Read Iban Matthew 24 Bible Online

Matthew 24 - Iban bible

Matthew 24

¹Jesus pansut ari Rumah Sembiang, lalu lebuh Iya benung bejalai ninggalka rumah nya, sida murid Iya datai lalu nunjukka ngagai Iya semua rumah ti dalam Rumah Sembiang nya.

² Tang ku Iya nyaut sida, “Kita meda semua utai tu. Tang enggau bendar Aku madah ngagai kita, nadai sigi batu nya deka mengkang betusun ditu, tang semua deka diruntuhka magang.”

³ Lebuh Jesus duduk ba Bukit Kana, sida murid datai ngagai Iya kediri, lalu bejaku, “Padahka ngagai kami, kemaya semua utai tu deka nyadi, lalu nama tanda ti nunjukka Nuan deka datai baru, enggau pengujung dunya?”

⁴Disaut Jesus, “Bejaga kita, enggai ke orang nesatka kita.

⁵ Laban mayuh orang deka datai dalam nama Aku, ku sida, ‘Aku tu Kristus!’ lalu sida deka nesatka mayuh orang.

⁶ Lalu kita deka ninga munyi perang, enggau berita pasal perang. Tang anang takut, laban utai nya enda tau enda nyadi, tang pengujung apin datai.

⁷ Laban bansa siti deka beperang ngelaban bansa siti, lalu menua siti deka beperang ngelaban menua siti, lalu lapar pungkang enggau tanah berenyang deka nyadi ba mayuh bengkah endur.

⁸Semua utai tu deka nyadi baka indu ke radai deka beranak.

⁹ “Udah nya sida deka nangkap kita, merinsaka kita, lalu munuh kita, lalu semua bansa deka begedika kita ketegal nama Aku.

¹⁰Udah nya mayuh orang deka ngelengkaka pengarap, lalu nyual pangan diri, sereta begedika pangan diri.

¹¹Lalu mayuh nabi ti pelesu deka pegari, lalu nesatka mayuh orang.

¹²Lalu laban penyai deka nambah-menambah, mayuh orang enda agi rinduka pangan diri.

¹³ Tang orang ke tan datai ke ujung, deka diselamatka.

¹⁴ Lalu Berita Manah pasal Perintah Allah Taala deka ditusui di serata dunya, nyadika saksi ngagai semua bansa. Udah nya baru pengujung datai.

¹⁵ “Nya alai lebuh kita meda utai ti jai, ti balat ngenakutka, ti dikenang nabi Daniel, bediri ba endur ti kudus (awakka orang ke macha meretika utai tu),

¹⁶awakka orang ke diau di Judea rari ngagai bukit.

¹⁷ Awakka orang ke ba atas perabung enda nurun ngambi utai ari rumah iya,

¹⁸lalu awakka orang ke di umai, enda nikal lalu ngambi serayung iya.

¹⁹ Naka meh penusah indu ke ngandung enggau sida indai ke nusuka anak lebuh maya nya!

²⁰Besampi kita, ngambika kita ukai rari lebuh musin chelap, tauka lebuh hari Sabat!

²¹ Laban lebuh maya nya ila penusah ti besai deka nyadi, baka ti nadai udah kala nyadi kenyau ari penumbuh dunya nyentuk ngagai sehari tu, tauka jemah ila.

²²Lalu enti penyampau hari nya enda dikurangka, nadai mensia ulih diselamatka. Tang ketegal bala nembiak ke udah dipilih Allah Taala, penyampau hari nya deka dikurangka.

²³“Udah nya, enti orang nyebut ngagai kita, ‘Peda kita! Nyin Kristus!’ tauka ‘Nyin Iya!’ anang arapka nya.

²⁴Laban Kristus ti pelesu, enggau nabi ti pelesu endang deka pegari, lalu ngereja kereja ajih, enggau kereja ti nyelai, kena sida nesatka nembiak ti udah dipilih Allah Taala, enti ulih.

²⁵Dinga kita! Aku udah madahka utai tu sebedau iya nyadi.

²⁶ “Nya alai, enti orang madah ngagai kita, ‘Peda kita! Nyin Iya di menua puang din,’ anang kita kia. Tauka enti sida nyebut ngagai kita, ‘Peda kita! Iya bisi di bilik!’ anang kita arapka nya.

²⁷Laban Anak Mensia deka datai baka kilat ti nyelar ari timur ngagai barat.

²⁸ Dia alai bangkai, dia meh endur alai burung ti bepakaika bangkai deka begelumu.”

²⁹ “Enda lama udah bekau penusah ti besai nya nyadi, mata hari deka piam, lalu bulan nadai agi manchar, lalu bintang deka labuh ari langit, lalu kuasa ti di langit deka begegar.

³⁰ Udah nya tanda Anak Mensia deka pegari di langit, lalu semua mensia di dunya deka ngulit, lalu sida deka meda Anak Mensia datai ba atas remang ari serega, ngena kuasa enggau mulia ti besai.

³¹ Terumpit ti besai deka disepu, lalu Anak Mensia deka ngasuh bala melikat Iya bejalai, lalu sida deka ngempuruka semua orang ke udah dipilih Allah Taala ari semua sukut dunya.

³²“Pelajarka ari kayu ara. Lebuh dan iya nyau geduk, lalu belabuh bekantuk, kita nemu musin panas nyau semak.

³³Baka nya mega lebuh kita meda semua utai tu, kita nemu Iya nyau semak, udah datai ba mua pintu.

³⁴ Enggau bendar Aku madah ngagai kita, rebak ti diatu apin mati sebedau semua utai tu udah nyadi magang.

³⁵ Langit enggau dunya deka lenyau, tang leka jaku Aku enda lenyau.

³⁶“Tang nadai orang nemu hari tauka jam utai tu deka nyadi. Melikat ke di serega enda nemu, lalu Anak Mensia pen enda mega nemu. [74] Semina Apai aja nemu.

³⁷ Baka lebuh maya Noah menya, baka nya meh gaya penatai Anak Mensia.

³⁸Laban berapa hari sebedau bah besai nyadi, orang majak makai ngirup, jadi melaki-bini, nikah, nyentuk ngagai hari Noah tama ke dalam bandung,

³⁹ lalu sida nadai nemu utai, nyentuk ngagai maya ai bah datai lalu nabanka semua sida. Baka nya meh gaya penatai Anak Mensia.

⁴⁰ Lebuh maya nya ila, dua iku orang deka gawa di umai: siku ditabanka, lalu siku ditinggalka.

⁴¹Dua iku indu deka ngisar: siku ditabanka, lalu siku ditinggalka.

⁴² Nya alai, bejaga kita, laban kita enda nemu hari[75] Tuhan kita deka datai.

⁴³ Tang kita enda tau enda nemu tu, enti orang ke bempu rumah nemu kemaya penchuri deka datai, iya tentu deka bejaga lalu enda nejuka rumah iya dirumpak.

⁴⁴Nya alai kita enda tau enda sedia, laban Anak Mensia deka datai ba jam ti enda disangka kita.

⁴⁵ “Nya alai, sapa ulun ke tetap ati sereta bepenemu-dalam, ke udah diasuh tuan iya ngemataka semua ulun ti bukai, ngambika bisi meri sida pemakai ba maya ti patut.

⁴⁶Beberekat meh ulun nya ke ditemu tuan iya ngereja pengawa nya, lebuh tuan iya datai!

⁴⁷Enggau bendar Aku madah ngagai kita, tuan iya deka ngasuh ulun nya ngemataka semua reta tengkira iya.

⁴⁸Tang enti ulun nya jai, iya deka bejaku dalam ati diri, ‘Tuan aku laun datai’

⁴⁹ lalu iya belabuh bepaluka ulun ti bukai, lalu makai ngirup enggau orang ke pemabuk.

⁵⁰Lebuh tuan iya datai ba hari enggau jam ti enda disangka iya, tauka ditemu iya,

⁵¹ tuan iya deka mepat iya, lalu muai iya sama enggau orang ke pura-pura ngapa,[76] ngagai endur alai orang deka nyabak sereta begerit ngeli.