Read Iban Matthew 27 Bible Online

Matthew 27 - Iban bible

Matthew 27

¹Pagi nya, semua tuai imam enggau sida tuai bansa lalu begigaka chara munuh Jesus.

²Sida nanchang Iya, mai Iya pansut, lalu nyerahka Iya ngagai Gabenor Pilate.

³ Lebuh Judas, ke udah nyual Iya, ninga Jesus udah diukum, iya nesal ati lalu mulaika tiga puluh singkap duit pirak nya ngagai sida tuai imam, enggau tuai bansa.

⁴Ku iya, “Aku udah bedosa nyual orang ke nadai penyalah!” Tang ku sida nyaut iya, “Kapa kami ka ibuhka nya? Nya pekara nuan empu!”

⁵Judas lalu ngempaska duit nya dalam Rumah Sembiang, mupuk ari endur nya, lalu ngantung diri.

⁶ Sida tuai imam lalu ngumpul duit nya, lalu ku sida, “Kitai ngelanggar Adat enti kitai nyimpan duit tu dalam sarang reta Rumah Sembiang, laban tu duit darah.”

⁷Nya alai sida berandauka nya, lalu meli, ngena duit nya, sebidang tanah ari tukang periuk, nyadika endur alai nguburka orang kampar.

⁸Nya kebuah tanah nya dikumbai, “Tanah Darah” nyentuk ngagai sehari tu.

⁹ Utai tu nyadi kena ngamatka jaku ti udah disebut beseruanka nabi Jeremiah: “Lalu sida ngambi tiga puluh singkap duit pirak nya, penyampau ti udah dipesetujuka orang Israel kena sida meli Iya,

¹⁰lalu ngena duit nya sida meli tanah tukang periuk, nitihka pesan Tuhan ngagai aku.”

¹¹ Jesus bediri di mua gabenor, lalu gabenor nanya Iya: “Kati Nuan raja orang Judah?” Disaut Jesus, “Munyi ti disebut nuan.”

¹²Tang lebuh sida tuai imam enggau sida tuai bansa besalahka Iya, Iya enda nyaut.

¹³Udah nya Pilate bejaku ngagai iya, “Kati Nuan nadai ninga pemayuh utai ti disebut sida ngelaban Nuan?”

¹⁴ Tang Jesus enda nyaut, seleka jaku pen enda, lalu tuan gabenor balat amat alit ati.

¹⁵Nyadi ba tiap Gawai Paska, tuan gabenor endang selalu ngelepaska siku orang tutup nitihka pinta orang mayuh.

¹⁶Nyadi lebuh maya nya bisi siku orang tutup ti tebilang, ke benama Jesus Barabas.

¹⁷Nya alai lebuh orang mayuh udah begempuru, Pilate lalu bejaku ngagai sida, “Sapa patut dilepaska aku ke kita? Jesus Barabas, tauka Jesus ke dikumbai Kristus?”

¹⁸Laban Pilate endang nemu bala tuai orang Judah nyerahka Jesus ngagai iya, laban sida kepapas.

¹⁹ Lebuh Pilate benung ngakim pekara nya, bini iya ngirumka pesan ngagai iya munyi tu: “Anang ngereja utai nama-nama ngagai orang ke lurus nya, laban aku udah tusah amat ati pasal Iya dalam mimpi aku sehari tu.”

²⁰Nyadi sida tuai imam enggau sida tuai bansa nyungkak orang mayuh minta Pilate ngelepaska Barabas, lalu munuh Jesus.

²¹ Tuan gabenor lalu bejaku baru ngagai orang mayuh, “Sapa ari seduai tu ke dilepaska aku ke kita?” Sida lalu nyaut, “Barabas!”

²²Pilate lalu bejaku, “Enti pia, nama utai ti patut dikereja aku ngagai Jesus ke dikumbai Kristus?” Semua sida lalu nyaut, “Regang Iya!”

²³Pilate lalu nanya, “Nama kebuah? Nama penyalah Iya?” Tang sida manjung inggar agi, “Regang Iya!”

²⁴ Lebuh Pilate nemu diri nadai ulih ngereja utai nama-nama, laban orang mayuh nyau deka begau, iya ngambi ai, lalu masu jari diri di mua orang mayuh, lalu bejaku, “Aku enda tanggung pemati orang tu! Kita empu tanggung nya!”

²⁵ Semua orang mayuh lalu nyaut, “Awakka darah Iya ninggang kami enggau anak kami!”

²⁶Nya alai Pilate ngelepaska Barabas ke sida. Iya ngasuh Jesus disipat, lalu nyerahka Iya ngambika Iya diregang.

²⁷ Udah nya bala soldadu Pilate mai Jesus ngagai istana gabenor, lalu semua bala soldadu bekelingika Iya

²⁸Sida lalu muka gari ari tubuh Iya, lalu ngerasukka baju panjai ti ungu ba Iya.

²⁹Sida lalu ngaga makota duri, ngengkahka makota nya ba pala Iya, lalu ngengkahka siti tungkat ba jari kanan Iya. Sida lalu besugang di mua Iya, lalu ngeleseka Iya. Ku sida, “Tabi ke Nuan Raja orang Judah!”

³⁰Sida lalu ngeludah Iya, ngambi tungkat ari Iya, lalu malu pala Iya.

³¹Lebuh sida udah tembu beduan Iya, sida muka baju panjai ti ungu nya ari Iya, lalu ngerasukka gari Iya Empu baru ba Iya, lalu mai Iya pansut, deka ngeregang Iya.

³²Lebuh sida pansut, sida betemu enggau siku lelaki ke benama Simon, ari Sairin. Sida lalu mejalka orang nya ngesan regang Jesus.

³³ Lebuh sida datai ba endur siti ti dikumbai Golgota (reti nya, “Endur Alai Keruntuk”)

³⁴ sida meri Iya wain dichampur enggau empedu, tang lebuh Jesus ensepi utai nya, Iya enggai ngirup.

³⁵ Lebuh sida udah ngeregang Iya, sida lalu bechabut undi ke gari Iya.

³⁶Udah nya sida duduk nengkilaka Iya.

³⁷Ba atas pala Iya sida ngengkahka siti pelekat ti madahka penyalah Iya. Baka tu ku jaku ti ditulis ba pelekat nya, “Tu Jesus, Raja orang Judah.”

³⁸Dua iku penyamun lalu diregang sama enggau Iya, siku muak ari kanan, lalu siku muak ari kiba.

³⁹ Orang ke mansa ngeleseka Jesus, ngilikka pala sida

⁴⁰ lalu bejaku, “Nuan ke deka ngerubuh Rumah Sembiang, lalu nirika iya baru dalam tiga hari, idupka diri empu lalu nurun nuan ari regang nya!”

⁴¹Sida tuai imam enggau sida pengajar Adat, enggau sida tuai bansa mega ngeleseka Iya. Ku sida,

⁴²“Iya ngidupka orang bukai, tang Iya enda ulih ngidupka Diri Empu! Enti Iya amat Raja orang Israel, awakka Iya nurun ari regang nya, ngambika kitai arapka Iya!

⁴³ Iya ngarapka Allah Taala. Awakka Allah Taala meh ngelepaska Iya, enti Allah Taala deka, laban Iya udah nyebut, ‘Aku tu Anak Allah Taala.’ ”

⁴⁴Perumpak ke diregang sama enggau Iya mega ngeleseka Iya.

⁴⁵Ba urung tengah hari, semua menua petang magang nyentuk ngagai pukul tiga ngalih hari.

⁴⁶ Ba urung pukul tiga, Jesus ngangau enggau nyawa ti inggar, “Eli, Eli, lama sabaktani?” reti nya, “Allah Taala Aku, Allah Taala Aku, nama kebuah Nuan ninggalka Aku?”

⁴⁷Lebuh orang ke bediri dia ninga Iya manjung, sida lalu bejaku, “Iya ngangauka Elijah!”

⁴⁸ Siku ari bala sida lalu belanda tekala nya, ngambi siti bungai karang, nyepuhka bungai karang nya ngagai ai wain ti masam, nuatka bungai karang nya ngena kayu, lalu nguji ngasuh Jesus ngirup.

⁴⁹Tang ku sida ti bukai bejaku, “Anang guai dulu! Nyangka Elijah bisi datai nyelamatka Iya!”[81]

⁵⁰Jesus ngangau baru enggau nyawa ti inggar, lalu ngapuska seput.

⁵¹ Kain tirai ti digantung dalam Rumah Sembiang lalu charik belah dua ari atas ke baruh. Tanah berenyang, lalu batu belah.

⁵²Kubur mega tebuka, lalu mayuh nembiak Tuhan ke udah mati, diangkatka idup baru.

⁵³Sida pansut ari kubur lebuh Jesus udah diangkatka ari mati. Sida tama ngagai Nengeri ti Kudus, lalu mayuh orang meda sida.

⁵⁴ Lebuh pemesai soldadu enggau bala soldadu ke sama enggau iya nengkilaka Jesus, meda tanah berenyang, enggau semua utai bukai ti nyadi, sida takut, lalu ku sida, “Iya amat Anak Allah Taala!”

⁵⁵ Sida ke indu pen mayuh mega dia, nengkilaka Iya ari jauh. Sida tu udah nitihka Iya ari Galili, lalu ngintu Iya.

⁵⁶ Bala sida nya nyengkaum Maria Magdalin, Maria indai James seduai Josep, enggau bini Sebedi.

⁵⁷Lebuh hari nyau lemai, siku orang ke kaya ari Arimatea datai. Nama iya Josep. Iya tu mega murid Jesus.

⁵⁸Iya betemu enggau Pilate, lalu minta bangkai Jesus. Pilate lalu ngasuh orang nyerahka bangkai Jesus ngagai Josep.

⁵⁹Josep lalu ngambi bangkai Jesus, lalu mungkus bangkai nya ngena kain linin ti baru.

⁶⁰Iya ngengkahka bangkai nya dalam kubur Josep empu, ti udah ditebuk iya ba batu galang. Iya lalu maringka sigi batu ti besai ngagai mua lubang kubur nya, lalu mupuk ari endur nya.

⁶¹Maria Magdalin enggau Maria ti siku nya bisi dia, duduk nunga ngagai kubur nya.

⁶²Hari siti, iya nya hari Sabat, sida tuai imam enggau sida orang Parisi betemu enggau Pilate.

⁶³ Ku sida, “Tuan, kami ingatka utai ti udah disebut orang ke bula nya, lebuh Iya agi idup. Ku Iya, ‘Udah bekau tiga hari, Aku deka angkat idup baru.’

⁶⁴Nya alai, asuh orang nyaga kubur nya nyentuk ngagai hari ti ketiga, enggai ke sida murid Iya datai lalu ngenchuri bangkai Iya, lalu madah ngagai orang mayuh, ‘Iya udah angkat idup baru ari mati,’ lalu pemula ti penudi tu deka jai agi ari pemula ti keterubah.”

⁶⁵Ku Pilate bejaku enggau sida, “Bai seraban jejaga, lalu mupuk. Jaga kubur nya likun enggau naka ulih kita.”

⁶⁶Sida mupuk lalu ngelekatka chop tambit ba batu ti dikena nutup kubur nya lalu ngasuh jejaga nyaga kubur nya.