Read Iban Matthew 21 Bible Online

Matthew 21 - Iban bible

Matthew 21

¹ Lebuh Jesus enggau sida murid Iya nyau datai semak Jerusalem, lalu udah datai di Betpagi ba Bukit Kana, Jesus bejaku enggau dua iku murid.

²Ku Iya, “Alai seduai mupuk ngagai nengeri ti di mua nyin. Din seduai deka nemu siku keledai ditanchang, enggau anak iya ngimbai iya. Buka tali jelu dua iku nya, lalu bai seduai iya ngagai Aku.

³Enti orang bisi bejaku ngagai seduai, sebut aja munyi tu, ‘Tuhan begunaka seduai iya.’ Lalu iya deka ngasuh seduai mai jelu nya tekala nya.”

⁴Utai tu nyadi kena ngamatka jaku ti udah disebut Tuhan beseruanka siku nabi:

⁵ “Padahka ngagai anak indu Sion, Peda kita, Raja kita datai ngagai kita. Iya baruh ati, lalu nepan keledai enggau nepan keledai ti agi biak, ti anak keledai.”

⁶Murid ke dua iku nya mupuk, lalu ngereja utai ti diasuh Jesus.

⁷Seduai iya mai keledai enggau anak keledai nya, lalu ngelempaika serayung seduai iya ba belakang jelu dua iku nya, lalu Jesus nepan ba jelu nya.

⁸ Mayuh amat orang nganchau serayung sida ba jalai raya, lalu sida ti bukai nyarau lalu nganchau dan kayu ba jalai raya nya.

⁹ Lalu bala orang ke bejalai dulu ari Iya enggau ke ngentudika Iya manjung: “Hosanna ke[58] Anak David! Beberekat meh Iya ke datai dalam nama Tuhan! Hosanna[59] ba serega ti pemadu tinggi!”[60]

¹⁰Lalu lebuh Iya tama ngagai Jerusalem, semua orang dalam nengeri nya begau magang. Ku sida nanya, “Sapa orang nya?”

¹¹ Lalu ku orang mayuh nyaut, “Iya nya nabi Jesus ke datai ari Nasaret di menua Galili.”

¹² Udah nya Jesus tama ngagai Rumah Sembiang lalu muru semua orang ke bejual-bebeli dalam Rumah Sembiang nya. Iya nungkupka mija orang ke penukar wang, enggau bangku orang ke nyual burung achang.

¹³ Ku Iya bejaku ngagai sida, “Endang udah ditulis, ‘Rumah Aku deka dikumbai rumah sembiang.’ Tang kita ngaga iya nyadi sarang perumpak!”

¹⁴Orang ke buta, enggau orang ke kait-kupit datai ngagai Iya dalam Rumah Sembiang, lalu Iya ngeraika sida.

¹⁵ Tang lebuh sida tuai imam enggau sida pengajar Adat meda utai ti badas ti dikereja Iya, sereta meda bala anak mit manjung dalam Rumah Sembiang, “Hosanna[61] ke Anak David!” sida pedis ati

¹⁶ lalu bejaku ngagai Iya, “Kati Nuan bisi ninga utai ti disebut sida?” Jesus lalu nyaut sida, “Bisi. Kati kita nadai udah kala macha: ‘Nuan udah ngasuh pantun puji ti pemadu badas pansut ari mulut bala anak mit, enggau anak mit ke benung nusu.’ ”

¹⁷ Jesus ninggalka sida, pansut ari nengeri nya, mansang ngagai Betani, lalu bemalam dia.

¹⁸Lebuh Iya mulaika Diri ngagai nengeri tumu pagi hari siti, Iya lapar.

¹⁹Iya tepedaka sepun kayu ara ba tisi jalai. Iya lalu mansang ngagai kayu nya. Tang Iya nadai nemu utai dia, semina daun aja. Lalu ku Iya bejaku ngagai kayu nya, “Awakka nuan enda agi bebuah!” Kayu ara nya lalu layu tekala nya.

²⁰ Lebuh sida murid meda nya, sida balat alit ati. Ku sida, “Baka ni ku kayu ara nya tak layu tekala nya?”

²¹ Lalu ku Jesus nyaut sida, “Enggau bendar Aku madah ngagai kita, enti kita arap lalu enda kakang ati, kita ulih ngereja utai ti udah dikereja Aku ngagai kayu ara tu. Lalu ukai semina nya aja, tang kita ulih bejaku ngagai bukit tu, ‘Angkat nuan lalu buai diri empu ngagai tasik,’ lalu utai nya deka nyadi.

²² Enti kita arap, kita deka nerima sebarang utai ti dipinta kita dalam sampi.”

²³Lebuh Jesus tama ngagai Rumah Sembiang, sida tuai imam, enggau sida tuai bansa datai ngagai Iya lebuh Iya benung ngajar, lalu nanya Iya, “Kuasa apa kena Nuan ngereja utai tu, lalu sapa meri Nuan kuasa nya?”

²⁴Disaut Jesus, “Aku pen deka mega nanya kita siti tanya. Enti kita tesautka Aku, nya baru Aku deka madah ngagai kita kuasa ti dikena Aku ngereja utai tu.

²⁵Kati pemaptisa John datai ari serega tauka ari mensia?” Sida lalu bekelikuh enggau pangan diri. Ku sida, “Enti kitai nyebut, ‘Ari serega,’ Iya deka nyebut ngagai kitai, ‘Enti pia, nama kebuah kita enda arapka iya?’

²⁶ Tang enti kitai nyebut, ‘Ari mensia,’ kitai takutka orang mayuh, laban semua sida ngumbai John nabi.”

²⁷Nya alai sida lalu nyaut Jesus, “Enda kami nemu.” Lalu ku Iya bejaku enggau sida, “Aku pen enggai meh madah ngagai kita kuasa ti dikena Aku ngereja utai tu.”

²⁸ “Baka ni ku runding kita? Orang siku bisi dua iku anak lelaki. Iya mansang ngagai anak iya ke tuai agi, lalu bejaku, ‘Anak, alai nuan gawa ba kebun anggur sehari tu.’

²⁹Lalu ku anak tuai iya nyaut, ‘Enggai.’ Tang udah nya, iya ngubah runding diri, lalu nurun gawa.

³⁰Udah nya apai iya mansang ngagai anak iya ke biak agi, lalu bejaku munyi nya mega enggau iya. ‘Au, tuan,’ ku anak iya nya nyaut, tang iya enda nurun gawa.

³¹Ni bagi seduai nya ke ngereja utai ti dikedekaka apai seduai iya?” “Iya ke tuai agi,” ku sida nyaut. Jesus lalu bejaku ngagai sida, “Enggau bendar Aku madah ngagai kita, bala pengumpul chukai enggau bala indu sundal deka tama dulu agi ari kita ke dalam Perintah Allah Taala.

³² Laban John Pemaptisa udah datai ngagai kita nunjukka jalai ngagai pengelurus, lalu kita enda arapka iya, tang sida pengumpul chukai enggau bala indu sundal arapka iya. Indah lebuh kita meda utai nya nyadi deh kita enda nesal ati ke dosa kita lalu arapka iya.

³³ “Pendingka jaku sempama siti tu. Orang siku bisi sebidang tanah. Iya numbuhka kebun anggur ba tanah nya, nirika pagar ngelingi kebun nya, numbak lubang alai ngaga pitan anggur, lalu ngaga sebuah menara. Udah nya iya nyua kebun anggur nya ngagai orang, lalu bejalai ngagai menua bukai.

³⁴ Lebuh maya ngetau, iya ngasuh bala ulun iya mansang ngagai orang ke nyua kebun anggur nya, deka ngambi buah.

³⁵Bala orang ke nyua kebun nya lalu nangkap bala ulun iya, malu siku, munuh siku, lalu nuku siku ti bukai ngena batu.

³⁶Orang nya lalu ngasuh mayuh agi ulun iya ti bukai mansang ngagai kebun nya. Bala orang ke nyua kebun nya lalu ngereja ngagai sida baka ti udah dikereja sida ngagai bala ulun ke dulu.

³⁷Udah nya iya ngasuh anak lelaki iya empu, ku iya, ‘Sida tentu deka bebasaka anak lelaki aku.’

³⁸Tang lebuh bala orang ke nyua kebun anggur nya meda anak lelaki iya datai, sida lalu bejaku enggau pangan diri, ‘Tu orang ke bempu waris. Aram kitai munuh iya lalu ngerampas pesaka iya!’

³⁹Nya alai sida nangkap iya, muai iya ari kebun anggur nya, lalu munuh iya.

⁴⁰“Nya alai lebuh orang ke bempu kebun anggur nya datai, nama utai ti deka dikereja iya ngagai orang ke nyua kebun anggur nya?”

⁴¹ Disaut sida, “Iya deka munuh orang ke jai nya, lalu ngasuh orang bukai nyua kebun nya, iya nya orang ke deka meri iya buah lebuh maya ngetau.”

⁴² Ku Jesus bejaku enggau sida, “Kati kita nadai udah kala macha dalam Bup Kudus: ‘Batu ti enda diguna tukang rumah udah nyadi batu ti pemadu beguna. Tu utai ti udah dikereja Tuhan, lalu ba mata kami, utai nya manah’?

⁴³Nya alai, Aku madah ngagai kita, Perintah Allah Taala deka diambi ari kita, lalu diberi ngagai orang ke deka mansutka buah Perintah nya.

⁴⁴Orang ke labuh ninggang batu nya, deka redak, lalu iya deka ngeredakka orang ke labuh ninggang iya.”

⁴⁵Lebuh sida tuai imam enggau orang Parisi ninga jaku sempama Jesus, sida nemu Iya bejakuka pasal sida.

⁴⁶Sida bisi amat ati deka nangkap Iya, tang sida takutka orang mayuh laban sida ngumbai Jesus nabi.