Read Iban Matthew 5 Bible Online

Matthew 5 - Iban bible

Matthew 5

¹ Lebuh Jesus meda bala orang mayuh, Iya niki ngagai bukit sigi, lalu lebuh Iya nudukka Diri, sida murid Iya lalu datai ngagai Iya.

²Iya lalu belabuh ngajar sida, ku Iya:

³ “Beberekat meh orang ke seranta dalam roh, laban Perintah serega endang enggi sida.

⁴ “Beberekat meh orang ke ngulit, laban sida deka diperindang.

⁵ “Beberekat meh orang ke baruh ati, laban sida deka bempu dunya.

⁶ “Beberekat meh orang ke lapar sereta auska pengelurus, laban Allah Taala deka ngemuaska sida.

⁷“Beberekat meh orang ke kasihka orang, laban sida deka nerima pengasih.

⁸ “Beberekat meh orang ke tuchi ati, laban sida deka meda Allah Taala.

⁹“Beberekat meh orang ke bekereja ke pemaik, laban sida deka dikumbai anak Allah Taala.

¹⁰ “Beberekat meh orang ke kena perinsa ketegal pengelurus, laban sida deka bempu Perintah serega.

¹¹ “Beberekat meh kita lebuh orang mechat kita lalu merinsaka kita, lalu nyebut semua macham utai ti bula ngelaban kita ketegal Aku.

¹² Lantang sereta gaga meh kita, laban upah ti besai udah disedia ke kita di serega, laban nya mega chara orang merinsaka sida nabi ke dulu ari kita.

¹³“Kita tu garam dunya. Tang enti garam nadai agi masin, baka ni ku jalai ngaga iya masin baru? Iya nadai guna agi, tang dibuai lalu diindik kaki mensia.

¹⁴ “Kita tu penampak dunya. Nengeri ti didirika ba atas munggu, enda ulih dilalaika.

¹⁵ Nadai mega orang nungkun lampu, lalu ngerungkup iya ngena bisin, tang ngengkahka lampu nya ba penuduk lampu, lalu lampu nya deka meri penampak ngagai semua orang dalam rumah nya.

¹⁶ Baka nya mega kita; awakka penampak kita manchar ngagai orang, ngambika sida meda pemadas pengawa kita lalu ngemuliaka Apai kita ti di serega.

¹⁷“Anang ngumbai Aku datai deka muai Adat, tauka muai ajar sida nabi. Aku ukai datai deka muai Adat, tang deka ngamatka iya.

¹⁸ Laban, enggau bendar Aku madah ngagai kita, sebedau langit enggau dunya lesap, nadai leka jaku tauka titik ti pemadu mit deka lenyau ari Adat, sebedau semua utai dikamatka.

¹⁹ Nya alai, barang sapa ngelanggar pesan ti pemadu mit tu, lalu ngajar orang ngelanggar iya, deka dikumbai pemadu mit dalam Perintah serega, tang barang sapa ngasika pesan, lalu ngajar orang ngasika iya, deka dikumbai besai dalam Perintah serega.

²⁰Laban, Aku madah ngagai kita, enti kita enda lebih agi lurus ari sida pengajar Adat enggau orang Parisi, kita enda ulih tama Perintah serega.

²¹ Kita udah ninga pasal utai ti udah dipadahka ngagai orang ke dulu kelia, ‘Anang munuh orang; barang sapa munuh orang deka kena pechara.’

²²Tang Aku madah ngagai kita, enti kita ringat ngagai menyadi lelaki tauka menyadi indu kita enggau nadai kebuah-buah, kita deka kena pechara; lalu enti kita ngeleseka menyadi kita, kita deka dibai ngagai Kunsil; lalu enti kita nyebut, ‘Nuan tu beli’, kita deka dibuai ngagai api neraka.[3]

²³Nya alai lebuh kita deka meri pemeri kita ba alta, lalu teingatka menyadi lelaki tauka menyadi indu kita bisi enda nyamai ati ngagai kita,

²⁴tinggalka pemeri kita dia di mua alta, bebaik dulu enggau iya, udah nya baru kita mansang lalu meri pemeri kita.

²⁵ “Bebaik enggau naka penyampat enggau orang ke bedawaka kita, lebuh kita benung mansang ngagai kot, enggai ke iya nyerahka kita ngagai hakim, lalu hakim nyerahka kita ngagai jejaga, lalu kita ditutup dalam rumah jil.

²⁶Enggau bendar Aku madah ngagai kita, kita enda ulih pansut ari rumah jil nya datai ke kita udah mayar semua utang kita.

²⁷ “Kita udah ninga jaku ti munyi tu, ‘Anang butang.’

²⁸Tang Aku madah ngagai kita, barang sapa merening ngagai indu enggau ati ti kamah, udah butang enggau indu nya dalam ati iya.

²⁹ Enti mata kanan nuan mai nuan bedosa, keruk lalu buai iya! Manah agi nuan lenyau sebagi ari perengka tubuh nuan, ari ke nejuka semua tubuh nuan dibuai ngagai neraka.[4]

³⁰Lalu enti jari kanan nuan mai nuan bedosa, tetak lalu buai iya! Manah agi nuan lenyau jari sepiak, ari ke nejuka semua tubuh nuan dibuai ngagai neraka.[5]

³¹ “Jaku tu udah mega disebut, ‘Barang sapa muai bini, enda tau enda meri bini iya surat sarak.’

³²Tang Aku madah ngagai kita, genap iku orang ke muai bini, kelimpah ari bini iya butang, deka ngujungka bini iya butang, lalu barang sapa jadi enggau indu ke udah sarak, butang.

³³ “Kita udah mega ninga pasal jaku ti udah disebut ngagai orang ke dulu kelia, ‘Anang bulaka semaya, tang kereja utai ti udah disemaya kita enggau Tuhan.’

³⁴Tang Aku madah ngagai kita: anang besumpah, nemuka atas nama serega, laban nya kerusi diraja Allah Taala,

³⁵ tauka atas nama dunya, laban nya pelasar ke kaki Iya, tauka atas nama Jerusalem, laban nya nengeri Raja ti besai.

³⁶Lalu anang besumpah atas pala kita empu, laban kita enda ulih ngaga indah selambar buk kita burak tauka chelum.

³⁷Semina sebut aja ‘Au’ tauka ‘Enggai’. Utai ti lebih ari nya datai ari Sitan.

³⁸ “Kita udah ninga orang nyebut jaku tu, “Mata balas mata, ngeli balas ngeli.’

³⁹ Tang Aku madah ngagai kita: Anang ngelaban orang ke jai. Enti orang nampar kuyu kanan kita, awakka iya mega nampar kuyu kiba kita.

⁴⁰Lalu enti orang deka nyara kita laban iya deka ngambi baju kita, awakka iya mega ngambi kelambi kita.

⁴¹Lalu enti orang mejalka kita bejalai sekilometer, bejalai dua kilometer.

⁴²Beri ngagai orang ke minta ari kita, lalu jali ngagai orang ke nginjau ari kita.

⁴³ “Kita udah ninga pasal jaku ti udah disebut, ‘Rinduka pangan kita, lalu begedika munsuh kita.’

⁴⁴Tang Aku madah ngagai kita: rinduka munsuh kita, lalu besampika orang ke merinsaka kita,

⁴⁵ ngambika kita nyadi anak Apai kita ti di serega, laban Iya ngasuh mata panas manchar ngagai orang ke jai enggau ngagai orang ke manah, lalu ngasuh hari ujan ke orang ke lurus enggau ke orang ke jai.

⁴⁶Enti kita semina rinduka orang ke rinduka kita, nama upah kita? Indah sida pengumpul chukai deh nemu ngereja nya.

⁴⁷Lalu enti kita semina nabi pangan kita, baka ni ku nya tau lebih ari utai ti dikereja orang bansa bukai? Indah orang bansa bukai deh nemu ngereja nya.

⁴⁸ Nya alai kita enda tau enda nyadi pemadu badas, baka Apai kita ti di serega.