaku, “Tu indai Aku, enggau menyadi lelaki Aku!

⁵⁰ Laban barang sapa ngereja utai ti dikedekaka Apai Aku ti di serega, nya meh menyadi lelaki, menyadi indu, enggau indai Aku.”