Read Iban Mark 3 Bible Online

Mark 3 - Iban bible

Mark 3

¹Jesus lalu tama baru ngagai balai gempuru. Dalam balai gempuru nya bisi siku orang ke mati lengan sepiak.

² Sida lalu nengkilaka Jesus, deka meda enti Iya deka ngeraika orang nya lebuh hari Sabat, ngambika sida ulih besalahka Iya.

³Ku Iya bejaku ngagai orang ke mati lengan nya, “Datai ke mua kitu.”

⁴Lalu ku Iya bejaku ngagai sida, “Nitihka Adat, ni utai ti patut dikereja kitai lebuh hari Sabat, ngereja utai ti manah tauka utai ti jai; ngidupka nyawa tauka munuh?” Tang sida enda engkeretik.

⁵Jesus merening ngagai sida enggau ati ti pedis tang sinu ati ke sida laban sida kieh. Iya lalu bejaku ngagai orang ke mati jari nya, “Unjurka jari nuan.” Orang nya lalu ngunjurka jari iya, lalu jari iya gerai.

⁶ Orang Parisi pansut, lalu baum tekala nya enggau bala nembiak Herod, bekiraka chara munuh Jesus.

⁷ Jesus enggau sida murid Iya mupuk ngagai Danau Galili, lalu mayuh amat orang ari Galili, enggau ari Judea nitihka Iya,

⁸enggau ari Jerusalem, ari Idumea, ari menua ti ngilah Sungai Jordan, enggau ari menua ti ngelingi nengeri Tire enggau Sidon. Mayuh amat orang datai ngagai Iya lebuh sida ninga pasal semua utai ti dikereja Iya.

⁹ Iya lalu ngasuh sida murid Iya nyendiaka sebuah perau ke Iya, laban orang kelalu mayuh, enggai ke sida ngempitka Iya;

¹⁰ laban Iya udah ngeraika mayuh orang, datai ke semua orang ke sakit nyau berebut mansang ngagai Iya, deka negu Iya.

¹¹Lalu genap kali roh ti jai meda Iya, sida nyungkurka diri di mua Iya, lalu merakka nyawa, “Nuan tu Anak Allah Taala!”

¹² Lalu Iya berat-rat nangkan sida enggau jaku, enggai ke orang ngelala Iya.

¹³Udah nya Jesus niki ngagai bukit sigi, lalu ngangauka orang ke dikedekaka Iya. Sida lalu datai ngagai Iya.

¹⁴ Iya lalu milih dua belas iku sida ke dikumbai Iya rasul, ngambika sida bisi enggau Iya, sereta bisi diasuh Iya bejalai nusui Berita Manah,[10]

¹⁵lalu bisi kuasa muru antu.

¹⁶ Nya alai Iya milih dua belas iku sida: Simon (ke digelar Iya Peter),

¹⁷James anak Sebedi enggau menyadi iya John, (ke digelar Iya Boanerges, reti nya “Anak Guntur”),

¹⁸Andrew, Philip, Bartolomew, Matthew, Thomas, James anak Alpius, Tadeus, Simon ke digelar bujang berani,

¹⁹ enggau Judas Iskariot, ke nyual Jesus. Udah nya Iya pulai ke rumah.

²⁰Bala orang mayuh lalu begelumu baru, datai ke Jesus enggau sida murid Iya nyau enda ulih makai.

²¹ Lebuh sida Jesus sebilik ninga nya, sida lalu datai deka nagang Iya, laban orang bisi udah bejaku, “Iya nyau udah gila!”

²² Lalu ku bala pengajar Adat ke datai ari Jerusalem bejaku, “Iya bisi Belsebup dalam Iya, lalu Iya muru antu ngena kuasa raja antu.”

²³Iya lalu ngangauka sida ngagai Iya, lalu bejaku ngagai sida ngena jaku sempama: “Baka ni ku Sitan ulih muru Sitan?

²⁴Enti perintah bepechah-belah ngelaban diri empu, perintah nya enda tan.

²⁵Lalu enti ruang bilik bepechah-belah ngelaban diri empu, ruang bilik nya enda tan.

²⁶Lalu enti Sitan bepechah-belah ngelaban diri empu, iya enda tan, lalu perintah iya deka abis.

²⁷ “Tang nadai orang ulih tama ngagai rumah orang ke kering, lalu ngerampas reta tengkira iya, enti iya enda dulu nanchang orang ke kering nya. Udah nya baru iya ulih ngerampas utai ari rumah orang nya.

²⁸ “Enggau bendar Aku madah ngagai kita, semua mensia deka diampun ari dosa sida enggau ari jaku busung sida,

²⁹ tang barang sapa bejaku busung ngelaban Roh Kudus, enda diampun, laban iya ngereja dosa ti mengkang belama iya.” (

³⁰Jesus nyebut nya laban sida udah nyebut, “Iya bisi roh ti jai.”)

³¹Indai enggau sida menyadi lelaki Jesus datai. Sida bediri di luar, lalu ngasuh orang madahka Iya.

³²Mayuh amat orang duduk ngelingi Iya, lalu ku sida bejaku ngagai Iya, “Indai enggau sida menyadi lelaki[11] Nuan bisi di luar, ngiga Nuan.”

³³Jesus lalu nyaut, “Sapa indai Aku? Sapa menyadi Aku?”

³⁴Iya lalu merening ngagai orang ke duduk ngelingi Iya, lalu bejaku, “Tu meh indai Aku enggau menyadi Aku!

³⁵Barang sapa ngereja peneka Allah Taala, nya meh menyadi lelaki, menyadi indu, enggau indai Aku.”