Read Iban Mark 2 Bible Online

Mark 2 - Iban bible

Mark 2

¹Lebuh Iya pulai ngagai Kapernaum kira dua tiga hari udah bekau nya, orang lalu madahka Iya bisi di rumah.

²Mayuh amat orang begempuru dia, datai ke rumah nya nyau enda muat alai sida. Di mua pintu pen nadai meh endur. Lalu Iya nusui pesan Allah Taala ngagai sida.

³ Empat iku lelaki datai ngagai Iya, mai orang siku ke sakit bajung.

⁴Laban orang kelalu mayuh, sida enda ulih mai orang nya ngagai Jesus, lalu sida ngerumbak perabung ba senentang endur alai Jesus, lalu ngulurka orang ke sakit nya ngena tikai iya empu.

⁵Lebuh Jesus meda pengarap sida, Iya lalu bejaku ngagai orang ke sakit bajung nya, “Anak, dosa nuan diampun.”

⁶Sekeda pengajar Adat ke duduk dia lalu betanya dalam ati diri,

⁷“Nama kebuah orang tu bejaku munyi nya? Nya jaku busung! Semina Allah Taala aja ulih ngampun dosa!”

⁸Tekala nya Jesus nemu utai ti diperagam ati sida, lalu ku Iya, “Nama kebuah kita beperagamka utai ti baka nya?

⁹Ni ti mudah agi disebut ngagai orang ke sakit bajung tu, ‘Dosa nuan diampun,’ tauka ‘Angkat, bai peninduk nuan, lalu bejalai’?

¹⁰Tang ngambika kita nemu Anak Mensia bisi kuasa di dunya tu ngampun dosa,” Iya lalu bejaku ngagai orang ke sakit bajung nya,

¹¹“Aku bejaku ngagai nuan: angkat nuan! Bai peninduk nuan, lalu pulai ke rumah!”

¹² Orang nya lalu bediri, lalu tekala nya ngambi peninduk iya, lalu pansut ari endur nya dipeda semua sida. Semua sida lalu balat alit ati, lalu ngemuliaka Allah Taala. Ku sida, “Nadai kitai udah kala meda utai baka tu!”

¹³Jesus bejalai baru ngagai tebing Danau Galili, lalu bala orang mayuh begelumu ngelingi Iya, lalu Iya ngajar sida.

¹⁴ Lebuh Iya benung bejalai, Iya tepedaka Lewi anak Alpius duduk dalam opis pengumpul chukai. Iya lalu bejaku ngagai Lewi, “Titihka Aku.” Lewi angkat lalu nitihka Iya.

¹⁵Lebuh Iya makai dalam rumah Lewi, mayuh pengumpul chukai enggau orang ke bedosa makai sama enggau Iya sereta enggau murid Iya, laban mayuh sida nya nitihka Iya.

¹⁶ Lebuh sida pengajar Adat enggau orang Parisi meda Jesus begulai makai enggau orang ke bedosa, sereta enggau pengumpul chukai, sida lalu bejaku ngagai sida murid Iya, “Nama kebuah Iya begulai makai enggau pengumpul chukai sereta enggau orang ke bedosa?”

¹⁷Lebuh Jesus ninga nya, Iya lalu bejaku ngagai sida, “Orang ke gerai enda begunaka lutur, tang semina orang ke sakit. Aku datai ukai deka ngangauka orang ke lurus, tang orang ke bedosa.”

¹⁸Nyadi sida murid John Pemaptisa enggau sida orang Parisi bepasa. Orang[8] lalu datai ngagai Jesus, lalu nanya Iya, “Nama kebuah sida murid John Pemaptisa enggau sida murid orang Parisi bepasa, tang murid Nuan enda?”

¹⁹Ku Jesus bejaku ngagai sida, “Kati bala pengabang bepasa lebuh lelaki ke ditikah agi mengkang begulai enggau sida? Seagi-agi lelaki ke ditikah nya mengkang begulai enggau sida, sida enda bepasa.

²⁰ Maya deka datai alai lelaki ke ditikah nya deka diambi ari sida, nya baru sida deka bepasa.

²¹“Nadai orang nampalka chebik kain ti baru ngagai kain ti lama, laban kain ti baru nya deka kesat lalu nyintak ari kain ti lama, lalu ngasuh kain ti lama nya balat agi charik.

²²Lalu nadai mega orang nuang wain ti baru ngagai kambut wain ti lama, enggai ke wain nya ngasuh kambut nya pechah, lalu wain nya deka nyaya, lalu kambut nya rusak. Wain ti baru patut disimpan dalam kambut ti baru.”[9]

²³ Nyadi sekali lebuh hari Sabat Jesus bejalai nengah umai gandum. Lebuh sida bejalai nengah umai nya sida murid Iya lalu belabuh ngelesit igi gandum.

²⁴Orang Parisi lalu bejaku ngagai Iya, “Nama kebuah sida ngereja utai ti ngelanggar Adat lebuh hari Sabat!”

²⁵Iya lalu bejaku ngagai sida, “Kati kita nadai udah kala macha pasal utai ti dikereja David, lebuh iya enggau bala iya lapar lalu begunaka pemakai?

²⁶ Iya tama ngagai rumah Allah Taala, lebuh maya Abiatar nyadi imam besai, lalu makai roti ti udah diberi ngagai Allah Taala, ti enda tau diempa orang bukai kelimpah ari sida imam, lalu iya mega meri roti nya ngagai bala iya?”

²⁷ Lalu ku Jesus bejaku ngagai sida, “Hari Sabat digaga ke mensia, ukai mensia ke hari Sabat.

²⁸Nya alai Anak Mensia Tuhan ke hari Sabat.”