Read Iban Matthew 26 Bible Online

Matthew 26 - Iban bible

Matthew 26

¹ Lebuh Jesus udah nyebut semua utai nya, Iya lalu bejaku ngagai sida murid Iya,

² “Kita nemu, Gawai Paska deka belabuh dua hari da agi, lalu Anak Mensia deka diserahka ngambika Iya diregang.”

³Sida tuai imam enggau sida tuai bansa lalu baum dalam istana imam besai ke benama Kaiapas,

⁴bekiraka jalai nangkap Jesus ngena chara belalai, lalu munuh Iya.

⁵Tang ku sida, “Ukai lebuh maya gawai, enggai ke orang begau.”

⁶Nyadi lebuh Jesus di Betani, ba rumah Simon ke udah sakit lan,

⁷ siku indu datai ngagai Iya mai sebutul minyak wangi ti berega, lalu nuang minyak wangi nya ba pala Jesus, lebuh Jesus benung makai.

⁸Tang lebuh sida murid meda nya, sida pedis ati, lalu bejaku, “Nama kebuah masau minyak wangi nya baka nya?

⁹Minyak nya tau dijual ngena rega ti besai, lalu duit nya diberi ngagai orang ke seranta!”

¹⁰Tang Jesus nemu utai ti disebut sida, lalu bejaku ngagai sida, “Nama kebuah kita ngachau indu tu? Iya udah ngereja utai ti manah ke Aku.

¹¹ Laban kita deka seruran bisi orang ke seranta begulai enggau kita, tang Aku enda seruran begulai enggau kita.

¹² Lebuh iya nuang minyak wangi nya ba tubuh Aku, iya nyendiaka Aku dikubur.

¹³Enggau bendar Aku madah ngagai kita, di semua endur alai Berita Manah tu ditusui di serata dunya, utai ti udah dikereja iya deka ditusui, kena ngingatka iya.”

¹⁴Udah nya siku ari sida ke dua belas, ke benama Judas Iskariot, mansang ngagai sida tuai imam

¹⁵ lalu bejaku, “Nama utai ti deka diberi kita ngagai aku enti aku nyerahka Jesus ngagai kita?” Sida lalu meri iya tiga puluh singkap duit pirak.

¹⁶Berengkah ari nya Judas belabuh begigaka peluang kena nyerahka Jesus ngagai sida.

¹⁷Nyadi ba hari ti keterubah ke Gawai Roti Ti Enda Beragi, sida murid datai ngagai Jesus, lalu bejaku, “Dini endur alai Nuan deka ngasuh kami nyendiaka pemakai Gawai Paska ke Nuan?”

¹⁸ Ku Iya bejaku, “Mansang kita ngagai orang siku di nengeri, lalu sebut ngagai iya: ‘Ku Pengajar, Maya Aku nyau semak. Aku enggau bala murid Aku deka ngintu Gawai Paska ba rumah nuan.’ ”

¹⁹ Sida murid lalu ngereja nitihka asuh Jesus lalu nyendiaka pemakai Gawai Paska.

²⁰ Lebuh hari nyau lemai, Iya duduk enggau sida dua belas iku.

²¹Lebuh sida benung makai, Jesus bejaku, “Enggau bendar Aku madah ngagai kita, siku ari kita deka nyual Aku.”

²²Sida lalu tusah amat ati, lalu belabuh nanya Iya, udah siku-siku, “Ukai aku ti ku Nuan, Tuhan?”

²³ Disaut Iya, “Orang ke nyepuhka roti ke dalam mangkuk nyereta Aku, nya meh orang ke deka nyual Aku.

²⁴ Anak Mensia endang deka mati munyi ti disebut dalam Bup Kudus, tang naka meh penusah orang ke nyual Anak Mensia! Manah agi enti iya enda ada!”

²⁵Judas, ke nyual Iya, lalu bejaku, “Ukai aku ti ku Nuan, Pengajar?” Disaut Jesus, “Nuan empu udah madahka diri.”

²⁶ Lebuh sida benung makai, Jesus ngambi roti, merekat lalu mechahka roti nya, nyuaka roti nya ngagai sida murid Iya, lalu bejaku, “Ambi, empa; tu tubuh Aku.”

²⁷Udah nya Iya ngambi mangkuk, lalu lebuh Iya udah meri terima kasih, Iya nyuaka mangkuk nya ngagai sida murid, ku Iya, “Irup tu, semua kita,

²⁸ laban tu darah Aku kena nanggam sempekat baru Allah Taala, ti dituang ke orang mayuh ke pengampun dosa.

²⁹Aku madah ngagai kita, Aku enda agi ngirup wain tu datai ngagai maya Aku ngirup iya baru enggau kita dalam Perintah Apai Aku.”

³⁰ Lebuh sida udah belagu siti pantun, sida lalu mupuk ngagai Bukit Kana.

³¹ Jesus lalu madah ngagai sida, “Malam tu semua kita deka rari magang ketegal Aku, laban endang udah ditulis, ‘Aku deka munuh pengibun bedus, lalu raban bedus deka pambar.’

³² Tang lebuh Aku udah diangkatka idup baru, Aku deka mupuk dulu ari kita ngagai Galili.”

³³Peter lalu bejaku ngagai Iya, “Enti sema semua orang rari ketegal Nuan, aku meh enda.”

³⁴Ku Jesus bejaku ngagai Peter, “Enggau bendar Aku madah ngagai nuan: malam tu, sebedau manuk mengkukuk, nuan udah besangkalka Aku tiga kali.”

³⁵Ku Peter bejaku ngagai Iya, “Enti sema aku mati enggau Nuan, enda meh aku besangkalka Nuan!” Semua murid ti bukai bela bejaku munyi nya magang.

³⁶ Udah nya Jesus mupuk enggau sida ngagai endur siti ti dikumbai Getsemani, lalu ku Iya bejaku ngagai sida, “Duduk ditu. Aku deka kin lalu besampi.”

³⁷Iya lalu mai enggau Iya Peter enggau anak Sebedi ke dua iku. Ati Iya balat tusah sereta sinu.

³⁸ Udah nya Iya bejaku ngagai sida, “Ati Aku balat tusah, asai ke deka mati. Diau ditu, lalu bejaga enggau Aku.”

³⁹ Iya bejalai jauh mimit, nyungkurka Diri ke tanah, lalu besampi, “Apai, enti ulih, awakka mangkuk tu diambi ari Aku! Tang ukai nitihka peneka Aku, tang nitihka peneka Nuan.”

⁴⁰Iya lalu pulai baru ngagai sida murid, lalu nemu sida tinduk, lalu ku Iya bejaku ngagai Peter, “Kati kita enda ulih bejaga enggau Aku sejam?

⁴¹ Bejaga sereta besampi ngambika kita enda kena laban penguji. Ati amat deka, tang tubuh lemi.”

⁴² Iya mupuk baru kedua kali, lalu besampi, “Apai, enti mangkuk tu enda tau diambi ari Aku, lalu Aku enda tau enda ngirup iya, awakka peneka Nuan nyadi.”

⁴³Iya pulai baru, lalu nemu sida murid tinduk, laban sida nyau kelalu deka tinduk.

⁴⁴Nya alai Iya ninggalka sida baru, mupuk, lalu besampi ketiga kali, munyi ti dulu.

⁴⁵ Udah nya Iya pulai baru ngagai sida, lalu bejaku, “Kati kita agi tinduk sereta belelak? Peda kita! Jam udah chukup, lalu Anak Mensia deka dijual ngagai orang ke bedosa.

⁴⁶Angkat, aram kitai mupuk. Peda kita, orang ke nyual Aku udah datai!”

⁴⁷Lebuh Jesus agi benung bejaku, Judas datai, iya nya siku ari sida ke dua belas. Mayuh amat orang ke betangkinka pedang enggau bebaika pemalu datai enggau iya ari asuh sida tuai imam enggau sida tuai bansa.

⁴⁸Nyadi orang ke nyual Iya udah meri siti tanda ngagai sida, ku iya, “Orang ke disium aku, nya meh Iya. Tangkap Iya!”

⁴⁹Judas mansang ngagai Jesus, lalu bejaku, “Tabi, Pengajar,” lalu nyium Iya.

⁵⁰ Ku Jesus bejaku ngagai iya, “Unggal, kereja enggau jampat utai ti deka dikereja nuan. Sida mansang, megai Iya, lalu nangkap Iya.

⁵¹Siku orang ke enggau Jesus lalu tekala nya nyintak pedang iya, lalu mantap ulun imam besai, mutuska pending iya.

⁵² Jesus lalu bejaku ngagai iya, “Selitka pedang nuan. Semua orang ke ngena pedang deka mati laban pedang.

⁵³Kati kita ngumbai Aku enda ulih ngangauka Apai Aku, lalu Iya tekala nya ngirumka lebih dua belas raban soldadu melikat?

⁵⁴Tang enti baka nya, baka ni ku Bup Kudus dikamatka, ti madahka utai tu enda tau enda nyadi baka tu?”

⁵⁵ Jesus lalu bejaku ngagai orang mayuh, “Kati Aku tu perumpak alai kita bebaika pedang enggau pemalu mansang nangkap Aku? Tiap hari Aku duduk ngajar dalam Rumah Sembiang, lalu kita enda nangkap Aku.

⁵⁶Tang semua utai tu nyadi kena ngamatka jaku ti udah ditulis sida nabi dalam Bup Kudus.” Udah nya semua murid ninggalka Iya, lalu rari.

⁵⁷Udah nya orang ke nangkap Jesus lalu mai Iya ngagai rumah imam besai Kaiapas alai sida pengajar Adat enggau sida tuai bansa udah begempuru.

⁵⁸Tang Peter nitihka Iya ari jauh, nyentuk ngagai tengah laman rumah imam besai. Iya tama lalu nudukka diri enggau bala jejaga, deka nengkilaka semua utai ti nyadi.

⁵⁹Nyadi sida tuai imam enggau semua raban Kunsil nguji ngiga saksi ti bula kena ngelaban Jesus, ngambika sida ulih munuh Iya,

⁶⁰tang sida nadai tetemuka saksi ke baka nya, taja pen mayuh orang mansang ke mua lalu nyebut utai ti bula pasal Iya. Ke pengujung iya, dua iku orang mansang ke mua

⁶¹ lalu bejaku, “Orang tu udah nyebut, ‘Aku ulih ngerubuh Rumah Sembiang Allah Taala, lalu nirika iya baru dalam tiga hari.’ ”

⁶²Imam besai bediri, lalu bejaku, “Kati Nuan enda nyaut nya? Nama utai ti disebut orang tu ngelaban Nuan?”

⁶³ Tang Jesus mengkang enda bemunyi. Imam besai lalu bejaku baru ngagai Iya, “Dalam nama Allah Taala ti idup, aku ngasuh nuan madah ngagai kami enti Nuan tu Kristus, Anak Allah Taala.”

⁶⁴ Ku Jesus bejaku ngagai iya, “Nuan empu udah nyebut nya. Tang Aku madah ngagai kita, berengkah ari diatu kita deka meda Anak Mensia duduk muak ari kanan Allah Taala ti Pemadu Bekuasa, lalu datai atas remang ari serega!”

⁶⁵ Imam besai lalu nyarikka gari diri, lalu bejaku, “Iya udah bejaku busung! Nama kebuah kitai begunaka saksi bukai? Kita empu baru udah ninga Iya bejaku busung!

⁶⁶Baka ni ku penemu kita?” Sida lalu nyaut, “Iya patut dibunuh.”

⁶⁷ Sida lalu ngeludah mua Iya, lalu malu Iya. Lalu ku sekeda orang ke nampar Iya bejaku,

⁶⁸“Benabi Nuan, Kristus! Sapa nampar Nuan!”

⁶⁹Nyadi Peter duduk di luar, ba tengah laman. Siku indu ke nyadi kuli imam besai datai lalu bejaku ngagai Peter, “Nuan tu pen sama enggau Jesus orang Galili.”

⁷⁰Tang Peter besangkal di mua semua bala sida, ku iya, “Nadai aku nemu utai ti ku nuan.”

⁷¹Lebuh Peter pansut ngagai mua pintu penama, siku agi kuli indu meda iya, lalu bejaku ngagai bala orang ke bediri semak dia, “Orang tu udah enggau Jesus orang Nasaret.”

⁷²Peter lalu besangkal baru, “Aku besumpah, aku enda nemu orang nya!”

⁷³Enda lama udah nya, sida lelaki ke bediri dia datai lalu bejaku ngagai Peter, “Nuan tu siku ari bala sida, ari chara nuan bejaku!”

⁷⁴Ku Peter, “Aku besumpah, aku madahka utai ti amat! Awakka Allah Taala ngukum aku enti aku enda! Aku enda ngelala orang nya!” Tekala nya manuk lalu mengkukuk.

⁷⁵ Peter lalu ingatka utai ti udah dipadahka Jesus ngagai iya: ‘Sebedau manuk mengkukuk, nuan deka udah besangkalka Aku tiga kali.” Peter pansut lalu duie-duie nyabak.