Read Iban Mark 12 Bible Online

Mark 12 - Iban bible

Mark 12

¹ Udah nya Iya belabuh bejaku ngagai sida ngena jaku sempama: “Orang siku numbuhka kebun anggur, ngaga pagar ngelingi kebun nya, numbak lubang alai ngengkahka pitan anggur, lalu ngaga sebuah menara peninjau; udah nya iya ngasuh orang nyua kebun nya, lalu iya bejalai[58] ngagai menua bukai.

²Lebuh maya ngetau, iya ngasuh siku ulun iya mansang ngagai orang ke nyua kebun nya, deka ngambi ari sida ungkup iya ari asil kebun nya.

³Tang sida nangkap ulun nya, malu iya, lalu muru iya pulai puang.

⁴Udah nya iya ngirumka siku agi ulun. Siku tu dipalu sida ba pala lalu dikeleseka sida.

⁵Iya lalu ngirumka siku da agi ulun, lalu siku nya dibunuh sida. Lalu baka nya mega sida ngereja ngagai mayuh ulun ti bukai. Sekeda dipalu sida, lalu sida ti bukai dibunuh sida.

⁶Iya bisi siku agi orang ke deka dikirumka iya, iya nya anak ke dikesayauka iya. Ke pengujung iya, iya ngirumka anak iya nya, ku iya, ‘Sida tentu deka bebasaka anak aku.’

⁷Tang ku bala orang ke nyua kebun nya bejaku enggau pangan diri, ‘Tu orang ke bempu waris. Aram kitai munuh iya, ngambika pesaka nya diempu kitai.’

⁸Nya alai sida nangkap iya, munuh iya, lalu muai iya[59] ari kebun anggur nya.

⁹“Nama utai ti deka dikereja orang ke bempu kebun nya? Iya deka datai, lalu munuh[60] bala orang ke nyua kebun nya, lalu nyerahka kebun nya ngagai orang bukai.

¹⁰ Kati kita nadai udah kala macha dalam Bup Kudus? ‘Batu ti ditulak[61] tukang rumah udah nyadi batu ti pemadu beguna.

¹¹Utai tu udah dikereja Tuhan, lalu ba peda kami, utai nya manah amat!’ ”

¹² Lebuh sida nemu Iya udah nyebut jaku sempama nya ngelaban sida, sida lalu nguji nangkap Iya, tang sida takutka orang mayuh. Nya alai sida ninggalka Iya, lalu mupuk ari endur nya.

¹³Sida lalu ngasuh sekeda orang Parisi enggau sekeda nembiak Herod mansang ngagai Jesus, deka manjuk Iya ngena jaku ti disebut Iya Empu.[62]

¹⁴Sida datai lalu bejaku enggau Iya, “Pengajar, kami nemu Nuan endang madahka utai ti bendar, lalu enda bedulika orang; laban Nuan enda bepilih mua mata, tang ngajar utai ti bendar pasal jalai Allah Taala nitihka pemendar. Padahka ngagai kami, kati kitai ngelaban Adat tauka enda enti kitai mayar chukai ngagai Raja Besai?

¹⁵Kati kitai patut mayar tauka enda?” Tang Jesus nemu sida semina pura-pura ngapa nanyaka nya, nya alai Iya lalu nyaut, “Nama kebuah kita nguji Aku? Bai kitu sesingkap duit[63] ngagai Aku ngambika Aku meda iya.”

¹⁶Sida lalu mai sesingkap duit ngagai Iya. Iya lalu bejaku ngagai sida, “Gambar sapa enggau nama sapa tu?” “Enggi Raja Besai,” ku sida nyaut.

¹⁷ Jesus lalu bejaku ngagai sida, “Utai Raja Besai, beri ngagai Raja Besai. Utai Allah Taala, beri ngagai Allah Taala.” Sida lalu balat amat alit ati ke Iya.

¹⁸ Sekeda orang Saduki, ke ngumbai mensia nadai angkat ari mati, datai ngagai Jesus lalu nanya ngagai Iya,

¹⁹ “Pengajar, Moses udah nulis ke kitai, ‘enti lelaki mati ninggalka bini, tang nadai anak, menyadi lelaki iya enda tau enda jadi enggau balu nya, ngambika seduai iya bisi anak ngarika menyadi iya.’

²⁰Nyadi sida menyadi nya tujuh iku. Iya ke tuai jadi enggau indu nya, lalu lebuh iya mati iya nadai ninggalka anak.[64]

²¹Udah nya menyadi ke lumur dua jadi enggau indu nya, lalu lelaki nya mega mati nadai ninggalka anak. Baka nya mega menyadi ke lumur tiga.

²²Nadai siku sida tujuh nya ninggalka anak. Ke penudi iya, indu nya empu mega mati.

²³Lebuh pengangkat orang ari mati, sapa bempu bini nya? Laban semua sida tujuh iku nya bela udah ampit magang jadi enggau iya.”

²⁴Ku Jesus bejaku ngagai sida, “Enda ka penemu kita salah, laban kita enda nemu Bup Kudus, tauka kuasa Allah Taala?

²⁵Laban lebuh orang angkat ari mati, sida enda jadi melaki-bini tauka nikah, tang baka melikat ti di serega.

²⁶ Nyadi pasal orang ke mati diangkatka idup baru, kati kita nadai udah kala macha dalam Bup Moses, ba genteran ti ngenang pasal babas ti diempa api, pasal jalai Allah Taala bejaku ngagai Moses, ‘Aku tu Allah Taala Abraham, Isak, enggau Jakop’?

²⁷Iya ukai Allah Taala ke orang ke mati, tang ke orang ke idup. Penemu kita amat salah.”

²⁸Siku pengajar Adat datai semak lalu ninga sida bekelikuh enggau pangan diri. Lebuh iya ninga pemanah saut Jesus, iya lalu nanya Jesus, “Ni pesan ti pemadu besai?”

²⁹ Jesus lalu nyaut, “Pesan ti pemadu besai nya, ‘Pendingka tu, O kita orang Israel! Tuhan Allah Taala kitai endang siku aja.

³⁰Kita enda tau enda rinduka Tuhan Allah Taala kita, enggau pengabis ati kita, enggau pengabis semengat kita, enggau pengabis runding kita, enggau pengabis pengering kita.’

³¹ Pesan ti lumur dua nya: ‘Rinduka pangan nuan, baka nuan ke rinduka diri empu.’ Nadai pesan bukai ti besai agi ari pesan dua bengkah nya.”

³² Pengajar Adat nya lalu bejaku ngagai Iya, “Betul utai ti ku Nuan, Pengajar! Munyi ti ku Nuan, ‘Allah Taala endang siku aja, lalu nadai petara bukai, kelimpah ari Iya,’

³³ lalu ‘rinduka Iya enggau pengabis ati nuan, enggau pengabis runding nuan, enggau pengabis pengering nuan,’ lalu ‘rinduka pangan diri baka nuan ke rinduka diri empu.’ Tu lebih agi beguna ari semua piring tunu enggau semua piring bukai.”

³⁴ Lebuh Jesus meda iya udah nyaut enggau betul, Iya lalu bejaku ngagai iya, “Nuan enda jauh ari Perintah Allah Taala.” Udah bekau nya, nadai orang agi berani nanyaka utai ngagai Iya.

³⁵Lebuh Jesus benung ngajar dalam Rumah Sembiang, Iya nanya, “Baka ni ku sida pengajar Adat tau ngumbai Kristus peturun David?

³⁶ David empu, ulih kuasa Roh Kudus, madah: ‘Ku Tuhan bejaku ngagai Tuhan aku, “Duduk Nuan muak ari kanan Aku datai ke Aku udah ngengkahka bala munsuh Nuan di baruh kaki Nuan.” ‘

³⁷David empu ngumbai Iya ‘Tuhan.’ Nya alai baka ni ku Iya tau nyadi peturun David?” Lalu bala orang mayuh gaga amat mendingka Iya.

³⁸Lebuh Iya ngajar sida, Iya bejaku munyi tu, “Bejaga kita ari sida pengajar Adat, ke rindu bejalai ngena baju panjai, lalu ditabi orang ba sebelah pasar,

³⁹lalu milih penuduk ti pemadu manah dalam balai gempuru, enggau penuduk ti di atas lebuh pengerami makai besai.

⁴⁰Sida ngerampas rumah indu ke balu, lalu pura-pura ngapa ngaga diri lama besampi. Sida deka diukum berat agi.”

⁴¹Jesus duduk semak sarang wang Rumah Sembiang, lalu nengkilaka orang nepuka duit ke dalam sarang wang nya. Mayuh orang ke kaya nepuka mayuh duit.

⁴²Siku indu ke balu sereta seranta datai, lalu nepuka dua singkap duit engkeraju, ti mimit amat rega.

⁴³Jesus lalu ngangauka sida murid Iya lalu bejaku ngagai sida, “Enggau bendar Aku madah ngagai kita, indu balu ke seranta tu udah nepuka mayuh agi duit ke dalam sarang wang nya ari semua sida bukai.

⁴⁴Laban sida ti bukai meri ari pemayuh utai ti dikemisi sida, tang indu ke seranta tu, udah meri semua utai ti dikemisi iya, semua utai ti dikena iya beridup.”