Read Iban Matthew 18 Bible Online

Matthew 18 - Iban bible

Matthew 18

¹ Lebuh maya nya, sida murid datai ngagai Jesus, lalu nanya, “Sapa orang ke pemadu besai dalam Perintah serega?”

²Iya lalu ngangauka siku anak mit, lalu ngasuh iya bediri ba tengah-tengah sida.

³ Iya lalu bejaku, “Enggau bendar Aku madah ngagai kita, enti kita enda berubah lalu nyadi baka anak mit, kita enda ulih tama ngagai Perintah serega.

⁴Barang sapa ngemaruhka diri baka anak mit tu, deka nyadi orang ke pemadu besai dalam Perintah serega.

⁵ Barang sapa nerima anak mit baka tu dalam nama Aku, nerima Aku.

⁶ Enti kita ngasuh siku ari sida ke mit ke arapka Aku, bedosa, manah agi enti batu kisar ti besai ditanchangka ba rekung orang nya, lalu iya dibuai ngagai tasik ti dalam.

⁷Tulah meh dunya laban utai ti ngasuh mensia bedosa! Penguji endang enda tau enda datai, tang tulah orang ke ngasuh penguji nya datai!

⁸ Lalu enti jari tauka kaki nuan mai nuan bedosa, tetak lalu buai iya! Manah agi nuan tama ngagai pengidup nadai jari tauka kaki sepiak, ari ke bisi dua piak jari tauka kaki, tang nuan dibuai ngagai api ti enda nemu padam.

⁹ Lalu enti mata nuan mai nuan bedosa, keruk lalu buai iya! Manah agi nuan tama ngagai pengidup mai sigi aja leka mata, ari ke bisi dua igi leka mata, tang nuan dibuai ngagai api neraka.[46]

¹⁰ “Bejimat kita, enggai ke kita mechat sida ke mit tu. Laban, Aku madah ngagai kita, di serega din melikat sida endang seruran bediri di mua Apai Aku di serega.

¹¹Laban Anak Mensia datai ngambika Iya nyelamatka orang ke tesat.

¹²“Baka ni ku pikir kita? Enti orang siku bisi seratus iku bedus, lalu siku bedus nya lenyau, enda ke iya deka ninggalka sida ke semilan puluh semilan iku ba bukit, lalu bejalai ngiga siku ti lenyau nya?

¹³Lalu lebuh iya udah tetemuka bedus nya, enggau bendar Aku madah ngagai kita, iya deka lebih agi gaga ati ke bedus siku nya ari ke sida ke semilan puluh semilan iku ti enda lenyau.

¹⁴Baka nya meh Apai kita [47] ti di serega enggai nejuka indah siku ari sida ke mit tu lenyau.

¹⁵ “Enti menyadi [48] nuan bedosa ngelaban nuan,[49] mansang nuan ngagai iya, lalu padahka penyalah iya ngagai iya, entara seduai aja. Enti iya mendingka nuan, reti nya nuan udah ulih nguingka ati iya.

¹⁶ Tang enti iya enggai mendingka nuan, bai siku tauka dua iku orang enggau nuan, ngambika ‘genap leka jaku ditetapka beduduk ba saksi dua tauka tiga iku orang.’

¹⁷Enti iya enggai mendingka sida, padahka ngagai gerija.[50] Lalu enti iya enggai mendingka gerija, gaga iya baka ke ngaga orang bansa bukai, tauka pengumpul chukai.

¹⁸ “Enggau bendar Aku madah ngagai kita: sebarang utai ditanchang kita di dunya tu, deka ditanchang di serega, lalu sebarang utai dibuka kita di dunya tu, deka dibuka di serega.

¹⁹ “Aku madah ngagai kita baru: enti dua iku kita di dunya tu besetujuka utai ti dipinta kita, utai nya deka dikereja ke kita ulih Apai Aku ti di serega.

²⁰Laban lebuh dua tauka tiga iku orang begempuru dalam nama Aku, Aku bisi dia enggau sida.”

²¹ Udah nya Peter datai ngagai Iya lalu bejaku, “Tuhan, enti menyadi [51] aku bedosa ngelaban aku, berapa penyuah aku patut ngampun iya? Tujuh kali?”

²² Ku Jesus madah ngagai iya, “Ukai tujuh kali, tang tujuh puluh kali tujuh.

²³ Nya alai Perintah serega tau dibandingka enggau siku raja ke deka meresa akaun bala orang gaji iya.

²⁴Lebuh iya baru deka belabuh ngereja pengawa nya, siku orang gaji, ke udah nginjau bejuta-juta ringgit, dibai betemu enggau iya.

²⁵ Laban orang gaji nya enda tebayarka utang diri, nya alai raja lalu ngasuh iya dijual, sama enggau bini enggau bala anak iya, sereta enggau semua reta tengkira iya, kena mayar utang nya.

²⁶ Ulun nya lalu besugang di mua raja, minta kasih ari raja. Ku iya, ‘Aku minta nuan sabar enggau aku. Aku deka mayar semua utang aku!’

²⁷Laban raja nya kasihka ulun iya nya, nya alai iya ngelepaska iya, lalu muai utang iya.

²⁸Tang lebuh ulun nya pansut, iya betemu enggau orang siku ke sama ulun baka iya empu, ke berutang semina mimit aja ba iya. Iya nyekal orang nya, lalu bejaku, ‘Bayar utang nuan!’

²⁹Orang ke dichekal iya lalu besugang, minta kasih ngagai iya, ‘Aku minta nuan sabar enggau aku. Aku deka mayar nuan!’

³⁰Tang iya enda sabar enggau orang nya. Iya lalu nutup orang nya dalam rumah jil, datai ke orang nya udah mayar utang iya.

³¹Lebuh orang gaji ti bukai meda nya, sida tusah amat ati, lalu madahka semua pekara nya ngagai raja.

³²Raja lalu ngangauka ulun iya nya, lalu bejaku ngagai iya, ‘Nuan tu ulun ti jai! Aku udah muai semua utang nuan, laban nuan minta aku muai utang nya.

³³Kati nuan enda nemu kasihka orang ke sama ulun baka nuan empu, baka aku ke udah kasihka nuan?’

³⁴Raja balat amat pedis ati, lalu ngasuh ulun nya ditutup dalam rumah jil, datai ke iya udah mayar semua utang iya.

³⁵ Baka nya meh Apai Aku ti di serega deka ngereja ngagai genap iku kita, enti kita enda ngampun menyadi kita enggau pengabis ati kita.”