Read Iban Matthew 16 Bible Online

Matthew 16 - Iban bible

Matthew 16

¹ Orang Parisi enggau orang Saduki lalu datai ngagai Jesus, deka nguji Iya. Sida minta Iya ngayanka ngagai sida siti tanda ari serega.

²Ku Jesus nyaut sida, “Lebuh hari nyau lemai, kita nyebut, ‘Manah hari pagila, laban langit mirah.’

³Lalu lebuh pagi hari kita nyebut, ‘Kabut hari sehari tu lagi, laban langit mirah sereta mambam.’ Kita nemu madahka gaya hari ari utai ti dipeda kita di langit, tang kita enda nemu macha tanda utai ti nyadi diatu!

⁴ Rebak ti jai sereta enda tetap ati tu begigaka tanda, tang tanda enda diberi, kelimpah ari tanda Jonah.” Iya ninggalka sida, lalu mupuk ari endur nya.

⁵Lebuh sida murid datai di seberai danau nya, sida enda ingat mai roti.

⁶ Ku Jesus bejaku enggau sida, “Bejimat sereta bejaga ari ragi orang Parisi enggau ragi orang Saduki.”

⁷Sida lalu berandau enggau pangan diri. Ku sida, “Kitai nadai mai roti.”

⁸ Tang Jesus nemu utai ti disebut sida, lalu ku Iya, “Mit amat meh pengarap kita. Nama kebuah kita berandauka pasal nadai roti?

⁹ Kati kita lalu apin mereti? Kati kita enda ingatka lima iti roti ke lima ribu iku lelaki? Berapa bakul teda digumpul kita?

¹⁰ Tauka tujuh iti tuku roti ke empat ribu iku orang? Berapa bakul teda digumpul kita?

¹¹Nama kebuah kita lalu enda mereti? Aku ukai bejakuka pasal roti. Bejaga kita ari ragi orang Parisi enggau ragi orang Saduki!”

¹²Nya baru sida nemu Iya ukai ngasuh sida bejaga ari ragi ti dikena ngaga roti, tang bejaga ari ajar orang Parisi enggau ari ajar orang Saduki.

¹³Lebuh Jesus datai semak menua Sesaria Pilipi, Iya lalu nanya sida murid Iya, “Ba penemu orang, sapa Anak Mensia?”

¹⁴ Ku sida nyaut, “Sekeda ngumbai Iya John Pemaptisa. Sekeda ngumbai Iya Elijah, lalu sida ti bukai ngumbai Iya Jeremiah tauka siku ari nabi ti bukai.”

¹⁵Iya lalu nanya sida, “Sapa Aku tu ku kita?”

¹⁶ Simon Peter lalu nyaut, “Nuan tu Kristus, Anak Allah Taala ti idup.”

¹⁷ Jesus lalu nyaut, “Beberekat meh nuan, Simon anak John! Laban mensia nadai madahka utai tu ngagai nuan, tang Apai Aku ti di serega.

¹⁸ Lalu Aku madah ngagai nuan, nuan tu Peter [40] lalu ba batu [41] tu Aku deka nirika gerija[42] Aku, lalu pintu neraka enda ulih ngalahka iya.

¹⁹ Aku deka meri nuan kunchi Perintah serega, lalu sebarang utai ditanchang nuan di dunya tu, deka ditanchang di serega, lalu sebarang utai dibuka nuan di dunya tu, deka dibuka di serega.”

²⁰ Jesus lalu berat-rat enda nyagi sida murid madah ngagai orang Iya nya Kristus.

²¹ Berengkah ari nya, Jesus lalu belabuh madah ngagai sida murid Iya, Iya enda tau enda mansang ngagai Jerusalem lalu natka Diri diperinsaka bala tuai bansa, bala tuai imam, enggau bala pengajar Adat, lalu dibunuh, lalu diangkatka idup baru ari mati ba hari ti ketiga.

²²Peter lalu mai Iya ke tisi, lalu belabuh ngerara Iya. Ku Peter, “Allah Taala enda nyagi utai nya nyadi, Tuhan! Utai nya enda tau sekali-kali nyadi ba Nuan!”

²³ Tang Jesus nguing lalu bejaku ngagai Peter, “Rari ari Aku, Sitan! Nuan mempang jalai Aku, laban nuan berundingka utai mensia, ukai utai Allah Taala.”

²⁴ Jesus lalu madah ngagai sida murid Iya, “Enti orang deka nitihka Aku, awakka iya badu agi berundingka diri empu, ngesan regang iya, lalu nitihka Aku.

²⁵ Laban barang sapa deka ngidupka nyawa diri, deka ngelenyauka iya, lalu barang sapa ngelenyauka nyawa diri ketegal Aku, deka tetemuka iya.

²⁶Laban nama penguntung orang, enti iya bempu semua dunya, tang ngelenyauka nyawa diri? Tauka, nama utai ti patut diberi orang kena iya nyilih nyawa diri?

²⁷ Laban Anak Mensia enggau bala melikat Iya deka datai dalam mulia Apai Iya, lalu ngupah genap iku orang nitihka utai ti udah dikereja sida siku-siku.

²⁸ Enggau bendar Aku madah ngagai kita, sekeda orang ke bediri ditu diatu apin mati sebedau sida meda Anak Mensia datai enggau Perintah Iya.”