Read Iban Matthew 17 Bible Online

Matthew 17 - Iban bible

Matthew 17

¹ Enam hari udah bekau nya, Jesus mai enggau Iya Peter, James enggau menyadi James ke benama John, niki ngagai bukit sigi ti tinggi, kediri sida aja.

²Sida lalu meda gamal Iya berubah. Mua Iya manchar baka mata hari, lalu gari Iya bebali beperenching burak.

³Sida lalu tekala nya meda Moses seduai Elijah pegari lalu bejaku enggau Iya.

⁴Lalu ku Peter bejaku ngagai Jesus, “Tuhan, manah kitai diau ditu! Enti Nuan deka, awakka aku[43] ngaga tiga buah langkau kain ditu, sebuah ke Nuan, sebuah ke Moses, lalu sebuah ke Elijah.”

⁵ Lebuh Peter agi benung bejaku, siti remang ti terang ngayung sida, lalu nyawa bisi didinga bejaku ari dalam remang nya, “Tu Anak ke dikesayauka Aku. Aku rinduka Iya. Pendingka Iya!”

⁶Lebuh sida murid ninga nya, sida lalu nyungkurka diri ke tanah, laban sida kelalu balat takut.

⁷Tang Jesus datai lalu negu sida. Ku Iya, “Angkat. Anang takut!”

⁸Lebuh sida tiga engkadah, sida nadai meda orang bukai, semina Jesus aja.

⁹ Lebuh sida nurun ari bukit nya, Jesus nangkan sida tiga enggau jaku, ku Iya, “Anang madahka pasal genera nya ngagai orang, nyentuk ngagai maya Anak Mensia udah diangkatka idup baru ari mati.”

¹⁰ Sida murid lalu nanya Iya, “Nama kebuah sida pengajar Adat madahka Elijah deka dulu datai?”

¹¹ Disaut Jesus, “Elijah endang amat dulu datai, lalu nyendiaka semua utai.

¹² Tang, Aku madah ngagai kita, Elijah udah datai, lalu sida enda ngelala iya, tang merinsaka Iya sepeneka ati sida. Baka nya mega sida deka merinsaka Anak Mensia.”

¹³Nya baru sida murid nemu Iya bejaku ngagai sida pasal John Pemaptisa.

¹⁴Lebuh sida datai ba bala mayuh, siku orang datai ngagai Jesus, besugang di mua Iya, lalu bejaku,

¹⁵“Tuhan, kasihka anak aku, laban iya sakit gila-babi, lalu balat amat merinsa. Iya suah udah rebah ngagai api, tauka ngagai ai.

¹⁶Aku udah mai iya ngagai sida murid Nuan, tang sida enda ulih ngeraika iya.”

¹⁷Jesus lalu nyaut, “Kita tu orang ke enda tetap ati sereta jai! Ni pengelama Aku enda tau enda begulai enggau kita? Ni pengelama Aku enda tau enda sabar enggau kita? Bai iya kitu ngagai Aku!”

¹⁸Jesus lalu ngerara antu nya, lalu antu nya pansut ari nembiak nya, lalu nembiak nya gerai tekala nya.

¹⁹ Udah nya sida murid datai kediri ngagai Jesus, lalu bejaku, “Nama kebuah kami enda ulih muru antu nya?”

²⁰ Disaut Iya, “Laban kita mit pengarap. Laban, enggau bendar Aku madah ngagai kita, enti kita bisi pengarap ngemesai igi ensabi, kita ulih bejaku ngagai bukit tu, ‘Mindah ari tu ngagai nyin!’ lalu bukit nya deka mindah. Nadai utai enda ulih dikereja kita!

²¹Tang utai bansa tu semina ulih diburu ngena sampi enggau bepasa.”

²²Lebuh semua murid begempuru di Galili, Jesus bejaku ngagai sida, “Anak Mensia deka diserahka ngagai orang

²³lalu sidai deka munuh Iya, lalu Iya deka diangkatka idup baru ari mati ba hari ti ketiga.” Ati sida lalu balat tusah.

²⁴ Lebuh sida datai di Kapernaum, orang ke ngumpul duit pupu ke Rumah Sembiang mansang ngagai Peter, lalu nanya, “Kati pengajar kita enda mayar duit pupu Rumah Sembiang?”

²⁵ “Mayar,” ku Peter nyaut. Lebuh Peter pulai ke rumah, Jesus lalu bejaku dulu enggau iya. Ku Iya, “Baka ni ku penemu nuan, Simon? Ari sapa raja dunya ngambi chukai tauka pupu? Ari peranak menua nya empu, tauka ari orang bukai?”

²⁶“Ari orang bukai,” ku Peter nyaut. Lalu ku Jesus, “Enti pia, peranak menua enda ibuh mayar chukai.

²⁷Tang ngambika sida enda pedis ati, alai nuan mupuk ngagai danau, lalu ulurka ginti. Dalam nyawa ikan ti terubah diejut nuan, nuan deka tetemuka sesingkap duit.[44] Bai duit[45] nya lalu beri ngagai sida, ke Aku enggau ke nuan.”