Read Iban Mark 1 Bible Online

Mark 1 - Iban bible

Mark 1

¹Tu pun Berita Manah pasal Jesus Kristus, ti Anak Allah Taala.

² Munyi ti ditulis dalam bup nabi Isaiah,[1] “Ku Allah Taala bejaku, ‘Dinga! Aku ngirumka seruan Aku dulu ari Nuan;[2] iya deka nyendiaka jalai ke Nuan.’

³ Siku orang ngangau di menua puang: ‘Sediaka jalai ke Tuhan; Gaga jalai Iya rurus!’ ”

⁴ John Pemaptisa pegari[3] di menua puang, madahka pemaptisa nesal ati ke pengampun dosa.

⁵Semua orang ari serata menua Judea, enggau ari Jerusalem mansang ngagai iya. Sida ngaku dosa sida, lalu iya maptisa sida ba Sungai Jordan.

⁶ Gari John digaga ari bulu unta, lalu belulang ti melit punggung iya digaga ari kulit jelu. Lalu pemakai iya buntak enggau ai manyi.

⁷Ku iya madah ngagai orang mayuh, “Iya ke datai dudi ari aku lebih agi bekuasa ari aku, datai ke aku enda tau meremi lalu muka tali kasut Iya.

⁸Aku udah maptisa kita ngena ai, tang Iya deka maptisa kita ngena[4] Roh Kudus.”[5]

⁹ Lebuh maya nya Jesus datai ari Nasaret di menua Galili lalu dibaptisa ulih John ba Sungai Jordan.

¹⁰Lebuh Iya pansut ari dalam ai, Iya tekala nya meda langit tebuka, lalu Roh Kudus nurun ngagai Iya baka burung achang.

¹¹ Nyawa lalu bisi didinga bejaku ari serega, “Nuan tu Anak ti dikesayauka Aku. Aku rindu bendar ke Nuan.”

¹²Roh Kudus lalu tekala nya mai Iya ngagai menua puang.

¹³Iya diau di menua puang empat puluh hari, diuji Sitan. Iya diau begulai enggau jelu babas, lalu bala melikat ngintu Iya.

¹⁴Lebuh John udah ditangkap, Jesus bejalai ngagai menua Galili, nusui Berita Manah Allah Taala.

¹⁵ Ku John bejaku, “Timpuh udah datai, lalu Perintah Allah Taala nyau semak! Nesal ati ke dosa kita, lalu arapka Berita Manah!”

¹⁶ Lebuh Jesus benung bejalai ba tebing Danau Galili, Iya tepedaka dua iku orang berikan, Simon enggau menyadi lelaki iya Andrew, benung nyala.

¹⁷Ku Jesus bejaku ngagai seduai iya, “Titihka Aku. Aku deka ngajar seduai chara ngulihka mensia.”

¹⁸Tekala nya seduai iya ninggalka jala seduai, lalu nitihka Iya.

¹⁹Lebuh Iya udah bejalai jauh mimit ari nya, Iya tepedaka dua iku agi orang diri menyadi, James seduai John, anak Sebedi, benung nyeruri jala dalam perau sida.

²⁰Tekala nya Iya ngangauka seduai iya, lalu seduai iya ninggalka apai seduai iya Sebedi sama enggau orang gaji sida dalam perau, lalu nitihka Jesus.

²¹Jesus enggau sida murid Iya datai di nengeri Kapernaum. Kena hari Sabat, Iya tama ngagai balai gempuru lalu ngajar.

²² Sida alit ati ninga ajar Iya, laban Iya ngajar baka orang ke bisi kuasa, ukai baka sida pengajar Adat.

²³ Nyadi dalam balai gempuru nya bisi siku lelaki ke dirasuk roh ti jai.

²⁴ Ku orang nya bejaku enggau nyawa ti inggar, “Nama utai ti deka dikereja Nuan ngagai kami, Jesus orang Nasaret? Kati Nuan datai ditu deka ngerusak kami? Aku ngelala Nuan. Nuan tu Seruan ti Kudus ari Allah Taala!”

²⁵Jesus lalu ngerara iya, “Anang bejaku! Pansut nuan ari iya!”

²⁶Roh ti jai nya lalu ngusak orang nya, nyerauh lalu udah nya pansut ari iya.

²⁷Semua orang balat alit ati lalu belabuh betanya ngagai pangan diri, “Nama utai tu? Tu ajar ti baru. Iya bisi kuasa! Iya ngerara roh ti jai, lalu sida ngasika Iya!”

²⁸Berita pasal Iya lalu tekala nya belabuh ngelekai ngagai semua endur di serata menua Galili.

²⁹Lebuh Jesus mupuk ari balai gempuru nya, Iya enggau James seduai John tama ngagai rumah Simon seduai Andrew.

³⁰Nyadi mentua indu Simon gali sakit chelap angat, lalu sida madahka pasal iya ngagai Jesus.

³¹Jesus mansang lalu megai jari mentua Simon, lalu ngangkatka iya. Iya lalu gerai, lalu belabuh mela sida.

³² Lebuh padam mata panas lemai nya, orang mai ngagai Jesus semua orang ke sakit, tauka dirasuk antu.

³³Lalu semua orang di nengeri nya begelumu di mua rumah nya.

³⁴Iya ngeraika mayuh orang ke sakit laban mayuh macham pemedis, lalu muru mayuh antu. Iya enda nyagi sida antu bejaku, laban sida ngelala sapa Iya.

³⁵Pagi hari siti, sebedau rerak tawas, Jesus angkat, lalu bejalai ngagai siti endur ti sunyi, lalu besampi.

³⁶Simon enggau bala pangan iya lalu ngiga Iya.

³⁷Lebuh sida udah tetemuka Iya, sida lalu bejaku, “Semua orang ngiga Nuan.”

³⁸Ku Iya nyaut, “Aram kitai bejalai ngagai nengeri bukai, ngambika Aku nusui Berita Manah dia mega, laban nya endang kebuah Aku datai.”

³⁹ Iya lalu bejalai di serata menua Galili, nusui Berita Manah dalam balai gempuru sida, lalu muru antu.

⁴⁰Siku lelaki ke sakit lan datai ngagai Jesus, besugang, minta tulung Jesus. Ku iya, “Enti Nuan deka, Nuan ulih ngasuh aku tuchi.”[6]

⁴¹Enggau ati ti sinu[7] ke iya Jesus ngunjurka jari lalu negu orang nya, lalu bejaku, “Aku deka. Tuchi meh nuan!”

⁴²Tekala nya penyakit nya lalu nadai agi ba orang nya, lalu iya nyadi tuchi.

⁴³Lebuh Jesus udah berat-rat nangkan orang nya enggau jaku, Iya lalu kemaya nya ngasuh iya mupuk.

⁴⁴ Ku Jesus bejaku ngagai iya, “Anang madahka tu ngagai orang, tang mansang nuan ngagai imam lalu asuh iya meresa nuan, lalu beri piring ti udah diletak Moses, kena nuan mandangka diri ngagai orang mayuh nuan udah tuchi.”

⁴⁵Tang orang nya mupuk lalu belabuh nusui berita nya di semua endur. Ketegal nya Jesus nyau enda ulih agi ngayanka Diri lebuh Iya tama ngagai nengeri. Tang Iya diau di luar ba endur ti sunyi, lalu orang datai ngagai Iya ari semua endur.