Read Iban Matthew 8 Bible Online

Matthew 8 - Iban bible

Matthew 8

¹Lebuh Jesus nurun ari bukit nya, mayuh amat orang nitihka Iya.

² Siku lelaki ke sakit lan datai ngagai Iya, besugang di mua Iya, lalu bejaku, “Tuhan, enti Nuan deka, Nuan ulih ngasuh aku tuchi.” [18]

³Jesus ngunjurka jari, negu orang nya, lalu bejaku, “Aku deka. Tuchi meh nuan.” Orang nya lalu gerai tekala nya.

⁴ Lalu ku Jesus bejaku ngagai iya, “Anang madahka tu ngagai orang, tang mansang nuan ngagai imam, minta iya meresa nuan, lalu beri piring ti diasuh Moses, kena mandangka ngagai orang mayuh, nuan udah gerai.”

⁵ Lebuh Jesus tama ngagai nengeri Kapernaum, siku pemesai soldadu Rome betemu enggau Iya, minta saup Iya.

⁶Ku iya, “Tuan, nembiak aku sakit, gali di rumah, enda ulih engkebut,[19] lalu merinsa amat.”

⁷Ku Jesus bejaku ngagai iya, “Aku deka kin lalu ngeraika iya.”

⁸Tang ku pemesai nya bejaku, “Tuan, rumah aku enda patut alai Nuan datai. Tak bejaku aja, lalu nembiak aku deka gerai.

⁹ Laban aku empu bekereja di baruh orang, lalu aku mega bisi soldadu dipegai aku. Aku bejaku ngagai siku, ‘Mupuk nuan!’ lalu iya mupuk. Aku bejaku ngagai siku, ‘Datai kitu!” lalu iya datai. Aku bejaku ngagai ulun aku, ‘Kereja tu!” iya lalu ngereja.”

¹⁰Lebuh Jesus ninga nya, Iya balat alit ati, lalu bejaku ngagai orang ke nitihka Iya, “Enggau bendar Aku madah ngagai kita, indah di menua Israel deh Aku nadai udah kala tetemuka pengarap ti baka tu.

¹¹ Aku madah ngagai kita, mayuh orang deka datai ari timur enggau ari barat, lalu duduk makai enggau Abraham, Isak enggau Jakop dalam Perintah serega,

¹² tang orang ke patut bempu Perintah nya deka dibuai ngagai endur ti petang, alai sida deka nyabak sereta begerit ngeli.”

¹³Jesus lalu bejaku ngagai pemesai soldadu nya, “Mupuk meh nuan. Utai ti dikarapka nuan, deka nyadi.” Nembiak pemesai nya lalu gerai betul-betul ba maya nya.

¹⁴Lebuh Jesus tama ngagai rumah Peter, Iya meda mentua indu Peter gali ba peninduk iya, sakit chelap angat.

¹⁵Jesus negu jari iya, lalu iya gerai. Iya angkat, lalu mela Jesus.

¹⁶Lemai nya mayuh orang ke dirasuk antu dibai ngagai Jesus, lalu Iya muru roh antu ngena seleka aja jaku, lalu ngeraika semua sida ke sakit.

¹⁷ Tu ngamatka jaku ti udah disebut Tuhan ngena nabi Isaiah, “Iya nanggung pemedis kitai lalu muai penyakit kitai.”

¹⁸Lebuh Jesus meda pemayuh orang begelumu ngelingi Iya, Iya lalu ngasuh sida murid Iya ngelayang ke seberai danau nya.

¹⁹Siku pengajar Adat datai ngagai Iya, lalu bejaku, “Pengajar, aku deka bejalai enggau Nuan ngagai sebarang endur Nuan bejalai.”

²⁰Ku Jesus bejaku ngagai iya, “Munsang bisi lubang, lalu burung bisi tansang, tang Anak Mensia nadai endur alai ngalika Diri.”

²¹ Siku ari sida murid Iya bejaku ngagai Iya, “Tuhan, awakka aku pulai dulu lalu nguburka apai aku.”

²² Tang ku Jesus bejaku ngagai iya, “Titihka Aku. Awakka orang ke mati nguburka bala sida empu ke mati.”

²³Lebuh Jesus nepan ngagai perau, sida murid Iya lalu mupuk enggau Iya.

²⁴Tekala nya kabut lalu mangka ba danau nya, lalu perau sida nyau deka karam. Tang Jesus tinduk.

²⁵Sida mansang ngagai iya lalu ngerak Iya. Ku sida, “Selamatka kitai, Tuhan! Mati kitai tu!”

²⁶ Ku Iya bejaku ngagai sida, “Nama kebuah kita takut? Mit amat meh pengarap kita.” Iya angkat lalu ngerara ribut enggau gelumbang. Semua utai lalu teduh magang.

²⁷Sida balat alit ati, ku sida, “Sapa orang tu, datai ke ribut enggau gelumbang ngasika Iya?”

²⁸Lebuh Jesus datai di menua Gadara,[20] di seberai danau nya, dua iku lelaki ke dirasuk antu pansut ari pendam lalu mansang ngagai Iya. Seduai tu mangah amat, datai ke orang nyau nadai berani bejalai nengah jalai nya.

²⁹Tekala nya seduai iya lalu merakka nyawa bejaku, “Nama guna Nuan enggau kami, Nuan Anak Allah Taala? Kati Nuan datai deka merinsaka kami sebedau maya ti patut?”

³⁰Nyadi enda jauh ari endur nya bisi raban babi, benung makai.

³¹Lalu ku bala antu nya bejaku ngagai Jesus, “Enti Nuan muru kami, awakka kami tama ngagai raban babi nya.”

³²Lalu ku Iya bejaku ngagai sida, “Mupuk meh kita!” Sida mupuk, lalu tama ngagai raban babi nya. Semua babi nya lalu belanda nurun tebiang, terejun ngagai danau, lalu mati lemas.

³³Orang ke ngibun raban babi nya lalu rari, tama ngagai nengeri, lalu madahka semua utai nya, enggau pasal utai ti udah nyadi ba orang ke dirasuk antu nya.

³⁴Genap iku orang lalu pansut ari nengeri nya deka betemu enggau Jesus, lalu lebuh sida meda Iya, sida lalu minta Iya mupuk ari menua sida.