Read Iban Matthew 15 Bible Online

Matthew 15 - Iban bible

Matthew 15

¹Udah nya orang Parisi enggau sida pengajar Adat datai ari Jerusalem ngagai Jesus, lalu bejaku,

²“Nama kebuah sida murid Nuan ngelanggar adat asal aki ini kitai, enda masu jari sida sebedau sida makai!”

³Ku Jesus nyaut sida, “Lalu nama kebuah kita ngelanggar pesan Allah Taala ketegal adat asal kita?

⁴ Laban Allah Taala udah meri pesan, ‘Bebasaka apai enggau indai nuan.’ Lalu Allah Taala udah mega bejaku ‘Orang ke bejai apai indai diri, enda tau enda bunuh.’

⁵Tang ku kita, enti orang madah ngagai apai tauka indai iya: ‘Utai ti dipinta nuan ari aku, udah diberi ngagai Allah Taala,’ iya enda ibuh bebasaka apai indai iya.

⁶Nya alai, kita udah nulak jaku Allah Taala ketegal adat asal kita.

⁷Kita tu orang ke pura-pura ngapa![38] Betul amat jaku Isaiah lebuh iya benabika pasal kita!

⁸ ‘Orang tu ngemesaika Aku ngena mulut sida aja, tang ati sida jauh ari Aku.

⁹Sida ngelebuka diri nyembah Aku, laban sida ngajar adat mensia.’ ”

¹⁰Jesus lalu ngangauka orang mayuh ngagai Iya, lalu bejaku ngagai sida, “Pendingka tu ulih kita, ngambika kita mereti!

¹¹ Utai ti tama ngagai nyawa orang, nadai ngasuh iya enda tuchi, tang utai ti pansut ari nyawa iya, nya utai ti ngasuh iya enda tuchi.”

¹²Udah nya, sida murid Iya datai lalu bejaku enggau Iya, “Kati Nuan nemu orang Parisi pedis ati ninga utai ti disebut Nuan?”

¹³ Disaut Jesus, “Semua utai ti tumbuh, ti ukai ditanam Apai Aku ti di serega, deka dichabut magang.

¹⁴ Anang ibuhka sida. Sida nya malin ke buta. Lalu enti malin ke buta ngiring orang ke buta, seduai iya deka sama labuh ngagai lubang kebung.”

¹⁵Tang ku Peter bejaku ngagai Iya, “Padahka reti jaku sempama nya ngagai kami.”

¹⁶Ku Jesus bejaku, “Kati kita empu agi mengkang enda mereti baka sida?

¹⁷Kati kita enda nemu? Utai ti tama ngagai nyawa, tama ngagai perut, lalu udah nya pansut ari tubuh.

¹⁸ Tang utai ti pansut ari nyawa, datai ari ati. Nya utai ti ngamahka mensia.

¹⁹ Laban ari ati pansut runding ti jai, munuh orang, butang, bambai, ngenchuri, besaksi bula, enggau bejakuka orang.

²⁰Nya utai ti ngamahka mensia. Tang makai ngena jari ti enda dibasu, enda ngamahka mensia.”

²¹Jesus angkat ari endur nya lalu mupuk ngagai menua semak nengeri Tire enggau Sidon.

²²Siku indu orang Kanaan ari menua nya mansang ngagai Jesus, lalu ngangau, “Kasihka aku, O Tuhan, Anak David! Anak indu aku balat amat diperinsaka antu.”

²³Tang Jesus enda nyaut iya. Sida murid datai lalu bejaku enggau Iya, “Buru indu nya, laban iya rauh-rauh betitihka kitai!”

²⁴ Jesus lalu nyaut, “Aku udah diasuh datai semina ngagai bedus orang Israel ke tesat.”

²⁵ Tang indu nya datai lalu besugang di mua Jesus, lalu bejaku, “Saup aku, Tuhan!”

²⁶Ku Jesus nyaut, “Aku enda patut ngambi pemakai ari anak mit, lalu nibarka nya ngagai ukui.”

²⁷Indu nya lalu nyaut, “Nya endang amat, Tuhan, tang indah ukui deh makai teda pemakai ti labuh ari mija tuan iya.”

²⁸ Jesus lalu nyaut iya, “Endu, besai pengarap nuan! Utai ti dikedekaka nuan, deka nyadi.” Anak indu iya lalu gerai tekala nya.

²⁹ Jesus lalu mupuk ari endur nya, lalu bejalai ba tebing Danau Galili. Iya lalu niki ngagai bukit sigi, lalu nudukka Diri.

³⁰Mayuh amat orang datai ngagai Iya, mai orang ke kait-kupit, orang ke bisi penimpang, ke buta, ke bisu, enggau mayuh orang bukai ke sakit. Sida ngengkahka sida ke sakit semak kaki Jesus, lalu Iya ngeraika sida.

³¹Orang mayuh balat alit ati meda orang ke bisu, bejaku, orang ke kait-kupit, bejalai, orang ke timpang pendiau, digeraika, lalu orang ke buta, meda; lalu sida muji Allah Taala orang Israel.

³² Jesus ngangauka sida murid Iya ngagai Iya, lalu bejaku, “Aku sinu ati ke sida, laban sida udah enggau Aku tiga hari, lalu nadai utai diempa. Aku enggai ngasuh sida pulai lapar, enggai ke sida lepi di rantau jalai.”

³³Lalu ku sida murid Iya bejaku enggau Iya, “Dini alai kami di menua puang tu ulih nemu pemakai ti chukup kena meri sida makai?”

³⁴Jesus lalu nanya sida, “Berapa iti tuku roti dikemisi kita?” “Tujuh iti, enggau dua tiga iku ikan ti mit,” ku sida nyaut.

³⁵Jesus lalu ngasuh orang mayuh duduk ba tanah,

³⁶ngambi tujuh iti tuku roti enggau ikan nya. Lebuh Iya udah meri terima kasih, Iya mechahka roti enggau ikan nya, lalu meri roti nya ngagai sida murid; sida lalu nyadung utai nya ngagai bala mayuh.

³⁷Semua sida bela makai magang, lalu kenyang. Udah nya sida murid lalu ngumpul tujuh bakul penuh teda pemakai nya.

³⁸Pemayuh orang ke makai nya empat ribu iku lelaki, enda ngitung sida ke indu enggau anak mit.

³⁹Lebuh Jesus udah ngasuh orang mayuh mupuk, Iya nepan perau, lalu mansang ngagai menua Magadan.[39]