Read Iban Mark 15 Bible Online

Mark 15 - Iban bible

Mark 15

¹Tumu pagi hari siti, sida tuai imam lalu baum enggau bala tuai bansa, bala pengajar Adat, enggau semua raban Kunsil. Sida nanchang Jesus ngena rantai,[80] mai Iya ari endur nya, lalu nyerahka Iya ngagai Pilate.

² Pilate lalu nanya Iya, “Kati Nuan tu Raja orang Judah?” Disaut Jesus, “Munyi ti ku nuan.”[81]

³Sida tuai imam lalu madahka Iya udah ngereja mayuh macham penyalah.[82]

⁴Pilate lalu nanya Iya baru, “Kati Nuan nadai saut ngagai nya? Dinga Nuan pemayuh dawa ti dibantaika sida ngelaban Nuan.”

⁵Tang Jesus nadai agi nyaut, lalu Pilate balat alit ati.

⁶Ba genap Gawai Paska Pilate endang selalu ngelepaska siku orang tutup ke sida, sebarang orang ke dipinta sida.

⁷Nyadi dalam rumah jil bisi orang siku benama Barabas, sama enggau bala orang ke udah munuh orang sereta udah angkat ngelaban perintah.

⁸Nya alai bala orang mayuh datai lalu belabuh minta Pilate ngereja utai ke sida baka ti udah dikereja iya ngelama tu.

⁹Pilate lalu nanya sida, “Kati kita ngasuh aku ngelepaska Raja orang Judah ke kita?”

¹⁰Laban iya nemu sida tuai imam kepapaska Jesus; nya kebuah sida nyerahka Jesus ngagai iya.

¹¹ Tang sida tuai imam nyungkak orang mayuh minta Pilate ngelepaska Barabas ke sida.

¹²Pilate lalu bejaku baru ngagai sida, “Enti pia, nama utai ti patut dikereja aku ngagai Iya ke dikumbai kita[83] Raja orang Judah?”

¹³Sida lalu manjung nyaut iya, “Regang Iya!”

¹⁴Pilate lalu nanya sida, “Nama kebuah? Nama penyalah ti udah dikereja Iya?” Tang sida manjung inggar agi, “Regang Iya!”

¹⁵Nyadi laban Pilate endang deka ngenyamaika ati orang mayuh, iya lalu ngelepaska Barabas ke sida. Lebuh Jesus udah disipat, iya lalu nyerahka Jesus ngambika Iya diregang.

¹⁶Bala soldadu lalu mai Jesus ke dalam ngagai tengah laman istana gabenor, lalu ngangauka semua raban soldadu ti bukai.

¹⁷Sida lalu ngerasukka baju panjai ti ungu ba Iya. Lebuh sida udah ngaga makota ari pating kayu ti beduri, sida lalu ngengkahka makota nya ba pala[84] Iya.

¹⁸Sida lalu belabuh nabi Iya, “Tabi, Raja orang Judah!”

¹⁹Sida malu pala Iya ngena kayu,[85] ngeludah Iya, besugang, lalu meremi di mua Iya.

²⁰Lebuh sida udah beduan Iya, sida muka baju panjai ti ungu nya ari Iya, lalu ngerasukka gari Iya Empu ba Iya. Udah nya sida mai Iya pansut, deka ngeregang Iya.

²¹Sida mejalka siku orang ke mansa, ke datai ari menua pesisir, ngesan regang Iya. Orang nya benama Simon ke asal ari menua Sairin, lalu iya nya apai Aleksander seduai Rupus.

²² Sida lalu mai Jesus[86] ngagai endur siti ti dikumbai Golgota, reti nya, “Endur Keruntuk”

²³Sida lalu meri Iya wain dichampur enggau mur, tang Jesus enggai ngirup nya.

²⁴ Udah nya sida ngeregang Iya, lalu bedua gari Iya entara bala sida, ngena chara bechabut undi kena nentuka sapa tau bulih gari iya.

²⁵Jam nyau pukul semilan pagi lebuh sida ngeregang Iya.

²⁶Pelekat ti madahka penyalah Iya, nyebut: “Raja orang Judah.”

²⁷Dua iku penyamun mega diregang sama enggau Iya, siku muak ari kanan, lalu siku muak ari kiba Iya.

²⁸Tu ngamatka jaku ti udah disebut dalam Bup Kudus, “Iya dibunuh begulai enggau orang ke udah ngereja penyalah.”[87]

²⁹ Orang ke mansa ngeleseka[88] Iya lalu ngilikka pala sida. Ku sida, “Nuan ke deka ngerusak Rumah Sembiang, lalu nirika iya baru dalam tiga hari,

³⁰selamatka Diri Empu, lalu nurun ari regang nya!”

³¹ Sida tuai imam enggau sida pengajar Adat mega ngeleseka Iya di mua pangan diri. Ku sida, “Iya nyelamatka orang bukai, tang Iya enda ulih nyelamatka Diri Empu!

³²Awakka Kristus,[89] Raja orang Judah, nurun ari regang nya diatu, ngambika kitai meda lalu arap.” Orang ke diregang sama enggau Iya, mega ngeleseka Iya.

³³Ba urung tengah hari semua menua petang magang, nyentuk ngagai pukul tiga ngalih hari.

³⁴ Ba urung pukul tiga Jesus ngangau enggau nyawa ti inggar, “Eloi, Eloi, lama[90] sabaktani?” reti nya, “Allah Taala Aku, Allah Taala Aku, nama kebuah Nuan ninggalka Aku?”[91]

³⁵Lebuh orang ke bediri dia ninga Iya ngangau, sekeda sida lalu bejaku, “Dinga nya, Iya ngangauka Elijah!”

³⁶ Siku orang lalu belanda, nyepuhka bungai karang ngagai wain ti masam, ngengkahka utai nya ba puting kayu, lalu ngasuh Jesus ngirup, ku iya, “Anang guai dulu! Awakka kitai meda enti Elijah deka datai lalu ngambi Iya ari regang nya!”

³⁷Jesus lalu ngangau enggau nyawa ti inggar, lalu ngapuska seput.

³⁸ Kain dalam Rumah Sembiang lalu charik belah dua ari atas ke baruh.

³⁹ Lebuh pemesai soldadu ke bediri di mua Iya, meda chara Jesus ngapuska seput,[92] iya lalu bejaku, “Orang tu amat Anak Allah Taala!”[93]

⁴⁰ Sida ke indu mega bisi dia, nengkila ari jauh. Bala sida nya nyengkaum Maria Magdalin, Maria indai James ti biak seduai Joses, enggau Salomi.

⁴¹ Sida nya udah nyempulang Jesus lalu nulung Iya enggau utai ti dipeguna Iya lebuh Iya agi di menua Galili, enggau mayuh indu bukai ke udah datai sama enggau Iya ngagai Jerusalem.

⁴²Lebuh hari nyau lemai, lalu laban hari nya endang hari alai nyendiaka Gawai, iya nya hari sebedau hari Sabat,

⁴³Josep ke asal ari Arimatea, siku raban Kunsil, ke nganti penatai Perintah Allah Taala, mansang enggau ati ti berani ngagai Pilate, minta bangkai Jesus.

⁴⁴Pilate lalu iran ati enti Jesus amat udah mati. Nya alai iya mesanka pemesai soldadu, lalu nanyaka enti Jesus amat lama udah mati.

⁴⁵Lebuh Pilate nemu Jesus udah mati ari padah pemesai soldadu nya, iya lalu nyerahka bangkai Jesus ngagai Josep.

⁴⁶Josep lalu meli kain linin, nurunka bangkai Jesus, mungkus bangkai nya ngena kain linin nya, lalu ngalika bangkai nya dalam kubur ti udah ditebuk ba batu galang. Iya lalu maringka sigi batu ti besai ngagai mua kubur nya.

⁴⁷Nyadi Maria Magdalin enggau Maria indai Joses bisi meda endur alai bangkai Jesus digalika.