Read Iban Matthew 4 Bible Online

Matthew 4 - Iban bible

Matthew 4

¹ Udah nya Roh Kudus lalu mai Jesus ngagai menua puang, ngambika Iya diuji Sitan.

² Lebuh Iya udah bepasa empat puluh hari empat puluh malam, Iya lapar.

³Penguji datai lalu bejaku ngagai Iya, “Enti Nuan amat Anak Allah Taala, asuh batu tu nyadi roti.”

⁴ Tang ku Jesus nyaut, “Endang udah ditulis, ‘Mensia enda ulih idup makai roti aja, tang beridup ba genap leka jaku ti pansut ari mulut Allah Taala.’ ”

⁵ Udah nya Sitan mai Jesus ngagai Jerusalem, nengeri ti kudus, ngengkahka Iya ba legit perabung Rumah Sembiang,

⁶ lalu bejaku ngagai Iya, “Enti Nuan amat Anak Allah Taala, terejun Nuan ari tu, laban endang udah ditulis, ‘Allah Taala deka ngasuh bala melikat Iya nyaga Nuan. Sida deka nyambut Nuan ngena jari sida, ngambika kaki Nuan enda terempas ba batu.’ ”

⁷ Ku Jesus bejaku ngagai Sitan, “Munyi ti udah ditulis, ‘Anang nguji Tuhan Allah Taala nuan.’ ”

⁸Sitan lalu mai Jesus ngagai bukit sigi ti tinggi, lalu mandangka ngagai Iya semua perintah di dunya tu, enggau semua pengaya sida,

⁹lalu bejaku ngagai Iya, “Semua utai tu deka diberi aku ngagai Nuan, enti Nuan deka besugang lalu nyembah aku.”

¹⁰ Jesus lalu bejaku ngagai iya, “Rari nuan Sitan! Laban endang udah ditulis, ‘Sembah Tuhan Allah Taala nuan, lalu betuaika Iya siku aja!’ ”

¹¹ Udah nya Sitan ninggalka Iya, lalu bala melikat datai lalu ngintu Iya.

¹² Lebuh Jesus ninga John udah kena tangkap, Iya lalu mupuk ngagai menua Galili.

¹³ Iya ninggalka Nasaret, lalu diau di Kapernaum, sebuah nengeri ti ngimbai Danau Galili, di menua Sebulun enggau Naptali.

¹⁴Tu ngamatka jaku ti udah disebut nabi Isaiah,

¹⁵ “Menua Sebulun enggau menua Naptali, ti tunga ngagai tasik, di seberai Sungai Jordan, Galili, menua orang bansa bukai!

¹⁶Orang ke diau dalam petang udah meda penampak ti besai. Penampak udah manchar ngagai sida ke diau di menua kelemayang pemati.”

¹⁷ Kenyau ari nya Jesus lalu belabuh madahka pesan tu: “Nesal ati ke dosa kita, laban Perintah serega nyau semak!”

¹⁸Lebuh Jesus bejalai ba tebing Danau Galili, Iya tepedaka dua iku orang diri menyadi, Simon ke dikumbai Peter, enggau menyadi iya Andrew, benung nyala, laban seduai iya orang berikan.

¹⁹Ku Jesus bejaku ngagai seduai iya, “Titihka Aku. Aku deka ngajar seduai jalai ngulihka mensia.”

²⁰Tekala nya seduai iya lalu ninggalka jala seduai, lalu nitihka Jesus.

²¹Lebuh Iya mupuk ari endur nya, Iya tepedaka dua iku agi orang diri menyadi, James seduai John, anak Sebedi, dalam perau sama enggau apai seduai iya Sebedi, benung nyeruri jala sida. Jesus lalu ngangauka seduai iya.

²²Tekala nya seduai iya lalu ninggalka perau enggau apai seduai iya, lalu nitihka Jesus.

²³ Jesus lalu bejalai di serata menua Galili, ngajar dalam balai gempuru, lalu nusui Berita Manah pasal Perintah Allah Taala, sereta ngeraika orang ke kena laban semua macham penyakit enggau pemedis.

²⁴Nya alai berita pasal Iya ngelekai di serata menua Siria, lalu orang mai ngagai Iya semua orang ke sakit, ke merinsa laban semua macham penyakit enggau pemedis, orang ke dirasuk antu, ke sakit gila-babi, orang ke sakit bajung, lalu Iya ngeraika semua sida.

²⁵Mayuh amat orang nitihka Iya ari menua Galili enggau ari Sepuluh Buah Nengeri, ari Jerusalem, ari Judea, enggau ari menua ti di seberai Sungai Jordan.