Read Iban Matthew 7 Bible Online

Matthew 7 - Iban bible

Matthew 7

¹“Anang ngakim, ngambika kita enda diakim.

² Laban chara kita ngakim, deka dikena ngakim kita, lalu takar ti dikena kita nakar deka dikena nakar utai ke kita.

³ Nama kebuah kita betilikka empeleman ba mata menyadi kita, tang enda bedulika lumpung kayu ti ba mata kita empu?

⁴Tauka, baka ni ku kita nyebut ngagai menyadi kita, ‘Awakka aku muai empeleman ari mata nuan,’ tang kita bisi lumpung kayu dalam mata kita empu?

⁵Kita tu orang ke pura-pura ngapa![16] Buai dulu lumpung kayu ari mata kita empu. Nya baru mata kita lansik, lalu kita ulih muai empeleman ari mata menyadi kita.

⁶“Anang meri utai ti kudus ngagai ukui, lalu anang nibarka batu mutiara ngagai babi, enggai ke sida ngelunjak utai nya, lalu mutar ngamuk kita.

⁷ “Pinta, lalu kita deka nerima. Giga, lalu kita deka nemu. Tekung, lalu utai nya deka dibuka ke kita.

⁸Laban genap iku orang ke minta, deka nerima, lalu orang ke ngiga, deka nemu, lalu ke orang ke nekung, utai nya deka dibuka ke sida.

⁹Kati kita ke apai meri batu ngagai anak kita enti iya minta roti?

¹⁰Tauka meri iya ular, enti iya minta ikan?

¹¹Enti kita ke jai nemu meri utai ti manah ngagai anak kita, Apai kita ti di serega tentu nemu agi meri utai ti manah ngagai orang ke minta ari Iya!

¹² “Kereja ngagai orang baka ke dikedekaka kita kereja orang ngagai kita, laban nya reti Adat, enggau ajar sida nabi.

¹³ “Tama nengah pintu ti sempit, laban pintu ti besai enggau jalai ti luas nuju ngagai pengerusak, lalu mayuh orang nengah jalai nya.

¹⁴Tang pintu ti sempit, enggau jalai ti mar, nuju ngagai pengidup, lalu semina mimit aja orang tetemuka iya.

¹⁵ “Bejaga ari nabi ti pelesu, ke datai ngagai kita baka bedus, tang iya ti bendar sida nya ukui kampung.

¹⁶ Kita deka ngelala sida ari buah sida. Kati buah anggur diambi ari madang duri, tauka buah ara ari madang emperingat?

¹⁷Baka nya mega kayu, semua kayu ti galak mansutka buah ti manah, tang kayu ti enda galak mansutka buah ti enda manah.

¹⁸Kayu ti galak enda ulih mansutka buah ti enda manah, lalu kayu ti enda galak enda ulih mansutka buah ti manah.

¹⁹ Kayu ti enda mansutka buah ti manah deka ditebang, lalu dibuai ngagai api.

²⁰ Nya alai, kita deka ngelala sida ari buah sida.

²¹“Ukai semua orang ke ngangauka Aku ‘Tuhan, Tuhan’ deka tama ngagai Perintah serega, tang semina orang ke ngereja peneka Apai Aku ti di serega.

²²Lebuh Hari nya ila mayuh orang deka nyebut ngagai Aku ‘Tuhan, Tuhan! Kati kami nadai udah nusui pesan Allah Taala[17] dalam nama Nuan, lalu muru antu dalam nama Nuan, lalu ngereja mayuh kereja ajih dalam nama Nuan?’

²³ Udah nya Aku deka bejaku ngagai sida, ‘Aku enda ngelala kita. Rari ari Aku, kita ke ngereja penyai.’

²⁴“Nya alai, orang ke ninga jaku Aku lalu ngasi nya baka orang siku ke pintar, ke nirika rumah iya ba atas batu.

²⁵Hari ujan, ai bah, lalu ribut bepuput lalu mangka ngagai rumah nya, tang rumah nya enda tumbang, laban iya didirika ba atas batu.

²⁶“Tang orang ke ninga jaku Aku, lalu enda ngasi, nya baka orang ke beli, ke nirika rumah iya ba pasir.

²⁷Hari ujan, ai bah, lalu ribut bepuput lalu mangka ngagai rumah nya, lalu rumah nya tumbang. Balat amat rumah nya tumbang.”

²⁸ Lebuh Jesus udah nyebut jaku nya, orang mayuh alit ati ke ajar Iya,

²⁹laban Iya ngajar sida baka orang ke bisi kuasa, lalu enda baka sida pengajar Adat.