Read Iban Matthew 25 Bible Online

Matthew 25 - Iban bible

Matthew 25

¹ “Lebuh maya nya ila, Perintah serega tau dibandingka enggau sepuluh iku indu dara, ke mai kelita mansang ngambat lelaki ke deka ditikah.

² Lima iku ari bala sida nya beli, lalu lima iku pintar.

³Lebuh sida ke beli mai kelita sida, sida nadai mekal diri enggau minyak,

⁴tang sida ke pintar mekal diri enggau minyak ke kelita sida.

⁵Lebuh lelaki ke deka ditikah nya laun datai, semua sida ngantuk lalu tinduk.

⁶Tang ba urung tengah malam, orang ngangau, ‘Dinga kita! Tu lelaki ke deka ditikah! Pansut kita lalu ambat iya.’

⁷Indu dara ke sepuluh iku nya angkat lalu nginsur sumbu kelita sida.

⁸Sida ke beli lalu bejaku ngagai sida ke pintar, ‘Beri kami minyak, laban kelita kami nyau deka padam.’

⁹Tang ku sida ke pintar nyaut, ‘Enggai kami! Enggai ke minyak kami enda chukup dibagi enggau kita. Manah kita mansang ngagai kedai lalu meli minyak ke diri empu.’

¹⁰ Lebuh sida benung mansang meli minyak, lelaki ke deka ditikah pen datai. Indu ke endang udah sedia nya tama enggau lelaki nya ngagai pengerami gawai tikah. Pintu lalu ditutup.

¹¹ “Udah nya sida ti bukai datai, lalu bejaku, ‘Tuan, tuan! Buka pintu ke kami!’

¹²Tang ku lelaki nya nyaut, ‘Enggau bendar aku madah ngagai kita, aku enda ngelala kita.’

¹³ Nya alai bejaga kita, laban kita enda nemu hari tauka jam.”[77]

¹⁴ “Laban Perintah serega nya baka orang siku ke baru deka bejalai ngagai menua bukai. Iya ngangauka bala orang gaji iya, lalu ngasuh sida ngemataka reta tengkira iya.

¹⁵Ngagai siku iya nyerahka lima ribu singkap duit emas,[78] ngagai siku ti bukai dua ribu singkap, lalu ngagai siku, seribu singkap, nitihka pengelandik sida siku-siku. Udah nya iya mupuk.

¹⁶Orang gaji ke nerima lima ribu singkap lalu tekala nya bedagang ngena duit nya, lalu bulih untung lima ribu singkap.

¹⁷Baka nya mega orang gaji ke nerima dua ribu singkap. Iya bulih untung dua ribu singkap.

¹⁸Tang orang gaji ke nerima seribu singkap mupuk, numbak lubang ba tanah lalu ngelalaika duit tuan iya dalam lubang tanah nya.

¹⁹ “Nyau kelama udah bekau nya, tuan sida datai, lalu ngira akaun enggau sida.

²⁰Lalu orang gaji ke nerima lima ribu singkap datai, mai lima ribu singkap nambahka nya. Ku iya, ‘Tuan, nuan udah nyerahka ngagai aku lima ribu singkap duit. Tu lima ribu singkap untung ti udah ulih aku.’

²¹ Ku tuan iya bejaku ngagai iya, ‘Manah pengawa nuan! Nuan tu orang gaji ke manah sereta tetap ati. Nuan tau dikarapka ngemataka utai ti mimit, nya alai aku deka ngasuh nuan ngemataka utai ti mayuh. Tama ke dalam lalu sama gaga ati enggau aku!’

²²Udah nya orang gaji ke udah nerima dua ribu singkap duit datai, lalu bejaku, ‘Tuan, nuan udah nyerahka ngagai aku dua ribu singkap duit. Tu dua ribu singkap untung ti ulih aku.’

²³Ku tuan iya bejaku ngagai iya, ‘Manah pengawa nuan! Nuan tu orang gaji ke manah sereta tetap ati! Nuan udah tau dikarapka ngemataka utai ti mimit, nya alai aku deka ngasuh nuan ngemataka mayuh utai. Tama ke dalam lalu sama gaga ati enggau aku!’

²⁴Udah nya, orang gaji ke nerima seribu singkap datai lalu bejaku, ‘Tuan, aku nemu nuan endang orang ke terit, ngetau utai ti ukai ditanam nuan, lalu ngumpul utai ti ukai ditaburka nuan,

²⁵nya alai aku takut, lalu ngelalaika duit nuan dalam tanah. Tu duit nuan.’

²⁶Tang ku tuan iya nyaut iya, ‘Nuan tu orang gaji ke jai sereta ngelusu![79] Nuan nemu aku ngetau utai ti ukai ditanam aku, lalu ngumpul utai ti ukai ditaburka aku, ukai enda?

²⁷Enti nuan nemu nya, nuan patut udah beranakka duit aku dalam bank, ngambika lebuh aku datai, aku ulih nerima duit nya enggau bungai iya.

²⁸Nya alai ambi duit nya ari iya, lalu beri ngagai iya ke bisi sepuluh ribu singkap.

²⁹ Laban, genap iku orang ke bisi utai, deka diberi mayuh agi, lalu iya deka ngembuan mayuh agi utai. Tang orang ke nadai utai, indah utai ti dikemisi iya deh deka dirampas ari iya.

³⁰ Lalu buai orang gaji ke nadai guna nya ke luar ngagai endur ti petang, alai iya deka nyabak sereta begerit ngeli.’

³¹ “Lebuh Anak Mensia datai dalam mulia Iya, lalu semua melikat datai enggau Iya, nya baru Iya deka duduk ba kerusi diraja Iya ti bemulia.

³² Semua bansa deka digempuruka di mua Iya, lalu Iya deka nyeraraka sida ari pangan diri, baka pengibun bedus ke nyeraraka bedus ari kambin,

³³lalu Iya deka ngengkahka orang ke lurus muak ari kanan Iya, lalu sida ti bukai, muak ari kiba Iya.

³⁴ Udah nya Raja deka bejaku ngagai orang ke muak ari kanan Iya, ‘Datai kitu, kita ke udah diberekatka Apai Aku, awakka kita bempu Perintah ti udah disedia ke kita kenyau ari penumbuh dunya,

³⁵ laban lebuh Aku lapar, kita meri Aku makai. Lebuh Aku aus, kita meri Aku ngirup. Lebuh Aku nyadi orang kampar, kita ngelaluka Aku ngagai rumah kita.

³⁶Aku telanjai, lalu kita meri Aku gari. Aku sakit, lalu kita ngintu Aku. Aku ditutup dalam rumah jil, lalu kita ngabas Aku.’

³⁷Udah nya sida ke lurus deka nyaut Iya, ‘Tuhan, kemaya kami meda Nuan lapar, lalu meri Nuan makai, tauka meda Nuan aus, lalu meri Nuan ngirup?

³⁸Lalu kemaya kami meda Nuan nyadi orang kampar, lalu ngelaluka Nuan ngagai rumah kami, tauka meda Nuan telanjai, lalu meri Nuan gari?

³⁹Lalu kemaya kami meda Nuan sakit, tauka meda Nuan dalam rumah jil, lalu ngabas Nuan?’

⁴⁰ Lalu Raja nya deka nyaut sida, ‘Enggau bendar Aku madah ngagai kita, lebuh kita ngereja utai tu ngagai siku ari menyadi Aku ti pemadu mit tu, kita ngereja nya ngagai[80] Aku!’

⁴¹ “Udah nya Iya deka bejaku ngagai sida ke muak ari kiba Iya, ‘Rari ari Aku, kita ke kena sumpah, ngagai api ti enda nemu padam, ti udah disedia Allah Taala ke Sitan enggau ke bala melikat iya!

⁴²Laban lebuh Aku lapar, kita enda meri Aku makai. Lebuh Aku aus, kita enda meri Aku ngirup.

⁴³Aku orang kampar, tang kita enda ngelaluka Aku ngagai rumah kita. Aku telanjai, tang kita enda meri Aku gari. Aku sakit enggau ditan dalam rumah jil, tang kita enda ngabas Aku.’

⁴⁴Udah nya sida deka nyaut Iya, ‘Tuhan, kemaya kami meda Nuan lapar tauka aus, tauka ngampar, tauka telanjai, tauka sakit, tauka ditan dalam rumah jil, lalu enda ngintu Nuan?’

⁴⁵Udah nya Iya deka nyaut sida, “Enggau bendar Aku madah ngagai kita, genap kali kita enda nulung siku ari sida ke pemadu mit tu, kita enda nulung Aku.’

⁴⁶ Lalu sida deka diukum belama iya, tang sida ke lurus deka tama ngagai pengidup ti meruan belama iya.”