Read Iban Matthew 14 Bible Online

Matthew 14 - Iban bible

Matthew 14

¹Lebuh maya nya Herod Antipas ke merintah di menua Galili, ninga pasal Jesus,

²lalu ku iya bejaku enggau bala pemesai iya, “Iya tu John Pemaptisa. Iya udah diangkatka ari mati. Nya kebuah kuasa nya bekereja dalam iya.”

³ Laban Herod udah nangkap John, lalu nanchang iya, lalu nutup iya dalam rumah jil, ketegal Herodias, bini menyadi iya Philip,

⁴ laban John udah bejaku ngagai Herod, “Nuan salah jadi enggau iya!”

⁵ Tang taja pen Herod bisi ati deka munuh John, iya takutka orang mayuh, laban sida ngumbai John nabi.

⁶Tang lebuh Herod ngintu hari pengada iya empu, anak indu Herodias betanda di mua bala pengabang, lalu Herod gaga amat ati

⁷datai ke iya nyau besemaya ngena sumpah deka meri ngagai indu nya sebarang utai ti dipinta iya.

⁸Ari asuh indai iya, indu nya lalu bejaku, “Beri ngagai aku ditu pala John Pemaptisa ba atas pinggai!”

⁹Raja lalu tusah ati, tang laban iya udah besemaya di mua semua bala pengabang, iya lalu ngasuh orang ngereja utai ti dipinta indu nya.

¹⁰Iya ngasuh orang mumpung pala John dalam rumah jil,

¹¹lalu pala nya dibai ngena pinggai, lalu disuaka ngagai indu nya. Indu nya lalu mai pala nya ngagai indai iya.

¹²Sida murid John datai, ngambi bangkai John, lalu nguburka iya. Udah nya sida mupuk lalu madah ngagai Jesus.

¹³Lebuh Jesus ninga nya, Iya mupuk keDiri ari endur nya ngena perau ngagai endur ti sunyi. Tang lebuh orang mayuh ninga nya, sida bedarat nitihka Iya ari nengeri sida empu.

¹⁴Lebuh Jesus angkat ari perau, Iya meda mayuh amat orang, lalu Iya sinu ati ke sida, lalu ngeraika sida ke sakit.

¹⁵Lebuh hari nyau lemai, sida murid datai ngagai Iya, lalu bejaku, “Endur tu nadai mensia, lalu hari pen nyau lemai. Asuh orang mayuh tu mupuk, ngambika sida bejalai ngagai genturung pendiau lalu meli pemakai ke diri empu.”

¹⁶Ku Jesus bejaku, “Sida enda ibuh mupuk. Kita empu meri sida utai diempa!”

¹⁷Ku sida bejaku enggau Iya, “Kami semina bisi lima iti tuku roti, enggau dua iku ikan.”

¹⁸Lalu ku Jesus bejaku, “Bai utai nya kitu ngagai Aku.”

¹⁹ Iya lalu ngasuh orang mayuh duduk ba rumput. Iya ngambi lima iti tuku roti enggau dua iku ikan nya, engkadah ke langit, meri terima kasih ke roti enggau ikan nya, mechahka roti nya, lalu nyuaka roti nya ngagai sida murid, lalu sida nyadung roti nya ngagai orang mayuh.

²⁰Lalu semua orang bela makai lalu kenyang magang. Udah nya, sida murid ngumpul dua belas bakul penuh teda pemakai nya.

²¹Pemayuh orang ke makai nya kira lima ribu iku lelaki, enda ngitung sida ke indu enggau anak mit.

²² Udah nya Jesus ngasuh sida murid nepan perau lalu mupuk dulu ke seberai danau nya, lalu Iya Empu ngasuh orang mayuh pulai.

²³Lebuh Iya udah ngasuh orang mayuh pulai, Iya lalu niki ngagai bukit sigi, deka besampi. Lebuh hari nyau lemai, semina Jesus aja bisi dia.

²⁴ Tang ba urung maya nya, perau ti ditepan sida murid nyau udah jauh ari tebing lalu dipangkaka gelumbang, laban sida nanjak ribut.

²⁵Ba entara pukul tiga enggau pukul enam pagi, Jesus mansang ngagai sida, bejalai ba atas ai.

²⁶ Tang lebuh sida meda Iya bejalai ba atas ai, sida balat amat takut, lalu nyerauh, “Antu!”

²⁷Tang Jesus lalu tekala nya bejaku enggau sida. Ku Iya, “Anang takut! Aku tu. Anang takut!”

²⁸Peter lalu nyaut Iya. “Tuhan, enti nya amat Nuan, asuh aku bejalai ba atas ai ngagai Nuan.”

²⁹ Ku Jesus, “Kitu ke nuan!” Peter lalu angkat ari perau lalu bejalai ba atas ai mansang ngagai Jesus.

³⁰Tang lebuh iya meda pemalat ribut, iya takut, lalu lebuh iya baru deka belabuh tengelam, iya lalu nyerauh, “Tuhan, selamatka aku!”

³¹ Jesus lalu tekala nya nyapai iya, lalu bejaku, “Mit amat meh pengarap nuan! Nama kebuah nuan kakang?”

³²Lebuh seduai iya nepan ngagai perau, ribut lalu teduh.

³³ Sida ke dalam perau nya lalu nyembah Iya. Ku sida, “Nuan amat Anak Allah Taala!”

³⁴Lebuh sida udah ngelayang ke seberai, sida lalu sangkai di Genesaret.

³⁵Lalu lebuh orang ke di menua nya ngelala Jesus, sida lalu mesanka orang ari serata menua nya, lalu sida mai ngagai Jesus semua orang ke sakit,

³⁶ minta Iya nejuka sida negu puting kelambi Iya, lalu semua orang ke negu puting kelambi Iya, gerai magang.