Read Iban Matthew 28 Bible Online

Matthew 28 - Iban bible

Matthew 28

¹Udah lepas hari Sabat, tumu pagi hari Minggu, Maria Magdalin enggau Maria ti siku nya, mansang ngagai kubur.

² Tekala nya tanah lalu balat amat berenyang, laban siku melikat Tuhan nurun ari serega, datai lalu maringka batu ari mua kubur nya, lalu duduk ba batu nya.

³Gamal melikat nya baka kilat, lalu gari iya burak baka seleju.

⁴ Bala jejaga balat amat takutka iya datai ke sida nyau getar-getar lalu baka orang ke mati.

⁵Tang ku melikat nya bejaku ngagai indu dua iku nya, “Anang takut. Aku nemu seduai ngiga Jesus, ke udah diregang.

⁶Iya nadai ditu laban Iya udah diangkatka ari mati, munyi ti udah dipadahka Iya. Datai kitu, lalu peda endur alai Iya gali.

⁷ Udah nya mupuk seduai enggau jampat, lalu padahka ngagai sida murid Iya, ‘Iya udah diangkatka ari mati, lalu Iya diatu mansang ngagai Galili dulu ari kita. Din kita deka meda Iya!’ Tu pesan aku ngagai seduai.”

⁸Seduai iya lalu beguai-guai mupuk ari kubur nya, takut tang gaga ati, lalu belanda madahka sida murid Iya.

⁹ Tekala nya Jesus betemu enggau seduai iya, lalu bejaku, “Tabi ke seduai.” Seduai iya lalu mansang ngagai Iya, megai kaki Iya, lalu nyembah Iya.

¹⁰Lalu ku Jesus bejaku ngagai seduai iya, “Anang takut. Mupuk meh seduai, lalu asuh bala menyadi Aku mupuk ngagai Galili. Din sida deka meda Aku.”

¹¹ Lebuh indu dua iku nya benung di rantau jalai, sekeda soldadu ke nyaga kubur nya mansang ngagai nengeri, lalu madah ngagai sida tuai imam pasal semua utai ti udah nyadi.

¹²Lebuh sida tuai imam udah baum enggau sida tuai bansa, sida lalu meri duit ngagai sida soldadu nya.

¹³Ku sida, “Padahka ngagai orang mayuh, ‘Sida murid Iya datai lebuh malam hari, lalu ngenchuri bangkai Iya, lebuh kami tinduk.’

¹⁴Lalu enti tuan gabenor ninga pasal pekara tu, kami deka bejaku ngagai iya, ngambika kita enda kena penusah laban nya.”

¹⁵Bala soldadu lalu ngambi duit nya, lalu ngereja nitihka asuh sida, lalu jerita nya ditaburka ngagai orang Judah nyentuk ngagai sehari tu.

¹⁶ Murid ke sebelas iku lalu mupuk ngagai menua Galili, ngagai bukit sigi ti udah dipadahka Jesus ngagai sida.

¹⁷Lebuh sida meda Iya, sida lalu nyembah Iya, tang sekeda sida kakang ati.

¹⁸ Jesus mansang ngagai sida lalu bejaku, “Semua kuasa di serega enggau di dunya udah diberi magang ngagai Aku.

¹⁹ Nya alai, bejalai kita ngagai semua bansa lalu gaga sida nyadi murid Aku, maptisa sida dalam nama Apai, Anak enggau Roh Kudus,

²⁰ lalu ajar sida ngasika semua pesan ti udah diberi Aku ngagai kita. Lalu ingat, Aku deka seruran enggau kita nyentuk ngagai pengujung dunya.”