Read Iban Mark 13 Bible Online

Mark 13 - Iban bible

Mark 13

¹Lebuh Iya pansut ari Rumah Sembiang, siku murid bejaku ngagai Iya, “Pengajar, peda Nuan pemesai batu enggau pemesai rumah nya!”

² Jesus lalu nanya iya, “Kati nuan bisi meda rumah ti besai nya? Sigi pen nadai meh batu nya deka mengkang betusun baka nya. Semua batu nya deka diruntuhka magang.”

³Lebuh Jesus duduk ba Bukit Kana, ti betiban enggau Rumah Sembiang, Peter, James, John enggau Andrew datai kediri sida aja ngagai Iya, lalu nanya Iya,

⁴ “Padahka ngagai kami, kemaya utai nya deka nyadi, enggau tanda ti deka nunjukka semua utai nya deka nyadi.”

⁵Jesus lalu bejaku ngagai sida, “Bejaga kita, enggai ke orang nesatka kita.

⁶ Mayuh orang deka datai ngena nama Aku, lalu bejaku, ‘Aku tu meh Iya!’[65] lalu sida deka nesatka mayuh orang.

⁷Lebuh kita ninga munyi perang enggau berita perang, anang takut. Utai nya enda tau enda nyadi, tang pengujung apin datai.

⁸Bansa deka beperang ngelaban bansa, lalu menua deka beperang ngelaban menua. Tanah berenyang deka nyadi ba mayuh bengkah endur. Lapar pungkang deka nyadi. Utai tu semina pun iya aja, baka indu ke radai deka beranak.

⁹ “Tang kita empu enda tau enda bejaga; laban kita deka diserahka ngagai Kunsil; lalu kita dipalu dalam balai gempuru; lalu kita deka bediri di mua gabenor, enggau di mua bala raja ketegal Aku, ngambika kita besaksi ngagai sida.

¹⁰Lalu Berita Manah enda tau enda dulu ditusui ngagai semua bansa.

¹¹ Lebuh sida mai kita ngagai kot lalu nyerahka kita, anang irauka utai ti deka disebut kita. Tak sebut aja sebarang utai ti diberi ngagai kita lebuh maya nya, laban ukai kita ke bejaku, tang Roh Kudus.

¹²Menyadi deka nyerahka menyadi ngambika iya dibunuh, lalu apai deka nyerahka anak, lalu anak deka angkat ngelaban apai indai, lalu ngasuh sida dibunuh.

¹³ Lalu semua orang deka begedika kita ketegal nama Aku. Tang orang ke tan datai ke ujung, deka diselamatka.

¹⁴ “Tang lebuh kita meda ‘Utai ti Pemadu Jai’ bediri ba endur ti enda patut alai iya bediri (awakka orang ke macha meretika utai tu), orang ke di Judea enda tau enda rari ngagai bukit.

¹⁵ Orang ke ba atas perabung enda tau nurun, tauka tama ngagai rumah ngambi utai iya.

¹⁶Orang ke di umai enda tau pulai lalu ngambi kelambi iya.

¹⁷ Naka meh penusah indu ke ngandung, enggau sida indai ke nusuka anak lebuh maya nya!

¹⁸Besampi minta utai nya ukai nyadi lebuh musin chelap!

¹⁹ Laban lebuh maya nya ila penusah ti amat besai deka nyadi, baka ti nadai udah kala nyadi kenyau ari penumbuh dunya nyentuk ngagai diatu, tauka jemah ila.

²⁰Lalu enti Tuhan enda ngurangka penyampau hari nya, nadai mensia ulih diselamatka, tang ketegal nembiak ke udah dipilih Iya, Iya udah ngurangka penyampau hari nya.

²¹Lalu enti orang nyebut ngagai kita lebuh maya nya, ‘Peda kita! Tu Kristus!’[66] tauka, ‘Peda kita! Nyin Iya!’, anang arapka nya.

²² Laban Kristus ti pelesu, enggau nabi ti pelesu deka pegari, lalu ngereja mayuh kereja ajih, enggau kereja ti nyelai kena nesatka bala nembiak ke udah dipilih Allah Taala, enti ulih.

²³Tang kita enda tau enda bejaga! Aku udah madahka semua utai ngagai kita.

²⁴ “Tang lebuh maya nya ila, udah bekau penusah ti besai nya nyadi, mata hari deka piam, lalu bulan enda agi manchar,

²⁵ lalu bintang deka labuh ari langit, lalu kuasa ti di langit deka begetar.

²⁶ Udah nya baru Anak mensia deka datai dalam remang ngena kuasa enggau mulia ti besai.

²⁷Udah nya Iya deka ngirumka bala melikat, lalu ngempuruka bala nembiak Iya ke udah dipilih Iya ari empat iti sukut dunya, aru dunya sepiak ngagai dunya sepiak.

²⁸“Pelajarka ari kayu ara. Lebuh dan iya nyau geduk, lalu daun iya belabuh bekantuk, kita nemu musin panas nyau semak.

²⁹Baka nya mega, lebuh kita meda utai tu nyadi, kita nemu Iya[67] nyau semak, bisi ba mua pintu.

³⁰ Enggau bendar Aku madah ngagai kita, rebak ti diatu apin mati sebedau semua utai tu nyadi.

³¹ Langit enggau dunya deka lenyau, tang leka jaku Aku enda lenyau.

³² “Tang nadai orang nemu hari tauka jam. Melikat ke di serega enda nemu, lalu Anak Mensia pen enda mega nemu. Semina Apai aja nemu.

³³ Bejaga, besedia,[68] laban kita enda nemu kemaya hari nya deka datai.

³⁴ Iya baka orang siku ke bejalai[69] ngagai menua bukai. Iya ninggalka rumah lalu ngasuh orang gaji iya ngemataka utai iya, siku-siku bela diberi iya pengawa, lalu ngasuh orang ke nyaga mua pintu iya bejaga.

³⁵ Nya alai, bejaga kita, laban kita enda nemu kemaya tuan rumah nya deka datai, nemuka lebuh lemai hari, tauka ba urung tengah malam, tauka sebedau dini hari, tauka ba urung rerak tawas,

³⁶enggai ke iya tetemuka kita tinduk lebuh iya ngenyit datai.

³⁷Nya alai Aku madah ngagai semua kita: Bejaga.”