Read Iban Matthew 13 Bible Online

Matthew 13 - Iban bible

Matthew 13

¹Ba hari nya mega Jesus pansut ari rumah lalu duduk ba tebing danau.

² Mayuh amat orang begelumu ngelingi Iya. Nya alai Iya nepan sebuah perau, lalu nudukka Diri dia, lalu bala orang mayuh bediri ba tebing.

³Iya lalu madahka mayuh macham utai ngagai sida ngena jaku sempama. Ku Iya, “Orang siku naburka benih.

⁴Lebuh iya naburka benih, sekeda leka benih nya labuh ba jalai raya. Burung datai, lalu makai benih nya.

⁵Sekeda labuh ba tanah ti bebatu ti nadai mayuh tanah, lalu leka benih nya matuk tekala nya, laban tanah dia mabu,

⁶tang lebuh mata panas niki, sida kena panchar mata panas nya lalu layu laban sida nadai urat.

⁷Leka benih ti bukai labuh ba madang duri, lalu duri nya tumbuh lalu ngalahka sida.

⁸Benih ti bukai labuh ba tanah ti ami, lalu bebuah, sekeda mansutka seratus, sekeda enam puluh, lalu sekeda tiga puluh.

⁹Awakka orang ke bisi pending, ninga.”

¹⁰Udah nya sida murid datai lalu bejaku enggau Iya, “Nama kebuah Nuan bejaku ngagai sida ngena jaku sempama?”

¹¹Ku Iya nyaut sida, “Kita udah diberi penemu pasal misteri[35] Perintah serega, tang penemu nya apin diberi ngagai sida.

¹² Laban orang ke bisi utai, deka diberi mayuh agi, lalu iya deka ngembuan mayuh agi utai, tang orang ke nadai utai, indah utai ti mimit ti dikemisi iya deh deka dirampas ari iya.

¹³Nya kebuah Aku bejaku ngagai sida ngena jaku sempama, ngambika sida merening, tang enda meda, mending, tang enda ninga tauka mereti.

¹⁴ Ba sida tu meh jaku nabi Isaiah dikamatka: ‘Kita amat deka mending, tang enda mereti, lalu kita amat merening, tang enda meda.

¹⁵Laban sida enda nemu berunding, lalu pending sida bengal, lalu sida udah nutup mata sida, enggai ke sida meda ngena mata sida, lalu ninga ngena pending sida, lalu mereti ngena ati sida, lalu nguingka diri ngagai Aku, lalu Aku ngeraika sida.’

¹⁶ “Tang beberekat meh mata kita, laban sida meda, enggau pending kita, laban sida ninga.

¹⁷Enggau bendar Aku madah ngagai kita, mayuh nabi enggau orang ke lurus ingin deka meda utai ti dipeda kita, tang nadai meda utai nya, lalu ingin deka mendingka utai ti dipendingka kita, tang nadai ninga utai nya.

¹⁸“Nya alai pendingka sempama penabur benih.

¹⁹Lebuh orang ninga pesan pasal Perintah Allah Taala, lalu enda meretika pesan nya, Sitan datai lalu ngerampas utai ti udah ditaburka ngagai ati orang nya. Nya meh leka benih ti labuh ba jalai raya.

²⁰Nyadi benih ti labuh ba tanah ti bebatu nya orang ke ninga pesan nya lalu tekala nya nerima iya enggau ati ti gaga.

²¹Tang iya nadai urat, lalu semina tan enda lama aja. Lebuh iya dituntung penusah tauka pemerinsa ketegal pesan nya, iya lalu tekala nya mungkir.

²² Benih ti labuh ba madang duri nya orang ke ninga pesan nya, tang pengangkun iya ke dunya, enggau ke pengaya ngalahka pesan nya, lalu pesan nya enda ulih bebuah.

²³Nyadi benih ti labuh ba tanah ti ami nya orang ke ninga pesan nya, lalu meretika iya. Iya lalu bebuah, siku seratus leka, siku enam puluh, lalu siku tiga puluh.”

²⁴ Jesus madahka siti agi jaku sempama ngagai sida. Ku Iya, “Perintah Allah Taala tau dibandingka enggau orang siku ke nanam leka benih ti manah ba umai iya.

²⁵Tang lebuh iya tinduk, munsuh datai lalu nanam leka rumput ba madang gandum nya, lalu mupuk ari endur nya.

²⁶Nya alai lebuh gandum nya tumbuh, lalu murai, rumput mega pegari.

²⁷Bala orang gaji iya datai lalu bejaku ngagai iya, ‘Tuan, ukai enda nuan naburka benih ti manah ba umai nya? Nama kebuah umai nya bisi rumput?’

²⁸Ku tuan nya nyaut, ‘Nya utai dikereja munsuh.’ Lalu ku sida bejaku ngagai iya, ‘Kati nuan deka ngasuh kami nyabut rumput nya?’

²⁹Tang ku iya nyaut, ‘Anang, enggai ke kita techabutka gandum lebuh kita nyabut rumput.

³⁰Awakka gandum enggau rumput nya sama tumbuh nyentuk ngagai maya ngetau. Lebuh maya ngetau ila aku deka bejaku enggau orang ke ngetau, ngasuh sida ngumpul rumput nya dulu, nanchang lalu nunu rumput nya, lalu nyimpan gandum dalam setor aku.’ ”

³¹Jesus madahka siti agi jaku sempama ngagai sida. Ku Iya, “Perintah serega nya baka igi mustard[36] ti dibai orang siku, lalu ditanam iya ba umai iya.

³²Igi mustard nya leka ti pemadu mit ari semua leka utai, tang lebuh iya udah tumbuh, puchuk iya besai, lalu iya nyadi kayu, datai ke burung nyau begagaka tansang ba sebelah dan iya.”

³³ Jesus madahka siti agi jaku sempama ngagai sida. “Perintah serega nya baka ragi ti diambi siku indu lalu dichampurka iya enggau empat puluh liter tepung, datai ke semua tepung nya nyau kembai magang.”

³⁴Semua utai nya dipadahka Jesus ngagai orang mayuh[37] ngena jaku sempama. Iya enda nyebut utai ngagai sida enti enda ngena jaku sempama.

³⁵ Tu ngamatka jaku ti udah disebut beseruanka siku nabi: “Aku deka bejaku ngena jaku sempama, Aku deka nyebut pasal utai ti udah dilalaika kenyau ari penumbuh dunya.”

³⁶Udah nya Iya ninggalka orang mayuh, lalu pulai ke rumah. Sida murid Iya lalu datai ngagai Iya, ku sida, “Padahka ngagai kami reti sempama pasal rumput ti ba umai nya.”

³⁷Ku Jesus nyaut, “Orang ke naburka benih ti manah nya Anak Mensia.

³⁸ Umai nya dunya tu, lalu benih ti manah nya nembiak Perintah Allah Taala. Rumput nya nembiak Sitan,

³⁹lalu munsuh ke nanam leka rumput nya Sitan. Maya ngetau nya pengujung dunya, lalu orang ke ngetau nya bala melikat.

⁴⁰Baka rumput ti digumpul lalu ditunu, baka nya meh gaya utai ti deka nyadi lebuh pengujung dunya:

⁴¹ Anak Mensia deka ngirumka bala melikat Iya, lalu sida deka muai ari Perintah Iya semua utai ti ngasuh bedosa, enggau semua orang ke ngereja penyai,

⁴² lalu nikauka sida ngagai serumbung api, alai orang deka nyabak sereta begerit ngeli.

⁴³ Udah nya baru orang ke lurus deka manchar baka mata hari dalam Perintah Apai sida. Awakka orang ke bisi pending, ninga.

⁴⁴“Perintah serega mega baka reta ti berega ti dilalaika dalam sebidang tanah, ti ditemu orang siku lalu dilamun iya baru. Enggau ati ti gaga iya mupuk lalu nyual semua reta iya, lalu meli tanah nya.”

⁴⁵“Perintah serega mega baka siku orang dagang ke begigaka batu mutiara ti manah.

⁴⁶Iya tetemuka sigi batu mutiara ti berega amat, mupuk lalu nyual semua reta iya, lalu meli batu mutiara nya.

⁴⁷ “Perintah serega mega baka jala ti ditibarka ngagai danau, lalu bulih semua macham ikan.

⁴⁸Lebuh jala nya nyau penuh laban ikan, orang lalu narit jala nya ke tebing, duduk lalu nyimpan ikan ti manah dalam bakul, tang muai ikan ti enda manah.

⁴⁹Baka nya meh gaya utai ti deka nyadi lebuh pengujung dunya. Bala melikat deka datai lalu nyeraraka orang ke jai ari orang ke lurus,

⁵⁰lalu nikauka sida ke jai ngagai serumbung api, alai sida deka nyabak sereta begerit ngeli.

⁵¹“Kati kita meretika semua utai tu?” “Mereti,” ku sida nyaut.

⁵²Lalu ku Iya bejaku ngagai sida, “Nya alai semua pengajar Adat ti udah dilatih bekereja ke Perintah serega nya baka orang ke bempu rumah, ke mansutka ari setor iya utai ti baru, enggau utai ti lama.”

⁵³ Lebuh Jesus udah tembu madahka semua jaku sempama nya, Iya lalu mupuk ari endur nya.

⁵⁴ Lebuh Iya datai ba menua Iya Empu, Iya ngajar orang mayuh dalam balai gempuru. Sida alit ati ke Iya lalu ku sida bejaku, “Dini alai orang tu bulih penemu-dalam tu, enggau kereja ajih tu?

⁵⁵Ukai enda Iya tu anak tukang kayu? Ukai enda indai Iya benama Maria? Lalu ukai enda Iya tu menyadi James, Josep, Simon enggau Judas?

⁵⁶Ukai enda semua menyadi indu Iya bisi ditu enggau kitai? Nya alai dini alai Iya bulih semua utai tu?”

⁵⁷ Nya alai sida nulak Iya. Tang ku Jesus bejaku ngagai sida, “Nabi endang dibasa orang, kelimpah ari di menua enggau dalam ruang bilik iya empu.”

⁵⁸Lalu Iya nadai ngereja mayuh kereja ajih dia, laban sida enda arap.