Read Iban Matthew 9 Bible Online

Matthew 9 - Iban bible

Matthew 9

¹Jesus nepan ngagai perau, ngelayang danau nya ke seberai, lalu datai ba nengeri Iya Empu. [21]

² Orang lalu mai ngagai Iya siku lelaki ke sakit bajung, gali ba peninduk. Lebuh Jesus meda pengarap sida, Iya lalu bejaku enggau orang ke sakit bajung nya, “Anang takut, anak! Dosa nuan diampun.”

³Sekeda pengajar Adat lalu bejaku enggau pangan diri, “Orang tu bejaku busung!”

⁴Tang Jesus nemu peragam ati sida, lalu ku Iya bejaku, “Nama kebuah kita berunding jai baka nya dalam ati kita?

⁵Ni ti nyamai agi disebut, ‘Dosa nuan diampun,’ tauka ‘Angkat nuan, lalu pulai ke rumah’?

⁶Tang ngambika kita nemu Anak Mensia bisi kuasa ngampun dosa di dunya tu” -- Iya lalu bejaku ngagai orang ke sakit bajung nya -- “Angkat nuan, bai peninduk nuan, lalu pulai ke rumah.”

⁷Lelaki nya angkat, lalu pulai ke rumah.

⁸Lebuh orang mayuh meda nya, sida takut, lalu muji Allah Taala ti udah meri kuasa ti besai baka nya ngagai mensia.

⁹Lebuh Jesus bejalai ari endur nya, Iya tepedaka siku pengumpul chukai ke benama Matthew, duduk dalam opis iya. Ku Jesus bejaku ngagai iya, “Titihka Aku.” Matthew angkat, lalu nitihka Iya.

¹⁰ Lebuh Jesus benung makai dalam rumah Matthew,[22] mayuh pengumpul chukai enggau orang ke bedosa datai lalu makai enggau Iya sereta enggau sida murid Iya.

¹¹Lebuh orang Parisi meda nya, sida lalu bejaku ngagai murid Iya, “Nama kebuah pengajar kita begulai makai enggau pengumpul chukai sereta enggau orang ke bedosa?”

¹²Lebuh Jesus ninga nya, Iya lalu bejaku, “Orang ke gerai enda begunaka lutur, tang semina orang ke sakit.

¹³ Mupuk kita lalu giga reti jaku tu: ‘Aku begunaka pengasih, ukai piring.’ Laban Aku datai ukai ngangauka orang ke lurus, tang ngangauka orang ke bedosa.”

¹⁴Udah nya sida murid John Pemaptisa datai ngagai Jesus, lalu nanya Iya, “Nama kebuah kami enggau orang Parisi selalu bepasa, tang murid Nuan enda?”

¹⁵Ku Jesus bejaku ngagai sida, “Kati bala pengabang ba gawai tikah ngulit seagi-agi lelaki ke ditikah nya meruan enggau sida? Maya deka datai alai lelaki ke ditikah nya deka diambi ari sida. Nya baru sida deka bepasa.

¹⁶Nadai orang nampal baju ti lama ngena chebik kain ti baru, laban chebik kain ti baru deka kesat, lalu ngasuh baju nya balat agi charik.

¹⁷Lalu nadai mega orang nyimpan wain ti baru dalam kambut wain ti lama, enggai ke kambut nya pechah, lalu wain nya deka nyaya, lalu kambut nya rusak, tang wain ti baru disimpan dalam kambut ti baru. Nya baru wain enggau kambut nya enda rusak.”

¹⁸Lebuh Jesus agi benung bejaku ngagai sida, siku pemesai orang Judah datai, besugang di mua Iya, lalu bejaku, “Anak indu aku baru udah mati. Tang aku minta Nuan datai lalu ngengkahka jari Nuan ba atas iya, ngambika iya idup baru.”

¹⁹Jesus angkat lalu nitihka iya, sama enggau sida murid Iya.

²⁰ Siku indu ke sakit begetah dua belas taun datai ari belakang, lalu negu puting kelambi Jesus,

²¹laban ku indu nya bejaku dalam ati diri, “Enti aku negu gari Iya, aku deka gerai.”

²² Jesus nguing, tepedaka indu nya, lalu bejaku, “Anak, anang takut! Pengarap nuan udah ngeraika nuan.” Indu nya lalu gerai tekala nya.

²³Lebuh Jesus datai ba rumah pemesai nya, lalu tepedaka bala orang ke besepuka kesuling, enggau orang ke begau,

²⁴Iya lalu bejaku, “Pansut kita ari tu! Laban anak mit tu ukai mati, tang tinduk!” Sida lalu ketawaka Iya.

²⁵Tang lebuh semua orang udah diburu pansut, Jesus tama, lalu megai jari anak mit nya. Anak mit nya lalu angkat.

²⁶Berita pasal nya ngelekai di serata menua nya.

²⁷ Lebuh Jesus bejalai ari endur nya, dua iku orang ke buta nitihka Iya, lalu ngangau, “Anak David, kasihka kami!”

²⁸Lebuh Jesus tama ngagai rumah nya, orang buta ke dua iku nya lalu datai ngagai Iya. Iya lalu bejaku ngagai seduai iya, “Kati seduai arapka Aku ulih ngeraika seduai?” “Kami arap, Tuhan!” ku seduai iya nyaut.

²⁹Jesus lalu negu mata seduai iya, lalu bejaku, “Awakka utai ti dikarapka seduai nyadi!”

³⁰Mata seduai iya lalu tebuka. Jesus lalu berat-rat nangkan seduai iya enggau jaku, “Anang madahka utai tu ngagai orang!”

³¹Tang seduai iya angkat ari endur nya, lalu madahka berita pasal Jesus di serata menua nya.

³² Lebuh orang dua iku nya mupuk ari endur nya, siku lelaki ke bisu laban antu dibai ngagai Jesus.

³³Lebuh antu nya udah diburu, orang nya lalu bejaku, lalu semua orang balat alit ati, ku sida, “Nadai utai baka tu udah kala dipeda di menua Israel!”

³⁴ Tang ku orang Parisi bejaku, “Iya muru antu ngena kuasa raja antu.”

³⁵ Jesus bejalai ngagai semua nengeri enggau genturung pendiau, ngajar dalam balai gempuru, nusui Berita Manah pasal Perintah Allah Taala, lalu ngeraika orang ari semua macham pemedis enggau penyakit.

³⁶ Lebuh Iya meda bala orang mayuh, Iya kasihka sida laban sida irau ati sereta nadai daya, baka bedus ti nadai orang ngibun.

³⁷ Iya lalu bejaku ngagai sida murid Iya, “Utai ti diketau mayuh, tang orang ke ngetau mimit.

³⁸Nya alai besampi minta orang ke bempu umai ngirumka mayuh agi orang ngetau.”