Read Iban Matthew 19 Bible Online

Matthew 19 - Iban bible

Matthew 19

¹ Lebuh Jesus udah badu nyebut semua utai nya, Iya mupuk ari menua Galili lalu bejalai ngagai menua Judea, di seberai Sungai Jordan.

²Mayuh amat orang nitihka Iya, lalu Iya ngeraika sida dia.

³Sekeda orang Parisi lalu datai ngagai Iya, deka nguji Iya. Ku sida, “Kati laki tau muai bini atas sebarang tegal?”

⁴Disaut Jesus, “Kati kita nadai udah kala macha pasal Allah Taala ti ngaga mensia lelaki enggau indu kenyau ari pun kelia?

⁵ Ku Iya bejaku, ‘Ketegal nya, lelaki deka ninggalka apai enggau indai iya, lalu begulai enggau bini iya, lalu seduai iya deka nyadi setubuh’?

⁶Seduai iya ukai dua iku agi, tang siku. Nya alai, nadai orang tau nyeraraka utai ti udah ditampilka Allah Taala.”

⁷ Ku orang Parisi nanya Iya, “Enti pia, nama kebuah Moses ngasuh laki meri surat sarak lalu muru bini diri?”

⁸Disaut Jesus, “Moses ngemendarka kita muai bini kita, laban kita kieh. Tang utai tu ukai baka nya kenyau ari pun.

⁹ Nya alai, Aku madah ngagai kita, barang sapa muai bini, kelimpah ari bini iya butang, lalu orang nya bebini baru, iya butang.”

¹⁰Ku sida murid bejaku enggau Iya, “Enti nya adat entara laki enggau bini, manah agi enda bebini.”

¹¹ Tang ku Jesus bejaku ngagai sida, “Ukai semua orang ulih nerima ajar tu, tang semina orang ke diberi ajar tu.

¹²Laban sekeda orang ada nadai perengka tubuh kena bebini. Bisi mega orang nadai perengka nya ari asuh mensia. Bisi mega orang ke sengaja muai perengka tubuh diri ketegal Perintah serega. Awakka orang ke ulih nerima ajar tu, nerima iya.”

¹³Anak mit lalu dibai ngagai Iya, ngambika Iya ngengkahka jari Iya atas sida, lalu besampika sida. Tang murid Iya balat amat ngerara orang ke mai sida anak mit nya.

¹⁴Tang ku Jesus bejaku, “Awakka anak mit datai ngagai Aku, lalu anang nagang sida, laban Perintah serega diempu orang ke baka sida tu.”

¹⁵Iya lalu ngengkahka jari Iya atas sida, lalu mupuk ari endur nya.

¹⁶Nyadi sekali, siku orang datai ngagai Jesus, lalu nanya, “Pengajar, nama pengawa ti manah ti enda tau enda dikereja aku ngambika aku tau bulih pengidup ti meruan belama iya?”

¹⁷Ku Jesus bejaku ngagai iya, “Nama kebuah nuan nanyaka utai ti manah ngagai Aku? Ka semina siku aja ti manah. Enti nuan keran deka tama ngagai pengidup ti meruan belama iya, titihka pesan.”

¹⁸ Orang nya lalu nanya, “Pesan ni?” Disaut Jesus, “Anang munuh orang. Anang butang. Anang ngenchuri. Anang besaksi bula.

¹⁹ Bebasaka apai enggau indai nuan, lalu rinduka pangan nuan baka nuan ti rinduka diri empu.”

²⁰Ku orang bujang nya nyaut, “Semua pesan nya udah dititihka Aku magang. Nama utai bukai ti enda tau enda dikereja aku?”

²¹ Ku Jesus bejaku ngagai iya, “Enti nuan deka nyadi pemadu badas, mupuk nuan lalu jual semua reta tengkira nuan, lalu beri duit nya ngagai orang ke seranta, lalu nuan deka bisi pengaya di serega. Udah nya datai lalu titihka Aku.”

²²Lebuh orang bujang nya ninga nya, iya angkat ari endur nya tusah ati laban iya orang ke kaya bendar.

²³ Jesus lalu bejaku enggau sida murid Iya, “Enggau bendar Aku madah ngagai kita, mar amat meh orang ke kaya tama ngagai Perintah serega.

²⁴Aku nandu nya baru: nyamai agi jelu unta tama nengah lubang jarum ari orang ke kaya tama ngagai Perintah Allah Taala.”

²⁵Lebuh sida murid ninga nya, sida alit ati, lalu nanya, “Enti pia, sapa ulih diselamatka?”

²⁶ Jesus merening ngagai sida, lalu bejaku, “Ba mensia, utai tu enda ulih, tang ba Allah Taala semua utai ulih magang.”[52]

²⁷ Peter lalu bejaku, “Peda Nuan, kami udah ninggalka semua utai lalu nitihka Nuan. Nama utai ulih kami?”

²⁸ Ku Jesus bejaku ngagai sida, “Enggau bendar Aku madah ngagai kita, lebuh Anak Mensia duduk ba kerusi diraja Iya ti bemulia ba dunya ti baru, kita ke udah nitihka Aku deka mega duduk ba dua belas iti kerusi diraja, ngakim dua belas raban bansa orang Israel.

²⁹Lalu genap iku orang ke udah ninggalka rumah, tauka menyadi lelaki, tauka menyadi indu, tauka apai, tauka indai, tauka anak, tauka umai, ketegal nama Aku, deka nerima seratus kali mayuh agi, lalu deka diberi[53] pengidup ti meruan belama iya.

³⁰ Tang mayuh ke dulu deka nyadi dudi, lalu orang ke dudi deka nyadi dulu.