Read Iban Matthew 6 Bible Online

Matthew 6 - Iban bible

Matthew 6

¹ “Anang ngereja pengawa agama di mua orang mayuh, minta diri dipeda sida, laban enti kita ngereja nya, kita nadai bulih upah ari Apai kita ti di serega.

²“Nya alai, lebuh kita meri sedekah[6] ngagai orang ke suntuk, anang mandangka diri ngereja nya baka ti dikereja orang ke pura-pura ngapa[7] dalam balai gempuru tauka ba sebelah jalai raya, minta diri dipuji mensia. Enggau bendar Aku madah ngagai kita, sida udah nerima upah sida.

³Tang lebuh kita meri sedekah ngagai orang ke suntuk, anang nejuka jari kiba kita nemu utai ti dikereja jari kanan kita,

⁴ ngambika pengawa nya dikereja kita belalai, lalu Apai kita ti meda utai ti dikereja kita belalai, deka ngupah kita.

⁵ “Lalu lebuh kita besampi, anang baka orang ke pura-pura ngapa,[8] laban sida rindu bediri lalu besampi dalam balai gempuru, enggau ba sukut jalai raya, minta diri dipeda orang. Enggau bendar Aku madah ngagai kita, sida udah nerima upah sida.

⁶Tang lebuh kita besampi, tama ke bilik, tikupka pintu, lalu besampi ngagai Apai kita ti enda dipeda. Lalu Apai kita ti meda utai ti dikereja kita belalai, deka ngupah kita.

⁷ Lebuh kita besampi, anang besebutka mayuh macham leka jaku ti nadai reti baka orang bansa bukai, ke ngumbai sampi sida didinga[9] laban sampi sida panjai.[10]

⁸ Anang baka nya, laban Apai kita nemu utai ti dipeguna kita sebedau kita minta ari Iya.

⁹ Nya alai, baka tu ku chara kita patut besampi: ‘Apai kami ti di serega: Kudus meh nama Nuan.

¹⁰Datai meh Perintah Nuan. Nyadi meh peneka Nuan di dunya enggau di serega.

¹¹Beri ngagai kami sehari tu pemakai umbas dipakai kami.[11]

¹²Ampun kami penyalah kami, baka kami ke ngampun orang ke salah enggau kami.

¹³Lalu anang mai kami ngagai penguji, tang lepaska kami ari penyai.[12]

¹⁴ “Laban enti kita ngampun orang ke salah enggau kita, Apai kita ti di serega deka mega ngampun penyalah kita.

¹⁵Tang enti kita enggai ngampun orang ke salah enggau kita, Apai kita pen enggai mega ngampun penyalah kita.

¹⁶“Lalu lebuh kita bepasa, anang ngayanka mua ti tusah, baka orang ke pura-pura ngapa,[13] laban sida ngurik mua diri ngambika orang nemu sida bepasa. Enggau bendar Aku madah ngagai kita, sida udah nerima upah sida.

¹⁷ Tang lebuh kita bepasa, empungas mua kita, lalu sugu buk kita,

¹⁸ ngambika orang enda nemu kita bepasa, tang semina dipeda Apai kita ti enda dipeda, lalu Apai kita ti meda utai ti dikereja kita belalai, deka ngupah kita.

¹⁹ “Anang nyimpan pengaya ke diri empu di dunya, alai indu gegat enggau tegar deka ngerusak, lalu perumpak tama lalu ngenchuri,

²⁰ tang simpan pengaya ke diri empu di serega, alai indu gegat, enggau tegar enda ngerusak, lalu perumpak enda tama lalu ngenchuri.

²¹Laban dia alai pengaya kita, dia meh alai ati kita.

²²“Mata nyadika lampu tubuh. Nya alai, enti mata kita menyana, semua tubuh kita penuh laban penampak,

²³tang enti mata kita enda menyana, semua tubuh kita penuh laban pemetang. Nya alai, enti penampak ti dalam kita nya pemetang, naka meh pemalat pemetang nya!

²⁴“Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Allah Taala enggau duit.[14]

²⁵ “Nya alai Aku madah ngagai kita: anang irauka pasal pengidup kita, tauka utai ti deka diempa tauka diirup kita, tauka pasal tubuh enggau gari kita. Ukai enda pengidup beguna agi ari pemakai, lalu tubuh beguna agi ari gari?

²⁶ Peda kita burung. Sida nadai betanamka utai, nadai ngetau, tauka besimpanka utai dalam setor, tang taja pia, Apai kita ti di serega nupi sida! Kati kita enda berega agi ari burung?

²⁷ Kati kita ulih nginsur umur diri panjai agi [15] ngena pengirau kita?

²⁸“Lalu nama kebuah kita irauka gari? Peda kita penumbuh bungai babas. Sida enda gawa, tauka ngaga gari ke diri empu,

²⁹ tang taja pia, Aku madah ngagai kita, indah Raja Solomon enggau semua pengaya iya, deh nadai gari ngemanah siti ari bungai nya.

³⁰ Tang enti Allah Taala ngari rumput ti di babas, ti idup sehari tu lalu dibuai pagila ngagai api, enda ke Iya deka ngari kita? Naka meh pengemit pengarap kita.

³¹“Nya alai, anang irau lalu nyebut: ‘Nama utai ti deka diempa kitai? tauka, ‘Nama utai ti deka diirup kitai?’ tauka ‘Nama gari ti deka dikena kitai?’

³²Laban nya utai ti ngirauka ati orang kapir, lalu Apai kita ti di serega nemu kita begunaka semua utai nya.

³³ Tang giga dulu Perintah Allah Taala enggau pengelurus Iya, lalu semua utai nya deka mega diberi ngagai kita.

³⁴Nya alai, anang irauka pasal pagila, laban pagila chukup pengirau ke diri empu. Penusah ke sehari tu chukup ke sehari tu.