Read Iban Matthew 20 Bible Online

Matthew 20 - Iban bible

Matthew 20

¹ “Laban Perintah serega nya baka orang siku ke mupuk tumu pagi ngiga orang ke tau digaji iya gawa ba kebun anggur iya.

²Lebuh iya udah besetuju deka meri gaji sesingkap duit pirak[54] sehari ngagai siku-siku sida, iya lalu ngasuh sida bekereja ba kebun anggur iya.

³Iya mupuk baru ke pasar ba urung pukul semilan, lalu tepedaka sekeda orang ke lelaki beketegir ngapa enda gawa.

⁴Iya lalu bejaku ngagai sida, ‘Alai kita gawa ba kebun anggur. Aku deka meri kita gaji ti patut.’ Sida lalu mupuk.

⁵Iya ngereja baka nya baru ba urung pukul dua belas, enggau ba urung pukul tiga.

⁶Ba urung pukul lima, iya bejalai ke pasar, lalu tepedaka sekeda lelaki ti bukai mengkang beketegir enda gawa. Lalu ku iya bejaku ngagai sida, ‘Nama kebuah kita masau jam sehari-hari tu enda gawa?’

⁷Sida lalu nyaut, ‘Laban orang nadai ngasuh kami gawa.’ Ku iya bejaku ngagai sida, ‘Alai kita gawa ba kebun anggur.’

⁸ “Lebuh hari nyau lemai, orang ke bempu kebun nya lalu madah ngagai mandur, ‘Kangauka bala orang gaji lalu bayar gaji sida, belabuh ari sida ke pemadu dudi, nyentuk ngagai sida ke pemadu dulu.’

⁹Lebuh orang gaji ke berengkah gawa ari pukul lima datai, sida lalu dibayar sesingkap duit pirak siku.

¹⁰Lebuh orang ke pemadu dulu gawa datai, sida ngumbai diri deka nerima gaji ti besai agi. Tang sida mega diberi sesingkap duit pirak siku.

¹¹Lebuh sida nerima gaji nya, sida lalu mut-mut ngagai orang ke ngaji sida.

¹²Ku sida, ‘Orang ke pemadu dudi semina bekereja sejam aja, lalu nuan udah ngaga gaji sida sebaka enggau gaji kami ke udah bekereja sehari-hari tu natka diri laban panas.’

¹³ Tang ku iya nyaut sida, ‘Unggal, nadai aku ngakal nuan. Ukai enda nuan empu ke besetujuka gaji sesingap duit pirak?[55]

¹⁴Ambi gaji nuan, lalu pulai. Aku empu ke meri gaji ngagai orang ke pemadu dudi tu ngenyampau ti diberi aku ngagai nuan.

¹⁵ Kati aku enda tau ngena duit aku sepeneka ati aku? Tauka nuan kepapas meda aku gerah mudah meri utai ngagai orang?’[56]

¹⁶ Nya alai, orang ke dudi deka nyadi dulu, lalu orang ke dulu deka nyadi dudi.”

¹⁷ Lebuh Jesus mansang ngagai Jerusalem, Iya mai murid ke dua belas iku ke tisi lebuh sida benung di rantau jalai, lalu bejaku ngagai sida,

¹⁸“Dinga kita, kitai deka mupuk ngagai Jerusalem, lalu Anak Mensia deka diserahka ngagai bala tuai imam, enggau ngagai bala pengajar Adat, lalu sida deka ngasuh Iya diukum bunuh.

¹⁹Sida deka nyerahka Iya ngagai orang bansa bukai, ti deka beduan Iya, nyipat Iya, lalu ngeregang Iya. Tang ba hari ti ketiga Iya deka diangkatka idup baru.”

²⁰ Udah nya bini Sebedi datai ngagai Jesus, mai anak lelaki iya ke dua iku. Iya besugang di mua Jesus, lalu minta Iya ngereja siti utai.

²¹ Jesus lalu nanya iya, “Nama utai dipinta nuan?” Ku bini Sebedi nyaut, “Awakka anak aku dua iku tu duduk muak ari kanan enggau ari kiba Nuan dalam Perintah Nuan.”

²² Tang ku Jesus nyaut iya, “Kita enda nemu utai ti dipinta kita. Kati seduai ulih ngirup ari mangkuk ti deka diirup Aku?” Seduai iya lalu nyaut, “Ulih.”

²³ Ku Jesus bejaku ngagai seduai iya, “Seduai deka ngirup ari mangkuk Aku, tang pasal duduk muak ari kanan enggau ari kiba Aku, Aku nadai kuasa ngeletak nya. Penuduk nya udah disediaka Apai Aku ke orang ke bempu kerusi nya.”

²⁴Lebuh murid ke sepuluh iku ninga nya, sida lalu pedis ati ngagai seduai menyadi nya.

²⁵ Tang Jesus ngangauka sida, lalu bejaku, “Kita nemu, orang ke merintah orang bansa bukai, nekanka pengidup orang ke dipegai sida, lalu bala tuai sida merinsaka sida.

²⁶ “Tang ba kita utai nya enda baka nya. Barang sapa deka nyadi orang ke besai ba bala kita, enda tau enda nyadi kuli semua kita,

²⁷lalu barang sapa deka nyadi dulu ba bala kita, enda tau enda nyadi ulun kita,

²⁸ baka Anak Mensia ke datai ukai minta Diri dibela, tang laban Iya deka mela, lalu nyerahka nyawa Diri kena nebus orang mayuh.”

²⁹ Lebuh sida mupuk ari Jeriko, mayuh amat orang nitihka Iya.

³⁰Nyadi ba endur nya bisi dua iku orang buta duduk ba tisi jalai. Lebuh seduai iya ninga Jesus mansa, seduai iya lalu ngangau, “Kasihka kami, Anak David!”[57]

³¹Bala orang mayuh lalu balat amat ngerara seduai iya, ngasuh seduai iya badu agi ragak. Tang seduai iya ngangau inggar agi, “Tuhan, Anak David, kasihka kami!”

³²Jesus ngetu, lalu ngangauka seduai iya. Ku Iya, “Nama utai ti diasuh seduai kereja Aku ke seduai?”

³³Ku seduai iya bejaku, “Tuhan, awakka kami duai ulih meda!”

³⁴Jesus sinu ati ke seduai iya. Iya negu mata seduai iya, lalu tekala nya seduai iya ulih meda. Seduai iya lalu nitihka Jesus.