Read Iban Mark 4 Bible Online

Mark 4 - Iban bible

Mark 4

¹ Jesus lalu belabuh ngajar baru ba tebing Danau Galili. Mayuh amat orang begempuru ngelingi iya. Nya alai Iya nepan sebuah perau ti lagung-lagung ba danau nya, lalu nudukka Diri dia, lalu semua orang mayuh bediri ba tebing.

²Iya lalu belabuh ngajar sida mayuh macham utai ngena jaku sempama. Ku Iya:

³“Dinga kita! Siku penabur benih mansang naburka benih.

⁴Lebuh iya naburka benih nya, sekeda leka benih nya labuh ba jalai; burung datai lalu makai leka benih nya.

⁵Sekeda leka benih nya labuh ba tanah ti bebatu, ti nadai mayuh tanah. Leka benih nya lalu matuk tekala nya, laban tanah dia mabu,

⁶lalu lebuh mata panas nyau niki, utai nya layu lalu mati, laban iya nadai urat.

⁷Sekeda leka benih ti bukai labuh ba madang duri. Duri nya tumbuh lalu ngalahka benih ti tumbuh nya, lalu sida enda ulih bebuah.

⁸Lalu benih ti bukai labuh ba tanah ti ami, tumbuh lalu mansang besai lalu bebuah lebat, mansutka tiga puluh kali lipat, enam puluh kali lipat, enggau seratus kali lipat.”

⁹Lalu ku Jesus bejaku, “Awakka orang ke bisi pending, ninga.”

¹⁰Lebuh Jesus nyau keDiri, sida ke dua belas enggau orang bukai ke enggau sida lalu nanya ngagai Iya pasal jaku sempama nya.

¹¹ Lalu ku Iya bejaku ngagai sida, “Kita udah diberi misteri pasal Perintah Allah Taala, tang ke orang ti di luar, semua utai diberi ngagai sida ngena jaku sempama,

¹² ngambika sida merening tang enda meda, mending tang enda mereti, laban enti sida mereti, sida deka nguing ngagai Allah Taala, lalu Iya deka ngampun sida.”

¹³Lalu ku Iya bejaku ngagai sida, “Kati kita enda meretika sempama tu? Enti pia, baka ni ku kita ulih meretika semua sempama?

¹⁴Orang ke penabur benih nya naburka jaku Allah Taala.

¹⁵Benih ti labuh ba jalai nya orang ke ninga jaku nya. Lebuh sida ninga jaku nya, Sitan datai tekala nya lalu ngerampas jaku nya ari sida.

¹⁶Benih ti labuh ba tanah ti bebatu nya orang ke gaga ati ninga lalu nerima jaku nya.

¹⁷Tang sida nadai urat, lalu tan enda lama. Lebuh penusah tauka pemerinsa datai ketegal jaku nya, sida lalu tekala nya mungkir.

¹⁸Benih ti labuh ba madang duri nya orang ke ninga jaku nya,

¹⁹tang pengangkun sida ke dunya, enggau pengerindu sida ke pengaya, enggau pengingin sida ke utai bukai, tama lalu ngalahka jaku nya, lalu jaku nya enda bebuah.

²⁰Tang benih ti labuh ba tanah ti manah[12] nya orang ke ninga jaku nya, nerima iya lalu bebuah tiga puluh, enam puluh, enggau seratus kali lipat.”

²¹ Lalu ku Iya bejaku ngagai sida, “Kati lampu ti ditungkun, dirungkup ngena bisin, tauka diengkah di baruh katil, tauka diengkah ba penuduk lampu?

²² Laban nadai utai ti dilalai, enda dikebakka, lalu nadai utai ti resia, enda ditemu.

²³ Awakka orang ke bisi pending, ninga.”

²⁴ Lalu ku Iya bejaku ngagai sida, “Peratika utai ti didinga kita! Takar ti dikena kita, deka dikena nakar utai ke kita, lalu utai ti lebih agi ari nya deka diberi ngagai kita.

²⁵ Laban orang ke bisi utai deka diberi mayuh agi, lalu orang ke nadai utai, indah utai ti mimit ti dikemisi sida deh deka diambi ari sida.”

²⁶ Ku Iya mega bejaku, “Perintah Allah Taala nya baka orang siku ke naburka benih ba tanah.

²⁷Malam hari iya tinduk, lalu lebuh siang hari iya angkat, tang iya enda nemu baka ni ku utai nya matuk lalu tumbuh.

²⁸Tanah nya ti ngeluarka asil, terubah, batang pegari, udah nya utai nya murai, lalu udah nya tangkai pegari.

²⁹ Tang lebuh utai nya nyau mansau, orang lalu tekala nya ngerat batang iya ngena sabit, laban nya endang maya ngetau.

³⁰Jesus mega nyebut, “Baka ni ku kitai mandingka Perintah Allah Taala? Tauka sempama ni ti deka dikena kitai madahka pasal Perintah nya?

³¹Perintah Allah Taala nya baka igi mustard,[13] leka ti pemadu mit di dunya tu.

³²Tang lebuh iya udah ditanam, iya tumbuh lalu nyadi utai ti besai agi ari semua utai bukai ti ditanam. Iya mansutka dan ti besai, datai ke burung nyau ulih ngaga tansang di baruh iya.”

³³Jesus ngena mayuh jaku sempama ti baka nya kena Iya madahka pesan ngagai orang mayuh,[14] naka ti ulih didinga sida.[15]

³⁴ Iya enda bejaku ngagai sida enti enda ngena jaku sempama, tang lebuh Iya kediri enggau sida murid Iya, Iya nerangka semua utai ngagai sida.

³⁵Lemai nya Iya bejaku ngagai sida murid Iya, “Aram kitai ngelayang ke seberai.”

³⁶Sida lalu ninggalka orang mayuh, mai Iya enggau sida dalam perau. Perau bukai mega mupuk enggau Iya.

³⁷Kabut besai nyadi, lalu gelumbang mangka ngagai perau sida datai ke perau nya nyau deka karam.

³⁸Iya tinduk di kemudi, gali ba panggal. Sida ngerak Iya, lalu bejaku, “Pengajar, kati Nuan enda ibuhka kitai nyau deka mati?”

³⁹Jesus dani lalu ngerara ribut, lalu bejaku ngagai gelumbang, “Teduh! Diau jenuh!” Ribut lalu teduh, lalu ai nadai agi beumbak.

⁴⁰Ku Iya bejaku ngagai sida, “Nama kebuah kita takut? Kati kita mengkang enda arap?”

⁴¹Lalu sida balat takut, sereta belabuh bejaku enggau pangan diri, “Sapa orang tu datai ke ribut enggau gelumbang ngasika Iya?”