Read Iban Mark 14 Bible Online

Mark 14 - Iban bible

Mark 14

¹ Dua hari sebedau Gawai Paska enggau Gawai Roti Ti Enda Beragi nyadi, sida tuai imam, enggau sida pengajar Adat ngiga jalai nangkap Jesus[70] ngena chara belalai lalu munuh Iya,

²laban ku sida, “Ukai lebuh maya gawai, enggai ke orang begau.”

³Lebuh Jesus benung makai dalam rumah Simon ke udah sakit lan di Betani, siku indu datai mai sebutul minyak wangi ti berega, mechahka butul nya, lalu nuang minyak wangi nya ba pala Jesus.

⁴Tang sekeda orang ke bisi dia pedis ati meda nya, lalu bejaku enggau pangan diri, “Nama kebuah masau minyak wangi nya?

⁵Laban minyak wangi nya tau dijual ngena rega lebih tiga ratus singkap duit pirak[71] lalu duit nya diberi ngagai orang ke seranta!” Sida lalu nganu indu nya.

⁶Tang ku Jesus bejaku, “Anang ngachau iya! Nama kebuah kita ngiruh iya? Iya udah ngereja utai ti manah ke Aku.

⁷ Laban kita deka seruran bisi orang ke seranta enggau kita, lalu kita tau ngayanka penyiru kita ke sida sebarang maya kita deka. Tang Aku enda seruran bisi enggau kita.

⁸ Iya udah ngereja utai ti ulih dikereja iya. Iya udah nata tubuh Aku kena nyendiaka Aku dikubur.

⁹Enggau bendar Aku madah ngagai kita, di sebarang endur Berita Manah[72] tu ditusui di serata dunya, utai ti udah dikereja iya deka ditusui kena ngingatka iya.”

¹⁰Udah nya Judas Iskariot, siku ari sida ke dua belas, mansang ngagai sida tuai imam, deka nyual Jesus ngagai sida.

¹¹Lebuh sida ninga nya, sida gaga amat lalu besemaya deka meri iya duit. Nya alai Judas lalu belabuh begigaka peluang nyual Jesus.

¹²Ba hari ti keterubah ke Gawai Roti Ti Enda Beragi, lebuh maya nyayat anak domba, sida murid bejaku enggau Iya, “Dini alai Nuan ngasuh kami nyendiaka pemakai Gawai Paska ke Nuan?”

¹³Iya lalu ngasuh dua iku murid Iya. Ku Iya bejaku ngagai seduai iya, “Alai seduai mansang ngagai nengeri. Siku lelaki ke mai tempayan[73] ai deka betemu enggau seduai. Titihka iya,

¹⁴lalu tama ngagai rumah ti alai iya tama, lalu sebut ngagai orang ke bempu rumah nya, ‘Pengajar nanya, Dini alai bilik temuai alai Aku makai pemakai Gawai Paska enggau murid Aku?’

¹⁵Iya deka madah ngagai seduai siti bilik ti besai di sadau, ti udah dikemas sereta disikap. Sediaka pemakai Gawai Paska ke kitai dia.”

¹⁶Nya alai murid dua iku nya lalu mupuk ngagai nengeri nya, lalu nemu semua utai munyi ti udah dipadahka Jesus ngagai seduai iya. Seduai iya lalu nyendiaka pemakai Gawai Paska.

¹⁷ Lebuh hari nyau lemai, Jesus lalu datai enggau sida ke dua belas.

¹⁸Lalu lebuh sida benung duduk makai, Jesus bejaku, “Enggau bendar Aku madah ngagai kita, siku ari bala kita deka nyual Aku, iya ke sama makai enggau Aku.”

¹⁹Sida murid lalu belabuh tusah ati, lalu nanya Iya, udah siku, siku, “Ukai patut aku?”

²⁰Ku Iya bejaku ngagai sida, “Siku ari kita ke dua belas, iya ke nyepuhka roti[74] ngagai pinggai[75] nyereta Aku.

²¹Laban Anak Mensia deka mupuk munyi ti ditulis pasal Iya. Tang naka meh penusah orang ke nyual Anak Mensia! Manah agi enti iya enda ada!”

²²Lebuh sida benung makai, Iya ngambi roti, lalu lebuh Iya udah merekat roti nya Iya lalu mechahka roti nya, meri roti nya ngagai sida murid Iya, lalu bejaku, “Empa; tu tubuh Aku.”

²³ Udah nya Iya ngambi mangkuk, lalu lebuh Iya udah meri terima kasih, Iya lalu nyuaka mangkuk nya ngagai sida, lalu semua sida bela ngirup ari mangkuk nya.

²⁴ Ku Iya bejaku ngagai sida, “Tu darah Aku, darah sempekat, ti dituang ke orang mayuh.

²⁵Enggau bendar Aku madah ngagai kita, Aku enda agi ngirup wain tu nyentuk ngagai hari Aku ngirup iya baru dalam Perintah Allah Taala.”

²⁶Lebuh sida udah belagu siti pantun, sida lalu mupuk ngagai Bukit Kana.

²⁷ Jesus lalu bejaku ngagai sida, “Semua kita deka ninggalka Aku, laban endang udah ditulis, ‘Aku deka munuh pengibun bedus, lalu raban bedus deka pambar.’

²⁸ Tang lebuh Aku udah diangkatka idup baru, Aku deka mupuk ngagai Galili dulu ari kita.”

²⁹Peter lalu bejaku ngagai Iya, “Enti sema semua sida ninggalka Nuan, aku meh enda.”

³⁰ Jesus lalu bejaku ngagai iya, “Enggau bendar Aku madah ngagai nuan, sehari tu, malam tu, sebedau manuk mengkukuk kedua kali, nuan udah besangkalka Aku tiga kali.”

³¹Tang Peter bejaku bebendar agi, ku iya, “Enti sema aku enda tau enda mati enggau Nuan, enda meh aku besangkalka Nuan!” Semua murid ti bukai bela bejaku munyi nya magang.

³²Sida datai ba endur siti ti dikumbai Getsemani, lalu ku Iya bejaku ngagai sida murid Iya, “Duduk ditu. Aku deka besampi.”

³³Iya lalu mai Peter, James enggau John, lalu belabuh tusah amat ati sereta teguran,

³⁴ lalu ku Iya bejaku ngagai sida, “Ati Aku balat tusah, asai ke deka mati. Tinggal ditu lalu anang tinduk.”[76]

³⁵Iya bejalai jauh mimit, nyungkurka Diri ke tanah lalu besampi minta Diri, enti ulih, enda ibuh natka pemerinsa nya.

³⁶ Ku Iya besampi, “Abba,[77]Apai, ba Nuan semua utai ulih magang. Ambi mangkuk tu ari Aku, tang ukai nitihka peneka Aku, tang nitihka peneka Nuan.”

³⁷Udah nya Iya pulai baru ngagai sida murid, lalu nemu sida tinduk, lalu ku Iya bejaku ngagai Peter, “Simon, kati nuan tinduk? Kati nuan enda ulih bejaga sejam?

³⁸ Bejaga sereta besampi, ngambika kita enda kena laban penguji. Ati amat deka, tang tubuh lemi.”

³⁹Iya mupuk baru lalu besampi munyi ti dulu.

⁴⁰Udah nya Iya pulai baru lalu nemu sida tinduk, laban sida nyau kelalu deka tinduk. Lalu sida enda nemu chara madah ngagai Iya.

⁴¹Lebuh Iya pulai baru ketiga kali, Iya bejaku ngagai sida, “Kati kita agi tinduk sereta belelak? Umbas meh nya! Maya udah datai. Diatu Anak Mensia deka dijual ngagai orang ke bedosa.

⁴²Angkat. Aram kitai mupuk. Peda kita, orang ke nyual Aku udah datai!”

⁴³Kemaya nya, lebuh Jesus agi benung bejaku, Judas, siku ari sida ke dua belas, lalu datai, mai bala orang ke betangkinka pedang enggau bebaika pemalu, ari sida tuai imam, ari sida pengajar Adat, enggau ari sida tuai bansa.

⁴⁴Nyadi orang ke nyual Iya, udah meri sida siti tanda. Ku iya, “Orang ke disium aku, nya meh Iya. Tangkap Iya, bai Iya lalu jaga Iya.”

⁴⁵Nya alai lebuh Judas datai, iya lalu tekala nya mansang ngagai Jesus, lalu bejaku, “Pengajar!” lalu nyium Iya.

⁴⁶Sida megai lalu nangkap Jesus.

⁴⁷Tang siku ari orang ke bediri semak dia nyintak pedang iya, lalu mantap ulun imam besai, mutuska pending iya.

⁴⁸Jesus lalu bejaku ngagai sida, “Kati kita betangkinka pedang enggau bebaika pemalu mansang nangkap Aku, baka ke nangkap perumpak?

⁴⁹ Tiap hari Aku begulai enggau kita lebuh Aku ngajar dalam Rumah Sembiang, lalu kita enda nangkap Aku. Tang awakka Bup Kudus dikamatka.”

⁵⁰Semua murid ninggalka Iya, lalu rari.

⁵¹Siku orang bujang, ke beserayung semina ngena kain linin, nitihka Jesus. Sida nangkap iya,

⁵²tang iya rari telanjai-lanjai, ninggalka serayung iya.

⁵³Sida lalu mai Jesus ngagai imam besai. Semua sida tuai imam, sida tuai bansa enggau sida pengajar Adat lalu begempuru.

⁵⁴Peter udah nitihka Jesus ari jauh, nyentuk ngagai tengah laman imam besai, lalu iya duduk bekindu enggau sida jejaga.

⁵⁵Nyadi sida tuai imam enggau semua raban Kunsil ngiga saksi ngelaban Jesus, ngambika Iya diukum bunuh. Tang sida nadai tetemuka saksi.

⁵⁶Laban mayuh orang besaksi bula ngelaban Iya, tang saksi sida enda besetuju enggau saksi pangan diri.

⁵⁷Sekeda orang bediri lalu besaksi bula ngelaban Iya. Ku sida,

⁵⁸ “Kami udah ninga Iya nyebut, ‘Aku deka ngerusak Rumah Sembiang tu ti digaga mensia, lalu dalam tiga hari Aku deka nirika sebuah ti ukai digaga mensia.’ ”

⁵⁹Tang indah ba senentang tu deh saksi sida mengkang enda besetuju enggau saksi pangan diri.

⁶⁰Imam besai lalu bediri di mua sida, lalu nanya Jesus, “Kati Nuan nadai saut ngagai nya? Nama utai tu ti disebut sida ngelaban Nuan?”

⁶¹Tang Jesus enda bemunyi, lalu enda nyaut. Imam besai lalu nanya Iya baru, “Kati Nuan tu Kristus,[78] Anak Iya ti Beberekat?”

⁶² Jesus lalu bejaku, “Aku meh nya, lalu ‘kita deka meda Anak Mensia duduk muak ari kanan Iya ti Bekuasa,’ lalu ‘datai dalam remang ari serega!’ ”

⁶³ Imam besai lalu nyarikka baju panjai iya empu, lalu bejaku, “Nama kebuah kitai begunaka saksi bukai?

⁶⁴ Kita udah ninga Iya bejaku busung. Nnama pemutus penemu kita?” Semua sida bela madahka Iya patut diukum bunuh.

⁶⁵Sekeda sida lalu belabuh ngeludah Iya, mampul mata Iya lalu nampar Iya. Ku sida, “Uji Nuan benabi!” Bala jejaga mega enggau ngambi peluang, lalu malu Iya.

⁶⁶Lebuh Peter agi benung di baruh ba tengah laman, siku kuli indu ke bekereja ke imam besai mansa.

⁶⁷Lebuh iya meda Peter bekindu, iya merening ngagai Peter, lalu bejaku, “Nuan pen udah meh enggau Jesus orang Nasaret.”

⁶⁸Tang Peter besangkalka nya. Ku iya, “Nadai aku nemu tauka meretika utai ti ku nuan.” Iya lalu pansut ngagai mua pintu penama. Manuk lalu mengkukuk.[79]

⁶⁹Lebuh indu kuli nya meda Peter, iya lalu belabuh baru madah ngagai orang ke bediri dia, “Iya tu siku ari bala sida!”

⁷⁰Tang Peter besangkal baru. Enda lama udah nya, lebuh orang ke bediri dia bejaku ngagai Peter baru, “Nuan tetap raban sida, laban nuan tu orang Galili.”

⁷¹Tang Peter lalu belabuh nyumpah, ku iya, “Nadai aku nemu orang ti ku kita!”

⁷²Lebuh maya nya manuk mengkukuk kedua kali. Nya baru Peter ingatka utai ti udah disebut Jesus ngagai iya, “Sebedau manuk mengkukuk kedua kali, nuan udah besangkalka Aku tiga kali.” Peter lalu nyabak.