Read Iban Mark 11 Bible Online

Mark 11 - Iban bible

Mark 11

¹Lebuh sida nyau semak Jerusalem, datai ba Betpagi enggau Betani, ba Bukit Kana, Iya ngasuh dua iku murid Iya bejalai dulu,

²ku Iya, “Alai seduai mupuk ngagai genturung pendiau tunga ke mua seduai. Lebuh seduai tama ngagai genturung pendiau nya, seduai deka nemu siku anak keledai ditanchang, ti nadai udah kala ditepan orang. Buka tali iya, lalu bai iya kitu.

³Enti orang nyebut ngagai seduai, ‘Nama kebuah seduai ngereja nya?’ sebut jaku tu, ‘Tuhan begunaka iya, lalu Iya deka mulaika jelu tu enda lama da agi.’ ”

⁴ Seduai iya mupuk, lalu nemu siku anak keledai ditanchang semak pintu, ba jalai raya. Lebuh seduai iya muka tali jelu nya,

⁵sekeda orang ke bediri dia lalu bejaku ngagai seduai iya, “Nama kebuah seduai muka tali anak keledai nya?”

⁶Seduai iya lalu madahka jaku Jesus ngagai sida. Sida lalu nejuka seduai iya mai anak keledai nya.

⁷ Seduai iya lalu mai anak keledai nya ngagai Jesus, lalu ngelempaika serayung seduai iya ba jelu nya. Jesus lalu nepan ba jelu nya.

⁸Mayuh orang nganchau serayung sida ba jalai raya nya. Sida ke bukai nganchau dan kayu ti dijarau sida di kebun.

⁹ Orang ke bejalai di mua, enggau orang ke nitih ari belakang manjung, “Hosanna![50] Beberekat meh Iya ke datai dalam nama Tuhan!

¹⁰Beberekat meh perintah aki kitai David ti deka datai! Hosanna[51] ke Allah Taala di serega ti pemadu tinggi!”

¹¹ Jesus lalu tama ngagai nengeri Jerusalem, lalu mansang ngagai Rumah Sembiang. Lebuh Iya udah bejalai meda semua utai dia, Iya lalu pansut ngagai Betani enggau sida dua belas, laban hari nyau lemai.

¹²Hari siti, lebuh sida pulai ari Betani, Iya lapar.

¹³Lebuh Iya tepedaka ari jauh sepun kayu ara ti bedaun, Iya mansang ngagai kayu nya, deka ngiga buah ba kayu nya. Lebuh Iya datai ba kayu nya, Iya nadai tetemuka buah ba kayu nya tang semina daun aja, laban nya endang ukai musin buah ara.

¹⁴Iya lalu bejaku ngagai kayu nya, “Awakka orang nadai agi makai buah nuan!” Sida murid Iya ninga nya.

¹⁵Sida lalu datai di Jerusalem. Iya tama ngagai Rumah Sembiang, lalu belabuh muru orang ke bejual-bebeli dalam Rumah Sembiang nya. Iya nungkupka mija orang ke penukar wang, enggau bangku orang ke nyual burung achang.

¹⁶Lalu Iya enda nyagi orang mai utai nengah Rumah Sembiang.

¹⁷ Udah nya Iya ngajar orang mayuh. Ku Iya, “Endang udah ditulis, ‘Rumah Aku deka dikumbai rumah sembiang ke semua bansa.’ Tang kita udah ngaga iya nyadi sarang perumpak.”

¹⁸Lebuh sida tuai imam enggau sida pengajar Adat ninga nya, sida majak begigaka jalai munuh Iya, laban sida takutka Iya, laban semua orang mayuh bela alit ati ninga ajar Iya.

¹⁹ Lebuh hari nyau lemai, Iya enggau sida murid Iya[52] pansut ari nengeri nya.

²⁰Tumu pagi hari siti lebuh sida mansa, sida meda kayu ara nya udah mati nyentuk ngagai urat.

²¹Peter lalu ingat, lalu bejaku ngagai Iya, “Peda nya, Pengajar![53] Kayu ara ti disumpah Nuan, udah mati!”

²²Jesus lalu nyaut sida, “Arapka [54] Allah Taala.

²³ Enggau bendar Aku madah ngagai kita, barang sapa nyebut ngagai bukit tu, ‘Awakka nuan diangkatka lalu buai diri empu ngagai tasik,’ lalu kita enda kakang ati, tang arapka utai ti disebut kita nya deka nyadi, utai nya deka dikereja ke iya.

²⁴ Nya alai Aku madah ngagai kita, sebarang utai ti dipinta kita ngena sampi, arapka diri udah nerima[55] utai nya, lalu utai nya deka diberi ngagai kita.[56]

²⁵ Lalu lebuh kita bediri besampi, ampun dulu orang ke alai kita pedis ati, ngambika Apai kita ti di serega mega ngampun penyalah kita.

²⁶Tang enti kita enggai ngampun orang, Apai kita ti di serega pen enggai mega ngampun penyalah kita.”[57]

²⁷Sida lalu datai baru di Jerusalem. Lebuh Iya benung bejalai dalam Rumah Sembiang, sida tuai imam, sida pengajar Adat, enggau sida tuai bansa datai ngagai Iya,

²⁸lalu bejaku, “Nama kuasa ti dikena Nuan ngereja utai tu? Sapa meri Nuan kuasa ngereja nya?”

²⁹Jesus lalu bejaku ngagai sida, “Aku deka nanya kita siti tanya. Saut Aku, nya baru Aku deka madahka kuasa ti dikena Aku ngereja utai tu.

³⁰Kati pemaptisa John datai ari serega tauka ari mensia? Saut Aku.”

³¹Sida lalu betalat enggau pangan diri, “Enti kitai nyebut, ‘Ari serega,’ Iya deka nyebut, ‘Enti pia, nama kebuah kita enda arapka John?’

³²Tang enti kitai nyebut, ‘Ari mensia’?” -- sida takutka orang mayuh, laban semua orang bela ngumbai John nya nabi.

³³Nya alai sida nyaut Jesus, “Enda kami nemu.” Jesus lalu bejaku ngagai sida, “Aku pen enggai meh madah ngagai kita kuasa ti dikena Aku ngereja utai tu.”