Read Iban Matthew 22 Bible Online

Matthew 22 - Iban bible

Matthew 22

¹Jesus lalu bejaku baru ngena jaku sempama ngagai orang mayuh. Ku Iya,

²“Perintah serega tau dibandingka enggau siku raja ke nyendiaka gawai tikah ke anak lelaki iya.

³ Iya ngasuh bala orang gaji iya ngangauka orang ke udah diambi ngabang datai ngagai gawai tikah nya. Tang sida enggai datai.

⁴Iya lalu ngasuh bala orang gaji iya ti bukai, ku iya, ‘Padahka ngagai orang ke udah diambi ngabang: Dinga kita, aku udah nyendiaka pengerami makai besai. Jelu sapi aku, enggau anak sapi aku ti gemu udah disayat, lalu semua utai udah sedia magang. Datai meh kita ngagai gawai tikah!’

⁵Tang sida enda tentu ibuhka tesau nya lalu mupuk ngagai endur bukai, siku ke umai, siku ngagai pengawa dagang iya,

⁶lalu sida ti bukai nangkap bala orang gaji raja nya, beduan lalu munuh sida.

⁷Raja nya lalu ringat. Iya ngirumka bala soldadu iya, munuh bala pemunuh nya, lalu nunu nengeri sida.

⁸Udah nya iya bejaku ngagai bala ulun iya, ‘Gawai tikah udah sedia, tang orang ke udah diambi ngabang enda tau datai.

⁹Nya alai bejalai kita ngagai jalai raya lalu ambi ngabang ngagai gawai tikah tu semua orang ke ditemu kita.’

¹⁰ Bala ulun iya lalu mansang ngagai semua jalai raya, lalu ngempuruka semua orang ke ditemu sida, orang ke manah enggau orang ke jai. Nya alai balai tikah nya nyau penuh laban bala pengabang.

¹¹“Tang lebuh raja tama, deka meda bala pengabang, iya tepedaka siku lelaki ke enda ngena pekayan tikah.

¹² Iya lalu bejaku ngagai orang nya, ‘Unggal, baka ni ku nuan tama kitu enda ngena pekayan tikah?’ Orang nya lalu nadai nemu jalai bejaku.

¹³ Udah nya raja lalu bejaku ngagai bala ulun iya, ‘Berekas kaki jari iya, lalu buai iya ke luar ngagai endur ti petang, alai orang deka nyabak sereta begerit ngeli.’

¹⁴ Laban mayuh dikangau, tang mimit aja dipilih.”

¹⁵Udah nya sida orang Parisi mupuk lalu baum deka manjuk Jesus ngena jaku Iya Empu.

¹⁶Sida lalu ngasuh bala murid sida enggau bala nembiak Herod mansang ngagai Jesus. Ku sida, “Pengajar, kami nemu Nuan endang madahka utai ti bendar, lalu ngajar utai ti bendar pasal jalai Allah Taala, lalu Nuan enda bedulika orang, laban Nuan endang enda bedulika sapa-sapa.

¹⁷Nya alai padahka runding Nuan ngagai kami. Kati kitai tau mayar chukai ngagai Raja Besai, tauka enda?”

¹⁸Tang Jesus nemu ati sida endang jai. Nya alai Iya bejaku, “Nama kebuah kita nguji Aku? Kita tu orang ke pura-pura ngapa?[62]

¹⁹Pandangka ngagai Aku duit kena mayar chukai!” Sida lalu mai sesingkap duit ngagai Iya.

²⁰Iya lalu nanya sida, “Gambar sapa enggau nama sapa tu?”

²¹ Sida lalu nyaut, “Enggi Raja Besai.” Iya lalu bejaku ngagai sida, “Utai Raja Besai, beri ngagai Raja Besai, utai Allah Taala, beri ngagai Allah Taala.”

²²Lebuh sida ninga nya, sida balat alit ati. Sida lalu ninggalka Iya, lalu mupuk ari endur nya.

²³ Sehari nya mega, sekeda orang Saduki datai ngagai Iya. Sida nya orang ke ngumbai nadai pengangkat ari mati. Lalu sida nanya Iya,

²⁴ “Pengajar, Moses madahka, ‘Enti lelaki mati nadai anak, menyadi lelaki iya enda tau enda jadi enggau balu nya, ngambika seduai iya bisi anak ngarika menyadi iya.’

²⁵Nyadi sekali ba bala kami bisi tujuh iku orang diri menyadi. Iya ke tuai bebini, lalu mati nadai anak, lalu ninggalka balu iya ke menyadi lelaki iya.

²⁶Baka nya mega menyadi iya ti kedua, ti ketiga, nyentuk ngagai menyadi iya ti ketujuh.

²⁷Ke penudi iya, indu nya mega mati.

²⁸Lebuh pengangkat orang ari mati, sapa ari sida tujuh iku nya ke bempu bini nya? Laban semua sida bela udah ampit jadi enggau iya.”

²⁹Tang ku Jesus nyaut sida, “Salah penemu kita, laban kita enda nemu Bup Kudus, tauka kuasa Allah Taala.

³⁰ Laban, lebuh pengangkat orang ari mati, sida nadai jadi melaki-bini, tauka nikah, tang nyadi baka melikat ti di serega.

³¹Nyadi pasal pengangkat orang ari mati: kati kita nadai udah kala macha utai ti udah dipadahka Allah Taala ngagai kita,

³² ‘Aku tu Allah Taala ke disembah Abraham, Isak, enggau Jakop?’ Iya ukai Allah Taala ke orang ke mati, tang Allah Taala ke orang ke idup.”

³³ Lebuh orang mayuh ninga nya, sida balat amat alit ati ke ajar Iya.

³⁴Lebuh orang Parisi ninga Jesus udah madamka penemu orang Saduki, sida lalu begempuru.

³⁵ Siku lawyer ari bala sida lalu mantaika siti tanya ngagai Jesus, deka nguji Iya.

³⁶“Pengajar, ni pesan ti pemadu besai dalam Adat?”

³⁷ Ku Jesus bejaku ngagai iya, “ ‘Rinduka Tuhan Allah Taala nuan enggau pengabis ati nuan, enggau pengabis semengat nuan, enggau pengabis runding nuan.’

³⁸Tu pesan ti keterubah sereta pemadu besai.

³⁹ Lalu pesan ti kedua nya sebaka enggau nya: ‘Rinduka pangan nuan baka nuan ke rinduka diri empu.’

⁴⁰ Semua Adat enggau ajar sida nabi beduduk ba pesan dua iti tu.”

⁴¹Lebuh orang Parisi begempuru, Jesus nanya sida,

⁴²ku Iya, “Baka ni ku penemu kita pasal Kristus? Peturun sapa Iya nya?” Sida lalu nyaut, “Peturun David.”

⁴³Iya lalu nanya sida, “Enti pia, baka ni ku David, ari iring Roh Kudus, ngumbai Kristus ‘Tuhan’? Laban David empu nyebut,

⁴⁴ ‘Ku Tuhan bejaku enggau Tuhan aku: Duduk muak ari kanan Aku datai ke Aku udah ngengkahka bala munsuh Nuan di baruh kaki Nuan.’

⁴⁵Enti David ngumbai Iya ‘Tuhan,’ baka ni ku Iya tau nyadi peturun David?”

⁴⁶ Nadai siku orang tesautka Iya, lalu kenyau ari nya, nadai agi orang berani betanyaka utai ngagai Iya.