Read Iban Matthew 2 Bible Online

Matthew 2 - Iban bible

Matthew 2

¹Lebuh Jesus ada di nengeri Betlehem, dalam menua Judea, lebuh rambau Herod nyadi raja, orang ke pandai pasal bintang datai ari Timur ngagai Jerusalem.

² Ku sida nanya, “Dini alai anak mit ke deka nyadi raja orang Judah ada? Kami bisi meda bintang Iya pegari di timur, lalu kami datai deka nyembah Iya.”

³Lebuh Raja Herod ninga nya, iya enggau semua orang di Jerusalem lalu irau ati.

⁴Iya lalu ngempuruka semua tuai imam enggau sida pengajar Adat, lalu nanya ngagai sida endur alai Kristus ada.

⁵ Ku sida madah ngagai iya, “Di nengeri Betlehem dalam menua Judea, laban utai tu udah ditulis siku nabi:

⁶ ‘Nuan Betlehem ti di menua Judah, nuan ukai nengeri ti pemadu mit enti dibandingka enggau pemerintah ti bukai di menua Judah, laban ari nuan deka datai siku pemerintah ti deka nyadi pengibun[1] nembiak Aku Israel.’ ”

⁷Herod lalu mesanka orang ke pandai pasal bintang nya, lalu nemu ari sida maya bintang nya pegari.

⁸Iya lalu ngasuh sida mupuk ngagai Betlehem. Ku iya, “Mupuk meh kita, lalu giga enggau bebendar endur alai anak mit nya, lalu lebuh kita udah tetemuka Iya, padahka ngagai aku, ngambika aku ulih mega datai lalu nyembah Iya.”

⁹Sida lalu mupuk, lalu bintang ti udah dipeda sida di Timur bejalai dulu ari sida datai ke iya nyau ngetu ari atas endur alai anak mit nya.

¹⁰Lebuh sida meda bintang nya, sida gaga amat ati.

¹¹ Sida tama ngagai rumah nya, lalu meda anak mit nya, enggau indai Iya Maria. Sida besugang lalu nyembah Iya. Udah nya sida muka ma sida, lalu meri ngagai Iya emas, menyan, enggau mur.

¹² Sida lalu pulai ngagai menua sida empu nengah jalai bukai laban sida udah diberi jaku tangkan dalam mimpi, enda nyagi sida pulai ngagai Herod.

¹³Lebuh sida udah mupuk, siku melikat Tuhan pegari di mua Josep dalam mimpi, lalu bejaku ngagai iya, “Angkat nuan. Bai anak mit nya enggau indai Iya rari ngagai menua Ejip. Diau dia nyentuk ngagai maya aku ngasuh nuan ninggalka menua nya, laban Herod baru deka ngiga anak mit nya, lalu munuh Iya.”

¹⁴Josep lalu angkat, mai anak mit nya enggau indai Iya malam nya, lalu mupuk ngagai menua Ejip.

¹⁵ Sida diau di menua nya nyentuk ngagai maya pemati Herod. Tu ngamatka jaku ti udah disebut Tuhan beseruanka siku nabi, “Aku ngangauka Anak Aku pansut ari menua Ejip.”

¹⁶Lebuh Herod nemu diri udah ditipu orang ke pandai pasal bintang nya, iya pedis ati. Iya lalu meri atur ngasuh semua anak mit ke lelaki, ke umur dua taun ke baruh, di Betlehem enggau di menua ti ngelingi nengeri nya, dibunuh magang, nitihka maya ti udah ditemu iya ari orang ke pandai pasal bintang nya.

¹⁷Nya meh jalai jaku Tuhan ti disebut nabi Jeremiah dikamatka:

¹⁸ “Munyi nyawa bisi didinga di Ramah, munyi orang ke bekeduie nyabak. Rachel nyabakka bala anak iya. Iya enggai diperindang, laban sida nadai agi.”

¹⁹ Lebuh Herod udah mati, siku melikat Tuhan pegari dalam mimpi ngagai Josep di menua Ejip, lalu bejaku,

²⁰“Angkat. Bai anak mit nya enggau indai Iya, lalu pulai ngagai menua Israel, laban orang ke deka munuh Iya, udah mati.”

²¹Josep lalu angkat, mai anak mit nya enggau indai Iya, lalu pulai ngagai menua Israel.

²²Tang lebuh Josep ninga Arkelaus udah nganti apai iya Herod nyadi raja menua Judea, iya takut mansang ngagai menua nya, lalu lebuh iya udah diberi jaku tangkan dalam mimpi, iya lalu mupuk ngagai pelilih menua Galili,

²³ Iya lalu diau ba sebuah nengeri ti dikumbai Nasaret. Tu ngamatka jaku ti udah disebut Tuhan beseruanka sida nabi: “Iya deka dikumbai Orang Nasaret.”